Timoty I 5

O Vantotseo, O Andranavio, Ondevoo

1Ko mitrevoke androanavy, fa ahitio hoe rae naho o gaon-dahio hoe rahalahy, 2o rakembao hoe rene, o somondrarao hoe rahavave, ami’ty hakanitso’e do’e.

3Iasio o ramavoiñeo, o toe vantotseo. 4Aa naho aman’ anake ndra afe ty vantotse, le soa re te hioke he ty hitoloñe ami’ty lilim-pitalahoañe añ’anjomba’e ao, hañavaha’e ty nisongoeñe aman-droae’e, fa izay ty non’ Añahare am-pivazohoa’e. 5Fa mitamà an’ Andrianañahare ka i toe vantotsey i nen­gañe ho vahiniy, ie mitolom-piloloke naho mihalaly handro an-kaleñe; 6fe mikoromake o mie­rañerañe añ’ arimoeñeo ndra t’ie veloñe. 7Afantoho ka irezay soa tsy hinjeañe. 8Aa naho eo ty tsy mamahañe o azeo, àntsa­ke o keleia’eo, le fa nifary i fatokisañey vaho lombolombo’ ty tsi-miato.

9Ampivolilieñe ho vantotse ze ambone’ ty enem-polo taoñe, migahiñe amy tañanjomba’e, 10mbore aman’ engeñe amo tolon-draha soa’eo, ie fa nahabey anake, naho fa nampiantraño ambahiny, naho fa nanasa ty fandia’ o noro’eo, naho fa nanaha o miso­trio, vaho fa nahimbam-pañorike ty fitoloñan-tsoa. 11Fe liero ty vantotse tora’e, hera ho likoare’ ty hadraom-bata’e ty fiatoa’e amy Norizañey, vaho hisalala hanambaly; 12mamà-batañe iereo amy te napoke i fatokisa’ iareo valoha’ey. 13Ie amy zay, mizatse mikopiso, mitsa­tsà-traño; le tsy vaho mihànitse avao fa toe matsindrañe naho mitolom-bolañe; mivolan-draha tsy mañeva. 14Aa le osiheko hangala-baly o vantotse tora’eo, hiterake, hañalahala anjomba, soa tsy omen-dalañe i rafelahiy hañìnje. 15Toe fa nitsile nanonjohy i mpañìnjey o ila’eo. 16Aa naho aman-dongo vantotse ty rakemba mpiato, soa re te atrafe’e, le tsy i Fivoriy ty hiloetse ama’e, fa o toe vantotseo ro fahana’e.

O Andranavio

17Mañeva asiñe indroe o androa­navy mifehe soao, àntsake o mpifanehake amo tsarao naho amo fañòhañeoo. 18Fa hoe i Sokitse Masiñey:

Ko vihine’o ty vavan’añombe mandisañe1,

naho,

Mañeva ty rima’e ty mpièke2.

19Ko mañaon-tsisý amy t’indaty bey naho tsy telo ndra roe ty valolombeloñe3. 20Endaho aolo’ i màroy ty mitolom-pandilatse, hihembaña’ o ila’eo.

Oriheñe fa tsy Irihiañe

21Afantoko añatrefan’ Añahare naho Iesoà Norizañey vaho o anjely jinoboñeo irehe ty hañambeñe irezay, le ko mirihy, ko mañisokisoke aman-dra inoñ’ inoñe. 22Ko meke hanampe fitàñe ama’ ondaty, vaho ko mitraoke ami’ty hatsivokara’ o ila’eo; vontitiro ty halio-tahi’o. 23Ko minon-drano avao fa ano divay kede ty ami’ty fisafoa’o naho o fangonora’oo.

24Malange ty hakeo’ ondaty ila’e ie miaolo iareo mb’an-jaka mb’eo, fe mañorike afara ty ila’e. 25Midodea ka o sata soao, fe ndra tsy izay, tsy hay aetake avao.