गिनती 21

कनानी राजा पर विजय

1तब अराद को कनानी राजा, जो दक्षिन देश म रहत होतो, यो सुन क कि अतारीम को रस्ता सी भेद लेन वालो आयो होतो उच रस्ता सी अब इस्राएली भी आय रह्यो हंय, इस्राएल सी लड़्यो, अऊर ओको म सी कितनो ख बन्दी बनाय लियो। 2तब इस्राएलियों न परमेश्वर सी यो कह्य क मन्नत मानी, “यदि तय सचमुच उन लोगों ख हमरो वश म कर देजो, त हम उन्को नगरों को सत्यानाश कर देबो।” 3इस्राएल की या बात सुन क परमेश्वर न कनानियों ख उन्को वश म कर दियो; तब उन्न उन्को नगरों सहीत उन्को भी सत्यानाश कर डाल्यो; येकोलायी ऊ जागा को नाम होर्मा रख्यो गयो।

पीतर को सांप

4फिर उन्न होर पहाड़ी सी निकल क लाल समुन्दर को रस्ता लियो कि एदोम देश सी बाहेरच बाहेर घूम क जाये; अऊर लोगों को मन रस्ता को वजह बहुत व्याकुल भय गयो। 5येकोलायी हि परमेश्वर को खिलाफ बात करन लग्यो, अऊर मूसा सी कह्यो, “तुम लोग हम्ख मिस्र देश सी जंगल म मरन लायी कहाली लायो हय? यहां नहीं त रोटी हय, अऊर नहीं पानी हय, अऊर हमरो जीव या नीरस रोटी सी उब गयो।” 61तब परमेश्वर न उन लोगों को बीच जहरीलो सांप भेज्यो, सांप न उन्ख डस लियो, अऊर बहुत सो इस्राएली मर गयो। 7तब लोग मूसा को जवर जाय क कहन लग्यो, “हम न पाप करयो हय कहालीकि हम न परमेश्वर को अऊर तोरो खिलाफ बाते करी हय; परमेश्वर सी प्रार्थना कर कि परमेश्वर सांपो ख हम सी दूर करे।” तब मूसा न उन्को लायी प्रार्थना करी। 8परमेश्वर न मूसा सी कह्यो, “एक सांप बनाय क खम्भा पर लटकाय दे; तब जो सांप सी डस्यो हुयो आदमी ओख देख लेयेंन तब ऊ जीन्दो बच जायेंन।” 92तब मूसा न पीतर को एक सांप बनवाय क खम्भा पर लटकायो; तब सांप को डस्यो हुयो म सी जेन जेन ऊ पीतर को सांप को तरफ देख्यो ऊ जीन्दो बच गयो।

होर सी मोआब को तरफ यात्रा

10फिर इस्राएलियों न निकल क ओबोत म डेरा डाल्यो। 11अऊर ओबोत सी निकल क अबारीम नाम को खण्डरों म डेरा डाल्यो, जो पूर्व दिशा को तरफ मोआब को सामने को जंगल म हय। 12वहां सी निकल क उन्न जेरेद नाम की घाटी म डेरा डाल्यो। 13वहां सी निकल क उन्न अर्नोन नदी, को दूसरो तरफ डेरा डाल्यो जो जंगल म सी बहय अऊर एमोरियों को देश सी निकलय हय; कहालीकि अर्नोन नदी मोआबियों अऊर एमोरियों को बिच म सी होय क मोआब देश की सीमा ठहरी हय। 14यो वजह परमेश्वर की संग्राम नाम की किताब म यो तरह लिख्यो हय : “सूपा को क्षेत्र म बाहेब नगर, अऊर अर्नोन की घाटी 15अऊर उन घाटियों की ढलान जो आर नाम को नगर को तरफ हय, अऊर जो मोआब की सीमा पर हय।”

16फिर वहां सी निकल क हि बैर तक गयो; वहां उच कुंवा हय जेको बारे म परमेश्वर न मूसा सी कह्यो होतो, “उन लोगों ख जमा कर, अऊर मय पानी देऊं।” 17ऊ समय इस्राएल को लोगों न यो गीत गायो :

“हे कुंवा उमड़ आव,

ऊ कुंवा को बारे म गीत गावो!

18ऊ कुंवा हाकिमों अऊर प्रजा

को मुखियावों न खोद्यो होतो,

अऊर ओख राजदण्ड अऊर

लाठियों सी खोद्यो होतो।”

हि जंगल सी मत्ताना ख चली गयो, 19अऊर मत्ताना सी नहलीएल ख, अऊर नहलीएल सी बामोत ख गयो, 20अऊर बामोत सी निकल क वा घाटी तक जो मोआब को मैदान म हय, अऊर पिसगा को ऊ कोना तक भी जो यशीमोन को तरफ झुक्यो हय पहुंच गयो।

सीहोन अऊर ओग राजावों की पराजय

(व्यवस्थाविवरन २:२६; ३:११)

21तब इस्राएल न एमोरियों को राजा सीहोन को जवर दूतों को हाथ यो सन्देश भेज्यो, 22“हम्ख अपनो देश म सी होय क जान दे; हम मुड़ क कोयी खेत या अंगूर की बाड़ी म नहीं जाबो; अऊर नहीं कोयी कुंवा को पानी पीबो; अऊर जब तक तोरो देश सी बाहेर नहीं होय जाबो तब तक सड़क सीच चलतो जाबोंन।” 23तब भी सीहोन न इस्राएलियों ख अपनो देश सी होय क जान नहीं दियो; बल्की अपनी पूरी सेना ख जमा कर क् इस्राएल को सामना करन लायी जंगल म निकल आयो, अऊर यहस नाम को जागा म आय क ओन लड़ायी करयो। 24तब इस्राएलियों न ओख तलवार सी मार डाल्यो, अऊर अर्नोन सी यब्बोक नदी तक, जो अम्मोनियों की सीमा होती, ओको देश को अधिकारी भय गयो; अम्मोनियों की सीमा मजबूत होती। 25येकोलायी इस्राएलियों न एमोरियों को सब नगरों पर अधिकार कर लियो, अऊर उन्म, मतलब हेशबोन अऊर ओको आजु-बाजू को नगरों म रहन लग्यो। 26हेशबोन एमोरियों को राजा सीहोन को नगर होतो; ओन मोआब को पहलो राजा सी लड़ायी कर क् ओको पूरो देश अर्नोन तक ओको सी छीन लियो होतो। 27यो वजह कवि गावय हंय : “हेशबोन म आवो,

“राजा सीहोन को नगर बसे,

अऊर ऊ मजबूत करयो जाये!

28कहालीकि हेशबोन सी आगी,

मतलब सीहोन को नगर सी लौ निकली;

जेको सी मोआब देश को आर नगर,

अऊर अर्नोन को ऊंचो जागावों को स्वामी भस्म भयो।

29हे मोआब, तोरो पर धिक्कार हय!

कमोश देवता की प्रजा नाश भयी,

ओन अपनो टुरावों ख भगोड़ा,

अऊर अपनी टुरियों ख एमोरी राजा सीहोन की दासी कर दियो।

30हम न उन्ख गिराय दियो हय,

हेशबोन सी दीबोन तक नाश भय गयो हय,

अऊर हम न नोपह अऊर मेदबा तक भी उजाड़ दियो हय।”

31यो तरह इस्राएल एमोरियों को देश म रहन लग्यो। 32तब मूसा न याजेर नगर को भेद लेन ख भेज्यो; अऊर उन्न ओको गांवो पर अधिकार कर लियो, अऊर वहां को एमोरियों ख ऊ देश सी निकाल दियो।

33तब हि मुड़ क बाशान की रस्ता सी जान लग्यो; अऊर बाशान को राजा ओग न उन्को सामना करयो, मतलब लड़न लायी अपनी पूरी सेना समेत एद्रेई म निकल आयो। 34तब परमेश्वर न मूसा सी कह्यो, “ओको सी मत डर; कहालीकि मय ओख पूरी सेना अऊर देश सहीत तोरो हाथ म कर देऊ हय; अऊर जसो तय न एमोरियों को राजा हेशबोनवासी सीहोन को संग करयो हय, वसोच ओको संग भी करजो।” 35तब इस्राएलियों न ओख, अऊर ओको टुरावों अऊर पूरी प्रजा ख यहां तक मारयो कि ओको कोयी भी आदमी जीन्दो नहीं बच्यो; अऊर हि ओको देश को अधिकारी भय गयो।