Alawi 12

Waattukuria manyaathiyana baada yo wiithaphulha

1Apwiiya Nlhuku nkayeerelha tho ashinna Musa wiira, 2“Mwaahimerieke attu o Uisraeli wiira, nthiyana arupalhaka irukulhu, nkeethapulha mwaana mwanlhopwana, khanorumelhelhiya wo iphiro cho waalhapelha Apwiiya Nlhuku, wo mahuku saba, wo ulhikaana ni mahuku anoona awe mweeri. 3Nihuku no nane, yoyo mwaana uyo eenelhiyeke unyawo. 4Yamalhakaru, anumwanawe athepeke ukhalha chiichammo wo mahuku makhumi mararu ni mararu. Yeyo ikatema iyo, ahivare mena ittu itakatifu mena ukelha vakittu vatakatifu mpaka vanohalha aya uttukuriya.

5“Nansho yakhalhaka eethaphunlhe mwaana mwanthiyana, paahi, anookhalha chiicho wo majuma meelhi thoko chirii aya vanoona aya mweeri. Athepeke ukhalha mahuku makhumi sita ni sita, amalhihaka, vavawo phi nohalha aya uttukuriya wo nlhatu no iphome aya.

6“Mahuku o uttukuriya wawe vanohalha aya utimira, ikhalhe nnyanre mwaana mwanlhopwana ama mwanthiyana, awiiheke wa opochera ishaani untenjeni u Nihema Nitakatifu, mwaakhondoro o iyaakha imoka wo nlhatu no isadaka yo upahiya ni nikhandi no ikhunda ama nchiya, wo nlhatu no isadaka yo uthamiha uwonya. 7Opochera ishaani akumiheke wa Apwiiya Nlhuku ni waapangelha yayo anaamwaana ayo ittu yo waathanihiya umihoolho wa Apwiiya Nlhuku. Wo chiichammo etu, yayo athiyana ayo anoottukuriya wo nlhatu no iphome aya. Yayo phi malheheriyo o uttwara anomwaacha nthiyana riyoothe neethaphulha mwaana mwanlhopwana ama mwanthiyana.

8“Yakhalhaka kharina mwaakhondoro o unkumiha isadaka, paahi, awiiheke machiya meelhi ama makhandi meelhi o ikhunda, nimoka wo nlhatu no isadaka yo upahiya mpaka uvia, ni nikina wo nlhatu wo isadaka yo uthamiha uwonya. Opochera ishaani aapangelheke yayo anaamwaana ayo ittu yo waathanihiya, ni ayo anoottukuriya.”