Lodhi Bible
गिनती 29
तुरहियों को त्यौहार की भेंट
(लैव्यव्यवस्था २३:२३-२५)
“फिर सातवों महीना को पहिलो दिन ख तुम्हरी पवित्र सभा होयेंन; ओको म मेहनत को कोयी काम मत करो। ऊ तुम्हरो लायी जय जयकार को नरसिंगा फूकन को दिन ठहरयो हय; तुम होमबलि चढ़ावो, जेको सी परमेश्वर लायी सुखदायक सुगन्ध होयेंन; मतलब एक बछड़ा, एक मेंढा, अऊर एक एक साल को सात निर्दोष मेंढी को नर बच्चा; अऊर उन्को अन्नभेट जैतून को तेल सी सान्यो हुयो होना; मतलब बछड़ा को संग एपा को तीन दसवों अंश अच्छो चुन, अऊर मेंढा को संग एपा को दोय दसवों अंश अच्छो चुन चढ़ावो, अऊर सातों मेंढी को बच्चां म सी एक एक बच्चा को संग एपा को दसवों अंश अच्छो चुन चढ़ावो। अऊर एक बकरा भी पापबलि कर क् चढ़ावो, जेको सी तुम्हरो लायी पाप झाक्यो जायेंन। महीना को पहिलो दिन नयो चन्दा को होमबलि को संग अन्नभेट, अऊर हर दिन की होमबलि ख अन्नभेट अऊर पेयबलि समेत नियम को अनुसार चढ़ावो सुखदायक सुगन्ध देन वालो परमेश्वर ख बलि कर क् चढ़ावो।
पश्चाताप लायी भेंट
(लैव्यव्यवस्था २३:२६-३२)
“फिर उच सातवों महीना को दसवों दिन ख तुम्हरी पवित्र सभा होयेंन; तुम अपनो अपनो जीव ख उपवास को द्वारा पीड़ित करो, अऊर कोयी तरह को काम काज मत करो, अऊर परमेश्वर लायी सुखदायक सुगन्ध देन लायी होमबलि; मतलब एक बछड़ा , एक मेंढा, अऊर एक एक साल को सात मेंढी को नर बच्चा चढ़ावो; हि सब निर्दोष होना; अऊर उन्को अन्नभेट जैतून को तेल सी सान्यो हुयो अच्छो चुन को होना; मतलब बछड़ा को संग तीन किलो अच्छो चुन, अऊर मेंढा को संग दोय किलो अच्छो चुन होना, अऊर सातों मेंढी को बच्चां म सी एक एक बच्चा लायी एक एक किलो अच्छो चुन चढ़ावो। अऊर पापबलि लायी एक बकरा भी चढ़ावो; अऊर लोगों ख प्रायश्चित करन लायी चढ़ायो गयो बकरा ख अऊर अन्नभेट अऊर पेयबलि समेत निजी होमबलि लायी चढ़ावो।
झोपड़ियों को त्यौहार की भेंट
(लैव्यव्यवस्था २३:३३-४४)
“तब सातवों महीना को पन्द्रावों दिन ख तुम्हरी पवित्र सभा हो; अऊर ओको म मेहनत को कोयी काम मत करो, अऊर सात दिन तक यहोवा लायी पर्व मनावो; तुम होमबलि परमेश्वर ख सुखदायक सुगन्ध देन लायी बलि कर क् चढ़ावो; मतलब तेरा बछड़ा, अऊर दोय मेंढा, अऊर एक एक साल को चौदा मेंढी को नर बच्चा; हि सब निर्दोष होना; अऊर उन्को अन्नभेट जैतून को तेल सी सान्यो हुयो मैदा को होना; मतलब तेरा बछड़ा म सी एक एक बछड़ा लायी तीन किलो अच्छो चुन, अऊर दोयी मेंढा म सी एक एक मेंढा लायी दोय किलो मैदा होना, अऊर चौदा मेंढी को बच्चां म सी एक बच्चा लायी एक किलो अच्छो चुन चढ़ावो। अऊर पापबलि लायी एक बकरा भी चढ़ावो; या हमेशा की होमबलि अऊर ओको अन्नभेट अऊर पेयबलि को अलावा चढ़ायो जाये।
“फिर दूसरो दिन बारा बछड़ा, अऊर दोय मेंढा, अऊर एक एक साल को चौदा निर्दोष मेंढी को नर बच्चा चढ़ावो; अऊर बछड़ा, अऊर मेंढा, अऊर मेंढी को बच्चां को संग उन्की अन्नभेट अऊर पेयबलि, उन्की गिनती को अनुसार, अऊर नियम को अनुसार चढ़ावो। अऊर पापबलि लायी एक बकरा भी चढ़ावो; या हमेशा की होमबलि अऊर ओको अन्नभेट अऊर पेयबलि को अलावा चढ़ायो जाये।
“फिर तीसरो दिन ग्यारा बछड़ा, अऊर दोय मेंढा, अऊर एक एक साल को चौदा निर्दोष मेंढी को नर बच्चा चढ़ावो; अऊर बछड़ा, अऊर मेंढा, अऊर मेंढी को बच्चां को संग उन्की अन्नभेट अऊर पेयबलि, उन्की गिनती को अनुसार, अऊर नियम को अनुसार चढ़ावो। अऊर पापबलि लायी एक बकरा भी चढ़ावो; या हमेशा की होमबलि अऊर उन्को अन्नभेट अऊर पेयबलि को अलावा चढ़ायो जाये।
“फिर चौथो दिन दस बछड़ा, अऊर दोय मेंढा, अऊर एक एक साल को चौदा निर्दोष मेंढी को नर बच्चा चढ़ावो; बछड़ा, अऊर मेंढा, अऊर मेंढी को बच्चां को संग उन्को अन्नभेट अऊर पेयबलि, उन्की गिनती को अनुसार, अऊर नियम को अनुसार चढ़ावो। अऊर पापबलि लायी एक बकरा भी चढ़ावो; या हमेशा की होमबलि अऊर ओको अन्नभेट अऊर पेयबलि को अलावा चढ़ायो जाये।
“फिर पाचवों दिन नव बछड़ा, दोय मेंढा, अऊर एक एक साल को चौदा निर्दोष मेंढी को नर बच्चा चढ़ावो; अऊर बछड़ा, मेंढा, अऊर मेंढी को बच्चां को संग उन्को अन्नभेट अऊर पेयबलि, उन्की गिनती को अनुसार, अऊर नियम को अनुसार चढ़ावो। अऊर पापबलि लायी एक बकरा भी चढ़ावो; या हमेशा की होमबलि अऊर ओको अन्नभेट अऊर पेयबलि को अलावा चढ़ायो जाये।
“फिर छटवों दिन आठ बछड़ा, अऊर दोय मेंढा, अऊर एक एक साल को चौदा निर्दोष मेंढी को नर बच्चा चढ़ावो; अऊर बछड़ा, अऊर मेंढा, अऊर मेंढी को बच्चां को संग उन्को अन्नभेट अऊर पेयबलि, उन्की गिनती को अनुसार, अऊर नियम को अनुसार चढ़ावो। अऊर पापबलि लायी एक बकरा भी चढ़ावो; या हमेशा की होमबलि अऊर ओको अन्नभेट अऊर पेयबलि को अलावा चढ़ायो जाये।
“फिर सातवों दिन सात बछड़ा, अऊर दोय मेंढा, अऊर एक एक साल को चौदा निर्दोष मेंढी को नर बच्चा चढ़ावो; अऊर बछड़ा, अऊर मेंढा अऊर मेंढी को बच्चां को संग उन्को अन्नभेट अऊर पेयबलि, उन्की गिनती को अनुसार, अऊर नियम को अनुसार चढ़ावो। अऊर पापबलि लायी एक बकरा भी चढ़ावो; या हमेशा की होमबलि अऊर ओको अन्नभेट अऊर पेयबलि को अलावा चढ़ायो जाये।
“फिर आठवों दिन तुम्हरी एक महासभा होयेंन; ओको म कोयी मेहनत को काम मत करो, अऊर ओको म होमबलि परमेश्वर ख सुखदायक सुगन्ध देन लायी बलि कर क् चढ़ावो; ऊ एक बछड़ा, अऊर एक मेंढा, अऊर एक एक साल को सात निर्दोष मेंढी को नर बच्चा को होना; बछड़ा, अऊर मेंढा, अऊर मेंढी को बच्चां को संग उन्को अन्नभेट अऊर पेयबलि, उन्की गिनती को अनुसार, अऊर नियम को अनुसार चढ़ावो। अऊर पापबलि लायी एक बकरा भी चढ़ावो; या हमेशा की होमबलि अऊर ओको अन्नभेट अऊर पेयबलि को अलावा चढ़ायो जाये।
“अपनी मन्नतों अऊर इच्छा बलियों को अलावा, अपनो अपनो ठहरायो समयों म, याच होमबलि, अन्नभेट, पेयबलि अऊर मेलबलि, परमेश्वर लायी चढ़ावो।”
या पूरी आज्ञा परमेश्वर न मूसा ख दी, जो ओन इस्राएलियों ख सुनायी।
Lodhi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.