സങ്കീർത്തനങ്ങൾ 127

ശലോമോന്റെ ആരോഹണഗീതം.

1യഹോവ വീട് പണിയുന്നില്ലെങ്കിൽ,

നിർമാതാക്കളുടെ അധ്വാനം വ്യർഥം.

യഹോവ പട്ടണം കാക്കുന്നില്ലെങ്കിൽ,

കാവൽക്കാർ ഉണർന്നിരിക്കുന്നതും വ്യർഥംതന്നെ.

2നിങ്ങൾ അതിരാവിലെ എഴുന്നേൽക്കുന്നതും

വൈകി ഉറങ്ങാൻപോകുന്നതും വ്യർഥം,

ഉപജീവനാർഥം കഠിനാധ്വാനംചെയ്യുന്നതും വൃഥായത്നം.

കാരണം, യഹോവ തനിക്കു പ്രിയപ്പെട്ടവർക്ക്, അവർ ഉറങ്ങുമ്പോൾത്തന്നെ നൽകുന്നു.

3മക്കൾ യഹോവയിൽനിന്നുള്ള പൈതൃകാവകാശം.

ഉദരഫലം അവിടന്നു നൽകുന്ന പ്രതിഫലവുമാണ്.

4ഒരാൾക്കു തന്റെ യൗവനത്തിൽ പിറക്കുന്ന മക്കൾ

ഒരു യോദ്ധാവിന്റെ കൈയിലെ അസ്ത്രങ്ങൾപോലെയാണ്.

5അവരെക്കൊണ്ട് തന്റെ ആവനാഴി നിറച്ചിട്ടുള്ള

പുരുഷൻ അനുഗൃഹീതൻ.

നഗരകവാടത്തിൽവെച്ച് തങ്ങളുടെ ശത്രുക്കളുമായി ഏറ്റുമുട്ടുമ്പോൾ

അവർ ലജ്ജിതരാകുകയില്ല.