KUBA PROJECT BIBLE TRANSLATION
Luke 14
Yish esabow mwoot awuul lakok
Lasu la Nsabat, Yish kieenaan a mbûl a kum motsh a baphal’s ikaam idia. Bât bambaak andaan, bambaak besalieen Yish pholoo. Imbabaak mwoot i lakok lawuul, ayeem a bos bwaan, Yish katetshaan atwoot, esawuul bayeeph mikieetsh akol baphal’s ane: “Mikieetsh miit mikwook’dj ayim’s mbè babo mwoot lasu la Nsabate?” Ek kashaal baan phol. Ngwoon, Yish kawaam’laan mbieel, kambowaan ambis akun, kantomaan. 1
Iphontshi kanephaan balwoos ane: “Mbè motsh aphiingiin aal i mwân a nuung aal’k ngweem abwaak a mbieem a maas, kelantey bwaas a bwaas, aal’k mbè lasu la Nsabate?”
Kabamon mbok ankal’l Kum mbi.
Adikum’s akol anyey bât
Yish amamon mbokambaak bât besaswoot mambet masek. Kababok’saan nkwoon ane: 2“Mbè mwoot abok mbel a iliees i bulaatsh, kutwoos’k a imbet isek mbi. Ikaam, akwook’diaal abok mwoot aalek ween bunen mbel, i wey akun amabubok mbel mpween mwiin aneph ilwoos ween ane: ‘Kat a shin sek mwoot aku yaak wetwoos a mbis bakim.’ Ngwoon ul’kaal i busony ikaamietwoos a mbis bakim. Ek mbè bukal, mbè babok mbel, yaak wetwoos a imbet ikieek, ikaam andaan itaang eliy mwoot, amabok mbel, amalwoos ane: ‘Mbeyeem, twoos a iphaat inen.’ Ul’kaal nshaas a miish ma bât belween i baan a meens. 3 Ntshiin, mwoot es’dibaans, bel’kankum’s, i mwoot es’dikum’s bel’kambaans.”
Iphontshi Yish amalwoos mwoot ambaak baan babok mbel ane: “Itaang isween ayeek bât iket idia mwaany aal’k i ikwook’l, kubok’k bananyo akol babotsh baa mbel mbi, mbè bakidj baa, mbè badiy bel akolaa mbi; ikaam i mbè kababok’k iween mbel lasu liek’dj lamotsh mbi. Ek esween ayeek bât bishim bi nshaas, bok ben a ntaan mbel, bitwim, bât ba bukal baan’i bât bawa miish; wel’kaal i nshaas, ikaam baan kabakwook’dj akas ibiin mbi. Ntshièm akakakas itaang ilabuum bât basek.”
Nkwoon mu iliees inen
(Mataay 22.1-10)
Aman baan awok mwooy makun, mwoot motsh ambaak i baan a meens kalwoosaan Yish ane: “Bwees bwaal i mwoot eladia ilieesiaan a bunyim bu Ntshièm!”
Yish kambok’saan nkwoon muku: “Mwoot ambaak alaam ilieesiaan inen, kabekaan bât babwiik mbel. A itaang idia iliees, katomaan mun ngunaan ikaam ibok bât babok’diaan mbel: ‘Yanyeeny, ikaam iliees yatwool akolakol!’ Ek nkim mubaan, mun mwoot nkim, katetsh baan asek. Mwoot a bukoos kalwoosaan mun ngun ane: ‘Namaswoom ngwoon, bi busek mbè ndie ilieen; ndes’kawoong mpwok’s mweeng.’ Iyek’dj kanwosaan ane: ‘Namaswoom mashin mieem ma balwim ba ngweem mataan, ndel’kamanieen ikaam imakieek; ndes’kawoong mpwok’s mweeng.’ Iyek’dj kamotsh kanwosaan ane: ‘Ndes’kitweem ngaat iphontshi, ntshiin mbè kandelamon bwaany bwiy mbi.’
“Mun a ngun kakalaan abol kumaan kanwoosaan mbok ankal’l baan. Kum a mbûl kawokaan kaph, kalwoosaan mun a ngunaan ane: ‘Yaak bwaas a mandiy baan i mioong’l mi bol, yalaatsh ben a ntaan, bitwiim, bât ba bukal baan’i bât bawa miish akol ba besabwootsh.’ A mbis itaang, mun a ngun kiyaan itwoot ane: ‘Kum, mayeedj mikieetsh miaa, ek yaaph imbet ilangat.’ Kum kanephaan alwoos mun a ngunaan ane: ‘Yaak a mbok i bol, a mikol mi ntshiaan, kasaneeng dweey ikaam bât baying’l kamotsh, ikaam i mbè mbûlieem iyool. Ndes’bulwoos ane, kwa mwoot mbè motsh a bât babok’dj baan mbel, kabeladia iliesieem mbi!’”
Mikieetsh misek ikaamiaal mweentsh
(Mataay 10.37-38)
Lasu liek’dj, twoong a bât imbaakieyeentsh i Yish a mbok. Kakaph’diaan, es’balwoos ane: 4 “Mwoot aku nkim eliy abol bweem edi dweey diampuk miim bialek ishanaan, inanaan, mwam’shaan, bân baan, babinaan, aal’k mwoony mwaan. Mbè bukal, kenaal muntsheem mbi. 5 Mwoot akun nkim esabel mbokasheetsh ntey mwaan mu kek ikaam indaph miim, kenaal mwentsheem mbi.
“Mbè mwoot a ndieengiin aal i nyiing aphik mbûl, amwaak aman alieen bwiik bu phas ikaam imaans ngun. A mbokieek’dj, mbè atetsh aphik mbûl aaph phas imaans ngun, bakim el’baan amon ngwoon bekatetsh ansey. Bietwootsh ane: ‘Lienanyeeny mwoot aku amanatetsh aphik mbûl, ek kaneph’dj amaans ngun mbi!’
“Mbok mintshiin, mbè kum anaphieen bos ituum i kumieek’dj, amwaak aman ashim’k ashin ikaam ilieen mbè ane, mbè ndaal’i mayol sen’l ishieeng, akwook’dj amanaan i mpisaan edi mayol sen’l mashaphey. Mbè kaaph i ngon, antom batom abol kumieek’dj, mbè yaaph e kaany, ikaam imuul mikieetsh miaan mi nkit’l. Ntshiin akun, Yish kakasaan atwoot ane: “Mwoot mbè motsh andieengiin kakwook’dj ashaal mweentshieem, mbè kesamuk alieem’l biket biaan bikim.
Ngèl mwatwiph
(Mataay 5.13; Maak 9.50)
“Ngèl iket isek. Ek mbè mutwiph, telakel mbony ikaam i mbè mukasaal i phia. Ngwoon kamwabusek ikaam i shin aal’k ikaam i ngwoon mbi, bel’kamuphul a bwaany. Tak wey edi mato ikaam iwok, awek!”
Source notes (5)
- Cross-reference Mt 12.11.
- Cross-reference Mik 25.6-7.
- Cross-reference Mt 23.12; Lk 18.14.
- Cross-reference Mt 10.37.
- Cross-reference Mt 10.38; 16.24; Mak 8.34; Lk 9.23.
KUBA PROJECT BIBLE TRANSLATION. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.