यहोशू 3

इस्राएली लोग को यरदन पार करनो

1यहोशू सुबेरे उठ्यो, अऊर सब इस्राएली लोगों ख ले क शित्तीम सी निकल क यरदन नदी को किनारे आयो; अऊर हि ओन पार जान सी पहले वहांच मुक्काम करयो। 2अऊर तीन दिन को बाद सरदारों न छावनी को बीच जाय क 3प्रजा को लोगों ख या आज्ञा दी, “जब तुम्ख अपनो परमेश्वर यहोवा को वाचा को सन्दूक1 अऊर ओख उठायो हुयो लेवी याजक ख भी देख लेवो, तब अपनी जागा सी निकल क ओको पीछू चलो, 4पर ओको अऊर तुम्हरो बीच म दोय हजार हाथ को अन्तर रहे; तुम सन्दूक को जवर मत जाओ। ताकी तुम देख सको कि कौन्सो रस्ता सी तुम्ख चलनो हय, कहालीकि अब तक तुम यो रस्ता पर नहीं आयो होतो।”

5फिर यहोशू न लोगों सी कह्यो, “तुम अपनो आप ख पवित्र करो; कहालीकि कल को दिन परमेश्वर तुम्हरो बीच म अद्भूत काम करेंन।” 6तब यहोशू न याजकों सी कह्यो, “वाचा को सन्दूक उठाय क प्रजा को आगु आगु चलो।” तब हि वाचा को सन्दूक उठाय क आगु आगु चलन लग्यो।

7तब परमेश्वर न यहोशू सी कह्यो, “अज को दिन सी मय इस्राएलियों को जवर तोरी प्रशंसा करनो सुरू करूं, तब हि जान लेयेंन कि जसो मय मूसा को संग रहत होतो वसोच मय तोरो संग भी हय। 8अऊर तय वाचा को सन्दूक उठावन वालो याजकों ख या आज्ञा दे, ‘जब तुम यरदन नदी को किनार पहुंचो, तब यरदन नदी म खड़ो होय जावो।’”

9तब यहोशू न इस्राएली लोगों सी कह्यो, “जवर आय क अपनो परमेश्वर यहोवा को वचन सुनो।” 10अऊर यहोशू कहन लग्यो, “येकोसी तुम जान लेवो कि जीन्दो परमेश्वर तुम्हरो बीच म हय, अऊर ऊ तुम्हरो सामने सी कनानियों, हित्तियों, हिब्बियों परिज्जियों, गिर्गाशियों, एमोरियों, अऊर यबूसियों ख उन्को देश सी निकाल देयेंन। 11देखो, पूरी धरती पर की परमेश्वर को वाचा को सन्दूक तुम्हरो आगु आगु यरदन म जानो परच हय। 12येकोलायी अब तुम इस्राएल को गोत्रों म सी बारा आदमियों ख चुन लेवो, हि एक गोत्र म सी एक आदमी हो। 13अऊर जो समय पूरी धरती को प्रभु यहोवा की वाचा को सन्दूक उठावन वालो याजक यरदन नदी को पानी म पाय रखेंन, ऊ समय यरदन नदी को बहतो हुयो पानी रूक जायेंन, अऊर ढेर होय क ठहर जायेंन।”

14फसल को समय होतो नदी म बहुत बाढ़ होतो येकोलायी जब प्रजा को लोगों न अपनो तम्बुवों सी यरदन नदी पार जान लायी निकल्यो, अऊर याजक वाचा को सन्दूक उठायो हुयो प्रजा को आगु आगु चल्यो, 15अऊर सन्दूक ख उठावन वालो यरदन नदी पर पहुंच्यो, अऊर सन्दूक को उठावन वालो याजकों को पाय यरदन नदी को पानी म डुब गयो यरदन नदी को पानी त कटनी को समय को सब दिन अपनो तट को ऊपर ऊपर बह्यो करय हय, 16तब जो पानी ऊपर को तरफ सी बहत आवय हय ऊ बहुत दूर, मतलब आदाम नगर को जवर जो सारतान नगर को जवर रूक क एक ढेर भय गयो, अऊर दीवार जसो उठ्यो रह्यो, अऊर जो पानी अराबा को सागर जो मृत सागर भी कह्यो जावय हय, ओको तरफ बहत जात होतो, ऊ पूरो रीति सी सूख गयो; अऊर प्रजा को लोग यरीहो को सामने पार उतर गयो। 17अऊर याजक यहोवा की वाचा को सन्दूक उठायो हुयो यरदन को बीचों बीच पहुंच क जागा पर स्थिर खड़ो रह्यो, अऊर सब इस्राएली जागाच जागा पार उतरतो रह्यो, आखरी म ऊ पूरी जाति को लोग यरदन नदी पार भय गयो।