1 Mateselonika 5

Mukutukisete okwiiya kwa Mbumu

1Asingwa, kono kanyi ku tinako ni tinako no mwaka kakwisa etuso nji konji omunu aming'oleleyo. 2Abo aanyi luli mulimukile nji eliywaa lya Mbumu mba liiyi kanyi ombuyi mu usiku. 3Cwale aanu aba aamba nji, “Kame kuli ekozo ni pukelezo,” cwale kushandola mbakwiyi beulu yoo kanyi oku kola kwikalanga ku mukati ba kuleya mi kakutamba kwikala oku shotoka. 4Kono anyi abange kamuli muuwi, nji elyo liywaa limikomokise kanyi ombuyi. 5Anyi monje kame muli aanu ao ali mu liseli ni munjii, aci katukwele ku usiku simba kuuwi. 6Abo cwale tulese kulangana kanyi omo atendela aakwetu, kono tutone mane twikale aano kukulemaule. 7Kakuli ao alangana kame alangana ousiku mi ao akoliwa kame akoliwa ousiku. 8Kono kakuli aaci kame tuli aasi munji, tuikale aano ukulema, tuku mange etumelo ni lilato kanyi esisilelezo naba saali, ni kukumanga esepo no kuyoyisiwa kanyi ekuwani. 9Kakuli Nyambe ka situketa nji tu yandisiwe kuku bambaba kwaye, kono okuwana okuyoyisiwa mwa Mbumu wetu Jesu Kilesite, 10woyo ona kutufela, nji kame tuinguka simba okufa kame tufanena okuyoya naye. 11Cwale abo mu susuweze omunjili ku munjili mi mu kutuse omunjili ku munjili kanyi omo mutendela.

Etitaelo ni titumeliso no mamaneneno

12Kono abaange kame tu mikumbela nji, mukuteke ao mubeleka noo, ao amyambela eyi no kutenda mwa Mbumu, 13mane nikwatenda mu lilato no kuneneba mulibaka no musebezi woo, mwikale ni kozo mukaci kenu. 14Mi kame tumyambela aabetu, okuba emamela kwao no kububa, mususuweze ao nokwaongola emicima, mutuse ao kaatwese mi mwikale ni mucima no kutatelela kwa onyene. 15Mu mone nji kwaanyi kakwisa woyo ousa ouyi ku uyi, kono mu nako yonje musaele okutenda ouwa kwaakwenu mane nikwaanu onje.

16Mu wabelelwe enako yonje, 17mulapele mukulemenena enakao yonje, 18Mube oukutumelo mu mikwa yonje. Kakuli okusinga kwa Nyambe mwa Jesu Kilesite kwaanyi.

19Mulese kutima Emebo no kukena, 20Mulese okunyefula amang'usa no anuhi a Nyambe. 21Kono mweteke einu yonji mi mulemenene eyi no kuwaba 22mutunde kuuyi wonje.

23Cwale Nyambe no kozo yonyene amikenise mukene, cwale Emebo yenu yonje ni moyo ni lutu tiikale etino kwanyazaha aba saiye Ombumu wetu Jesu Kilesite. 24Woyo ona miisana mbaitende kakuli niwa kusepahala.

25Aakwetu mutulapeleleko,

26Muasikupumenase aakwetu onje nuu kutubeta no mebo.

27Kame ni myambela ni maata onje nji eling'olo eli libaleliwe aakwetu onje.

28Esishemo sa Mbumu wetu Jesu Kilesite siikale naanyi.