Skip to content
BibleKenya

KUBA PROJECT BIBLE TRANSLATION

Luke 1

Nsekieem Teophil: Bât babwiik katetsh baan aphuun mikaan mi mwooy makun mambaak makeph’t aphingiit. Mbok mintshiin atalwoos’dj baan abol bitieen bât ba bukoos to matetetsh, bamwiphil ben a ngun mu dweey di Ntshièm. Ntshiin akun, namabok lakeny a ntem, aman miim awuul mwooy makun to matetetsh, kabok miim lakeny ikaam iphuuns i maan a bulodj, ween kum Teophil, ikaam i mbè uyeeph ane, mwooy malwoos’dj baan ma makwook.

Lashaang la mibotsh’dj mi Yoon-Mubatiis

Itaang imbaak Helood kum a Yudey, ambabaak ntwootsh a Ntshièm a diin di Sakaliy, ambaak akat nsel mu Abiy. Diin diku disalak shin mikim a Palesitine. Mwam’shaan, Elisabeet ambaak ntshwakaan abol Aloon. Mpween mubaan bambaak bât basek a miish ma Ntshièm, bambaak bamwoom’k i itshiiny mikiètsh mikim baan’i mwooy ma ikin ma Kum. Ek kabambaak i mwân mbi, ikaam Elisabet ambaak ikut, kamotsh mpween mubaan bambaak baman anun.

Lasu liek’dj, Sakaliy ambaakaan esakel ngun mwaan mu butwootsh a miish ma Ntshièm, ikaam i mbè ambaak phweet a baan akel ngun a nsel mwaan. Mbok mintshiin ambaak ikelel i batwootsh banen, aan bambaak bansol a mpwim ikaam iying’l a Ntuum mu Kum ikaam ituum ibel, itaang ituum ibel anyem’liin, twoong mikim a bât imbaak isalwoom Ntshièm a mbis buseph bu mbûl a Ntshièm. Imbet intshiin, ntshol a Ntshièm kasolaan a bol Sakaliy ayeem a lo la ikat la ituum’l i ibel. Sakaliy amonaan ntshol, butet bumangaat. Ek ntshol kanwoosaan ane: “Sakaliy, kutshin’k mbi, ikaam Ntshièm awok ilwoomiaa, mwam’sha Elisabet ayekayeek mwân. Umwekamweek diin di Yoon. Ween ukaal i nshaas mubwiik mwalek’s idik diaan, kamotsh bât babwiik bekaal i nshaas a mibotsh’dj miaan. 1Ikaam, aan el’kaal mwoot anen a miish ma Kum. Kelanyo maan aal’k biket bikim bisayaat. El’kaal ayool to i Mween musek a bos bu mbè inanaan kataadj ambot, aan el’kalaat mitem mi bân ba Isaleel babwiik abol Kum, Ntshièm a baan. 2Aan el’kieen a bos bu Kum i mween baan’i bunoon’l bi Eliy, ikaam itshik a motsh bataat akol bân, kamotsh akakakal’l mitem mi ben a bwoom’dj ikaam i mbè baal i bwaany bu bât basek; ikaam ilos Kum bât bel akolakol ikaam inyey.”

Sakaliy kawulaan ntshol ane: “Dweey diku nadiyeeph mbony? Miim nde inun, mwam’sheem anaang bwiik.” 3

Ntshol kankal’laan ane. “Nde Gabiliyel, namwaak a bos bu Ntshièm, amakantom ikaam itwootiaa kamotsh ashaang’s lashaang laku lasek. Wok, ween ulashaal kil, kulamon mbokatwoot mbi shaang lasu lelayeem’l mwooy maku, ikaam i mbè ween kuyim’sdj mwooy mieem mbi.” Bât bambaak besakwoong Sakaliy a buseph; kakam’l baan ikaam i mbè aan, amaman suw ibwik a ngat a Ntuum mu Ntshièm. Antowaan, kamon mbokatwoot’i baan mbi. Kayeeph baan ane, amamon dweey di makam’l a mbûl a Ntshièm. Ikaam ambaak esatwoot i mio miaan, kashalaan kil.

Ambaakaan aman matu maan ma ngun a Ntuum, kakalaan a mbûlaan. Mataang makieek ambis akun, mwam’shaan Elisabet kiyaan dieem, aan kadisweyaan a ndieeng a ngwôn itaan, katwootaan ane: “Lieenanyeeny busek bumankes Kum.” “Amuk antey bukut bumbaakankel busony a ndieeng a bât!”

Ntshol esashaang’l mibotsh’dj mi Yish

A ngwôn ishaam’l i dieem di Elisabet, Ntshièm katomaan ntshol Gabliel a bol bumotsh bu Ngaleel akat Nazaleet. 4Abol ilieeng’i ngaat i mbè kayitshik ayeeph nuung imbaak yeek’l ibol Yosef, ntshwakaan abol Davidj. Diin di ilieeng a ngaat i mbè kayitshik ayeeph nuung akun ambaak Maliy. Ntshol kiying’laan a bol Maliy, kanwoosaan ane: “Maliy wanum, nkit’l mwaliaa! Mweeng mu Ntshièm mwaaliaa; Kum ediaa!”

Ek lakeny kadiim luun Maliy ikaam i nkieetsh muku, kadiwuusaan ane yum’l iku isalak key. Ek ntshol kanwoosaan ane: “Maliy kutshiin’k mbi, ikaam mweeng mu Ntshièm mudiaa.” 5Ween ukaal i dieem, ukabot mwân a nuung, Umwekamweek diin di Yish. 6El’kaal mwoot anen. Bambokambok mbel ane: “Mwân abol Kum a dik, Kum Ntshièm amwekamweek bunyim bu ishanaan Davidj, el’kaal kum a yoyoo a ben’a Isaleel, bukum bwaan kabulaal i mom mbi.”

Maliy kawuulaan ntshol ane: “Dweey diku dilayeem’l mbony, ikaam i mbè miim yaaph nde ilieeng’i ngaat i mbè kayitshik ayeeph nuung?”

Ntshol amankal’l ane: “Mween musek mukakum a dik diaa, bunoon’l bu Ntshièm bukaal’iaa mun ilwimalwim. Ngwoon, mwân elween abot, bambokambok mbel mwân a Ntshièm. Lieen, Elisabet mwanyo, iyaan edi dieem di mwân a nuung a bunun bwaan; aan ambaak baan abok mbel ane ikut, ek ngwôn aku wey, iyaan anshaam’l a dieem. 7Ikaam’i mbè, kwa dweey mbè dimotsh dinek Ntshièm bunoon’l mbi.” Iphontshi Maliy kankal’laan ane: “Nde nso abol Kum”, “Bikim bikeph’t mbok antwootween.” A mbis akun Ntshol kanswoolaan, kieenaan.

Maliy anyetaan Elisabet

A mbis matu makieek, Maliy kakataan kieenaan bwaas a bol bu mikwootsh bu Yudey. Kayiing’laan a mbûl abol Sakaliy, kawuum’laan Elisabet. Awok’dj Elisabet yum’l ibol Maliy, i mwân kanying’laan a ngat ikuuniaan. I Elisabet kayolaan tô i Mween Musek kabolaan nwool, esatwoot ane: “Ween u ngaat ashaak’s aphiing a baat bakim, i mwân el ikuuniaa wey ashaak’s iyaan! Ek nde nyeeny ikaam i mbè inaan abol Kumieem indieen? Ikaam’i mbè itaang imwook miim yum’liaa a mato mieem, mwân amatoph i nshaas mubwiik a ikuunieem. Nshaas mwaal i mwoot akun amwim’s, ikaam i mbè mwooy makim malwoos’dj baan abol Kum mayekayeem’l!”

Lieem lasem’l la Maliy

8

Maliy katwootaan ane:

“Ntem mweem musasem’l Kum;

ntem mweem mudi nshaas a Ntshièm, mwoot amaphaans, 9

ikaam i mbè amuk alieen i mun a ngunaan i nkit’l.

Ntshiin mbè, atetsh to lwool mabotsh makim mambokambok mbel ane udi iteem isek,

ikaam i mbè Ntshièm a bunoon’l bukim ankes mwooy manen.

Diin diaan di di ikin;

mweeng mwaan mul’kaal a mabotsh ma bât

bakim besatshiin bukum bwaan.

Amaakel mwooy manen i lo laan la bunoon’l;

amatshaak’dj bât bambaak adiwoot i keny ibey imbaak a mitem mibaan. 10

Amakum’s bakun bambaak a buum,

ek amabaans bât bambaak i nkit’l.

Bât bambaak’i ntshal, amabadiees biket bisek;

ek ben budiy amabakas mio bwaang.

Amayaas mwootaan Isaleel,

kamotsh amayiph’l mweeng mwaan bos a bât besankes ngun, 11

mbok ambaakaan akel ilak i imuk abol mamiit, Abalapham

i bân baan yoyoo!”

Maliy amaatwoos i Elisabet phot’a ngwôn iset, ambis akun kakalaan a mbûlaan.

Mibot’dj mi Yoon Mubatiis

Ngwôn ibol Elisabet kayeem’liin ikaam ibot mwân, kabotaan mwân a nuung. Bambaak akolaan i ben ilwootshaan anyeeph baan ane, Kum alak mweeng idik diaan, kawook baaniaan nshaas. 12

Lasu la inaan, kiy baan ikaam ikel mwân nkaan, bambaak i nyiing amweek diin di Sakaliy, muna ndwey ishanaan. Ek inanaan kakal’laan ane: “Mbi, diin diaan Yoon.”

Bamanwoos ane: “Kwa mwoot a ilwootshiin edi diin diku mbi!” Kawuul baan ishanaan a bisam ane, usamuk bamweek diin key.

Sakaliy kalwoomaan dibey ikaam iphuun diin, kaphuunaan ane: “Diin diaan Yoon.” I nkimubaan bamakam’l! Itaang ikun intshiin, inem ibol Sakaliy katungiin, katetshaan atwoot kamotsh kasem’laan Ntshièm a ngon. Butet kayaat buun bât bakim bambaak akol a baan; mwooy maku makim bambaak bes’matwoot a mal makim ma mikwootsh mi Yudey. Bât bakim bawok’dj mwooy makun, katetsh baan adiwuus ane: “Mwân aku elaphil nyeeny?” Ikaam’i mbè bunoon’l bu Kum bumbabaakiaan.

Lieem lasem’l la Sakaliy

Sakaliy ishaan abol a Yoon, kayolaan i Mween Musek, katetshaan atwoot mwooy ma bungaang bu Ntshièm ane:

“Basem’l Kum, Ntshièm a Isaleel.

Ikaam anyiyaas bât baan, abaphaans kamotsh.

Aan amanyitalaas kum anoon’l ikaam itaphaans biit

bân ba kum Davidj, nsowaan.

Mbok atwootsh’diaan a muny mu bangaang ba ikin ba to kaany

ambaak atayeek ilak ane:

el’katashaang’l a mio mi baphis biit akol bât bes’tabim’l.

Amaalak bamaam biit mweeng mwaan,

kayiph’laan malak maan ma ikin.

Mbok mintshiin ambaakaan akel kot i mamiit Abalapham,

ane, el’kataphaans a mio mi baphis biit

ikaam inkes ngun i ntem ngon,

ikaamieen a bos bwaan a bulodj baan’i ikin

matu miit makim ma mwoony. 13

“I ween mwânieem, babokabok mbel ane, ngaang a Ntshièm abol Ntshièm anen a dik.

Ikaam ween ukatieel a bos bu Kum

ikaam ilodj mbokiaan,

ikaam ishaang’s bât baan lashaang ane Ntshièm ntshaan esaphaans bât,

ankas bawok’s mweeng to mbi a bweph bu baan,

Ikaam’i mbè Ntshièmiit edi mweeng mubwiik.

Esaal angaam’s a dik diit mwany mu to dik mwaphwaans i itaang i ntshees butu 14

ikaam ingaam’s bât bel a mwim’l akol ba bel a shin ilwimalwim i iwa,

ikaam ilaat ma teemiit a mbok edi nkit’l.”

Mwân ambaak esienaang, i mween mwaan kanaang muun. Ambaak esatwoos a mandiy maaph bât shaang lasu lambaakaan asol a yol’l abol bât ba Isaleel.

Source notes (14)
  1. Cross-reference Nb 6.3.
  2. Cross-reference Mak 4.5-6.
  3. Cross-reference Dan 8.16; 9.21.
  4. Cross-reference Mt 1.18.
  5. Cross-reference Mt 1.21.
  6. Cross-reference 2 Sam 7.12; 13.16; Yesh 9.7.
  7. Cross-reference Matt 18.14.
  8. Cross-reference 1 Sam 2.1-10.
  9. Cross-reference 1 Sam 1.11.
  10. Cross-reference Yob 5.11; 12.19.
  11. Cross-reference Matt 17.7.
  12. Cross-reference Lew 12.3.
  13. Cross-reference Mal 3.1.
  14. Cross-reference Yesh 9.2.

KUBA PROJECT BIBLE TRANSLATION. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.