1 Tesalonika 1

Na popodalaina na leta

1Ara Paula, beto ira Silovanosi i Timote.

Na leta api sa lao tamugou na ekelesia pa Tesalonika, agou sa isongogou na Tamasa na Tamada beto na Bangara i Jisu Karisito.

Na vairoqu vaialona beto na bule mai somana tamugou.

Na Rarange beto na Toa Jongana tadira na Tinoni pa Tesalonika

2Agei sa doru totoso qe paranga jonganania tana Tamasa sa na veveimiu agou doru beto ko qeke noso gigalagou pana mei vavara sa agou doru. 3Tonai qe vavara lao tana Tamasa na Tamada sa qeke koroto roquria sira na miu roiti jongadi qu roitiniria ura qu totoravusia na Tamasa, na miu ngangali sa vuania na toa vairoqu, beto na miu turu vangaju tonai qu vera gelenia agou sa na mule lame ta noda Bangara i Jisu Karisito. 4Ka visa tavitimei jojonga, qe vagigilai agei sa na Tamasa tu sa vilegou ko na ona isa beto sa roroqugou na Tamasa sagou. 5Ura na nongoro jongana tamigei sake lame tamugou pana paranga gagale gu, goto sa lame tavitia tu na neqi vaivagabaradi, sa somanania na Gagala Tabuna beto na mei vinasosoto korina. Qu tei gigilaimiu tu agou sa ai toa veveina qe toania agei tamugou ko me tokanigou sagou qeu.

Tonai qai Tekua na Nongoro Jongana ira na Tinoni

6Ko agou qu toa tutia agou sa na toa qe toania agei beto na Bangara, ko qu gosoro talenia tu soku tapata sa na teku vakatapana na nongoro ba qu tekunia tugu pana qeqera tana Gagala Tabuna. 7Ko agou sa kai dodoro tutina tadira doru tinoni rarange pa Masidonia beto pa pikata gugusu pa Akaia. 8Ko na nongorona na Bangara sa sa koko lame vei tamugou ko sa lao nake tadira pa Masidonia beto ko pa Akaia gu, goto na miu rangena na Tamasa sa sa tanongoro doru eqa. Ko kepore mule sa kai sava mene boka pojai sa agei. 9Ura ira na tinoni mekadi qai vavakatonia sa na veveimiu agou qu vakamu vatatalegei tonai qe lame tamugou, beto na veveimiu agou qu balinga loa paleria sira na tamasa sesekedi ko qu nabulunia gu sa na Tamasa sosotona beto na toana 10beto qu kukuli verania na lagerena pa noka sa na Tuna, i Jisu isa sa tavaturu mule pa mate, ko isa sa mina alogita pana kokora manginina tana Tamasa sa korapa lalameona.