Fiantoñoñe I 16

1Aa le nendese’ iareo i vatan’ Añaharey naho najadoñe amy kivoho nihen­tseña’ i Davide ao vaho nañenga soroñe miharo engam-panintsiñañe añatrefan’ Añahare. 2Ie nihenefe’ i Davide ty fañengàñe o soroñe naho engam-panintsiñañeo, le nitatae’e ondatio ami’ty tahina’ Iehovà. 3Le nanjotsoa’e iaby t’Israele, hene ondaty naho roa­kemba, ty vonga-mofo naho venten-kena vaho ty garatom-baloboke maike. 4Tinendre’e hito­roñe añatrefa’ i vata’ Iehovày ty ila’ o nte-Levio haniahy naho hañandriañe vaho handrenge Iehovà Andrianañahare’ Israele. 5I Asafe ty talè, faharoe’e t’i Zekarià, Ieiele naho i Semiramote naho Iehiele naho i Matitià naho i Eliabe naho i Benaià naho i Ovededome naho Ieiele ro aman-jejobory naho talivalo; vaho nipoña-peo am-pikarantsañe t’i Asafe; 6le nampipopò trompetra nainai’e añatrefa’ i vatam-pañinan’ Añaharey t’i Benaià naho Iakaziele.

7Amy andro zay ty nañoriza’ i Davide ty fañandriañañe am’ Iehovà, am-pità’ i Asafe naho o longo’eo.

8Ehe andriaño t’Iehovà, kanjio ty tahina’e;

ampahafohino ondatio o fitoloña’eo.

9Isabo, irengeo an-takasy;

taroño am’ondatio

ze hene fitoloña’e fanjaka.

10Mitrèña amy tahina’e masiñey;

ampirebeho ty arofo’

o mipay Iehovào.

11Hotsohotsò t’Iehovà naho o haozara’eo,

tsoeho nainai’e i lahara’ey.

12Tiahio o fitoloñañe fanjaka nanoe’eo,

o raha tsitantaneo,

naho o fizakàm-palie’eo,

13Ry tarira’ Israele mpitoro’eo,

ry ana’ Iakobe jinobo’eo.

14Ie t’Iehovà Andrianañaharentika;

manitsike ty tane toy o fizakà’eo.

15Tiahio nainai’e i fañina’ey;

i tsara linili’e ami’ty

tariratse faharivo’ey;

16I nanoe’e amy Avrahamey,

naho i nifantà’e am’ Ietsàkey;

17Ie niventè’e am’ Iakobe ho lily,

naho am’Israele ho fañina tsy modo,

18Ami’ty hoe: Ihe ty hitolorako

ty tane’ i Kanàne, ho anjara lova’o;

19ie mbe tsy niampeampe,

toe potrapotra’e naho renetane ama’e ao.

20Aa ie nirererere mb’an-tane mb’an-tane naho boak’ ami’ty fiheheañe,

pak’ am-borizañe ila’e,

21Le tsy napo’e ho joie’ondatio;

eka, iereo ty nañendaha’e mpanjaka ami’ty hoe:

22Ko tsapae’o o norizakoo,

naho ko joie’o o mpitokikoo.

23Misaboa am’ Iehovà ry tane toy iaby;

talilio boak’ andro boak’ andro

ty hasoa’ i fandrombaha’ey.

24Tseizo amo kilakila’ndatio ty enge’e;

o fitoloña’e fanjakao

amo kilakila ondatio.

25Amy te ra’elahy t’Iehovà,

ho rengèñe añ’abo; hañeveñan-dre

te amo ‘ndrahare ila’e iabio.

26Toe kafoake iaby ze ndrahare’ ondatio;

Iehovà ty namboatse o likerañeo1.

27Engeñe naho asiñe ro añatrefa’e eo,

haozarañe naho hafaleañe ro an-toe’e ao.

28Manolora am’ Iehovà

ry fifokoa’ ondatio,

atoloro am’ Iehovà ty engeñe

naho haozarañe.

29Atoloro am’ Iehovà ty engeñe

mañeva i tahina’ey;

añandeso engeñe, le iatrefo,

mitalahoa am’ Iehovà

am-pibangoañe miavake.

30Minevenevera ama’e ry tane toy iaby;

toe mijadoñe ty voatse toy,

tsy hasitsìtse.

31Ampiehafo o andindiñeo,

ampirebeho ty tane toy;

ampitaroño amo kilakila’ondatio te

mifehe t’Iehovà!

32Ampitroño i riakey an-kalifora’e,

ampandiao taroba i hivokey,

naho ze hene ama’e ao.

33Le hisabo an-kafaleañe añatrefa’ Iehovà o hatae añ’alao,

Ie hitotsake eo hizaka ty tane toy.

34Andriaño t’Iehovà, amy te ie ro soa;

nainai’e ty fiferenaiña’e.

35Le ano ty hoe: Rombaho zahay, ry Andrianañaharem-pandrombaha’ay,

le atontono vaho avotsoro

amo kilakila ondatio,

hañandriaña’ay i tahina’o masiñey,

hitreña’ay azo am-pandrengeañe.

36Andriañeñe t’Iehovà,

Andrianañahare’ Israele,

boak’ an-kaehae’e pake haehae añe.

hene nirihoñe ty hoe ondatio: Amène vaho nandrenge Iehovà.

37Aa le nenga’e añatrefa’ i vatam-pañina’ Iehovày t’i Asafe mirolongo, hitoroñe añatrefa’ i vatay nainai’e, amy ze fitoloñañe mañeva ty andro; 38i Ovededome naho o rahalahi’eo: enempolo-valo amby; naho i Ovede­dome ana’ Ieditone naho i Kosà ro mpañamben-dalañe; 39i Tsadoke mpisoroñe naho o rahalahi’e mpisoroñeo, añatrefa’ i kivoho’ Iehovày, an­kaboañe e Gibone eo, 40ty hisoroñe am’ Iehovà nainai’e boak’ andro naho hariva, ty amy ze hene sinokitse amy Hà’ Iehovà nandilia’e am’ Israeley; 41mpiam’ iereo t’i Hemane naho Iedotone naho o ila’e jinoboñeo, o tinoñon-tahinañeo,

hañandriañe Iehovà, fa nainai’e ty fifere­nai­ña’e;

42aa le o mindre amy Hemane naho Iedotoneo ro hampipoñake trompetra naho fikaran­tsañe naho o raha titiheñe am-pisaboañe aman’ Añahareo; le an-dalambey eo o ana’ Iedotoneo. 43Aa le songa nimpoly mb’añ’ anjomba’e mb’eo ondatio; vaho nimpoly hitata i anjomba’ey t’i Davide.