Luke 5

Yish esabok bieentsh ba bukoos mbel

(Mataay 4.18-22; Maak 1.16-20)

11

Lasu liek’dj, Yish ambaak ayeem a nkol mu idiph i Genesaleet, twoong a bât kayooliin akolaan ikaam iwok dweey di Ntshièm. 2Kamonaan maat maphey a nkol mu idiph, ek babwek ba maloph bambaak baman akoph, besakutul mat mabaan. 3Yish kabanaan a bwaat bumotsh, bubol Simoon, kanwoosaan ane, sem’s bwaat kakieek kaany i nkol idiph. Yish kashim’kaan a ngat a bwaat, katetshaan ashaang’l lashaang a bos bu twoong a bât.

4Amansaan mbok atwoot, kalwoosaan Simoon ane: “Sem’s bwaat a ndieeng maas matadj, ween i bât baa, bokanyeeny mat, ikaam iyaat swey.” 52

Simoon kakal’laan ane: “Ntaang’dj, tamayaat ngun munoon’l butu bukim, aaph ayaat iket mbè imotsh mbi. Ek, a dweey diaa, nabokabok kamotsh mat.” 63Ambok baan mat a idiph, kayaat baan swey ibwiik, i mat katetsh maan ambaantsh. 7Ngwoon, kabok baan bambey ba baan bambaak a bwaat bwek’dj mbel i mio ikaam i mbè bibayaas. Baku kiy baan, nkim mubaan, kayoos baan maat mpween mu maan, maat kanaph maan akit a maas. 8Simoon Petelo amonaan dweey diku, kaswom’taan a shin a bos bu Yish katwootaan ane: “Kum to akolieem, ikaam i mbè nde mwoot ambey!”

9Simoon i bakim bambaakaan i baan, kakam’l baan, ikaam i bwik bu swey imbaak baan bayaat. 10Mbok mintshiin ambaak bakidj babol Simoon, Shaak baan’i Yoon, bân babol Sebedey. Ek Yish kalwoosaan Simoon ane: “Kwaal’k i butet mbi; atetsh to lwool, bât belween ayaat.” 11Ntshiin, kakuutsh baan maat mabaan a nkwootsh mu idiph, kaswool baan bikim bimbaak baan’i biin ikaam ilaph Yish.

Yish esabo muna badj

(Mataay 8.1-4; Maak 1.40-45)

12Ambaak Yish a bol bwek’dj bumotsh, mwoot kiyaan i bwaal bu badj latok lakim. Amonaan Yish, kabwakaan a mateemaan bos aphum’l a shin, kamwoongaan ane: “Kum, mbè umuk, ukwok’dj antey bwaal!”

13Yish kashem’laan lo laan, kamwam’laan esatwoot ane: “Ndalwoong, wok busek!” Phweet akun mintshiin, bwaal kashil buun. 144A mbis akun Yish kankinyaan ane: “Kulwoos’k mwoot mbè motsh mbi; ek yaak abol ntwootsh, kamotsh ween i naam mutwotsh’dj Moos, ikaam ilak mbè wanwook busek.” 15Ek nswoos mu Yish mumatshiak’dj bwiik; suk itaang imbaak bât bakwoom’k ikaam imwom’k kamotsh ikaam ibabo maal mabaan. 16Ek Yish kieenaan a yik’l a mambet maaph bât ikaam ilwoom Ntshièm.

Yish esabo mwoot a alieeng’l

(Mataay 9.1-8; Maak 2.1-12)

17Lasu liek’dj Yish ambaak esashaang’l lashaang. Baphal’s baan’i bayeeph mikieetsh bambaak bashik aphiing a baan; bambaak baanyiy bakim to mal makim ma Ngaleel akol ma ma Yudey baan’i Yelushalem. Bunoon’l bu Kum bumbaak i Yish, buun bumbaak busabow bât bambaak’i maal. 18Baluung biek’dj katwool baan i mwoot alieeng’l abetsh a ikal’baatsh; bambaak besaswoot mbokamwing’s a mbûl ikaam imbey a bos bu Yish. 19Mbok aku mbè kabamon bwaany bumwing’s ikaam i twoong a bât. Kabaan baan a dik di ntwoon mu shaam, kasok’l baan mbuus, kamwing’s baan to dik, i ilakiaan aphiing a bât, a bos bu Yish. 20Yish amwonyaan yim’s i baan, kalwosaan mbieel ane: “Nkidieem, bweph bwaa, bwashil.”

21Bayeeph mikieetsh i baphal’s katetsh baan abok lakeny ane: “Mwoot key aku esatwoon Ntshièm mishing ngo? Nyeeny akwok’dj adim’s bweph bu mwoot, mbè ka Ntshièm anamieet!” 22Yish kayeephaan lakeny labaan, kabawuulaan ane: “Busabok keny idik di mwooy mango ikaam i yey? 23Bi bwool ikaam itwoot mbè ane: ‘Bweph bwaa, bwashil’, aal’k ikaam itwoot ane: ‘Kat a shin yaake?’ 24Ek ndedi i nyiing mbè buyeeph ane: Mwân a Mwoot edi bukum bu dim’s bweph bu mwoot a shin itaang!” Ngwoon, kalwoosaan mbieel ane: “Ndesalwoos ane, kat a shin, tol ikal’baatshaa, kal a bol bwaa!” 25Phweet akun mintshiin, mbieel kayeem’taan a bos bu bât bakim, katolaan ikal’baatshaan, kieenaan esiesem’l Ntshièm.

26Nkim mubaan bambaak besakam’l. Kasem’l baan Ntshièm i nshaas, besatwoot ane: “Alwool taamon mwooy ma makam’l!”

Yish esabok Lewi mbel

(Mataay 9.9-13; Maak 2.13-17)

27A mbis akun, Yish antowaan, kamonaan nkweek minaam, diin diaan Lewi, ashik a imbetiaan i ngun. Yish kanwoosaan ane: “Ya windeph.” 28Lewi iyaan kakataan, kaswoolaan biket bikim, kanaphaan.

29A mbis akun, Lewi kalam’saan Yish bi bidia bibwiik a mbûlaan; bakweek minaam babwiik akol bât biek’dj bambaak besadia ibaan a meens. 305Ek baphal’s i bayeeph mikietsh bambaak a yaas ibaan, bambaak bes’diwuus ane: “Busadia kamotsh busony i bakweek minaam baan’i bât babey ikaam i yey?”

31Yish kabakal’laan ane: “Bât bedi bunoon’l bu latok kabaaph i nyiing a mwoot ikaam i bow mbi, ek ba bedi maal baan bediaan i nyiing. 32Kandiidj ikaam i mbè bât basek bakal’l mitem mibaan mbi, ek namwiy ikaam i bât babey bakal’l mitem mibaan.”

Dweey disalieen bikin

(Mataay 9.14-17; Maak 2.18-22)

33Bât biek’dj Kalwoos baan Yish ane: “Bieentsh ba Yoon Mubatiis mbok mintshiin i bieentsh biit, bamwaak bankin bi bidia, banwoom kamotsh Ntshièm phweet ibwiik, ek bieentsh baa, baan besaal bandia kamotsh banyiow.”

34Yish kabakal’laan ane: “Busaphis ane bukwook’dj akiny bakidj ba nwim a ngaat bi bidia bi nshaas, mbè yaaph nwim elaphiing a baane? Mbikwook! 35Ek matu mayekayeem’l mel’baan atey nwim akol a baan; a matu makun bakikakin bi bidia.”

36Yish kababok’saan nkwoon ane: “Mwoot kakwok’dj abaan yees’l i ndel mu ngaang ikaam imutum i ndel mwaman anun mbi; mbè bukal ndel mu ngaang mukabantsh, i yees’l ingaang kayinaal yaphwaans i ndel mwanun mbi. 37Mwoot mbè motsh kakwook’dj abok maan ma ngaang a ngat a inun i ngieem mbi, mbè bukal maan ma ngaang mel’kabaan ngieem, mantshaak’dj a shin. 38Ek maan ma ngaang bamak matshik a ngieem mu ngaang! 39Kamotsh mwoot kaaph i nyiing’a maan ma ngaang ambis mbè amanony maan ma kodj mbi, ikaam batokatwoot ambis akun ane: ‘Maan ma kodj mephiim.”