यहेजकेल 25

अम्मोन को खिलाफ भविष्यवानी

1परमेश्वर को यो वचन मोरो जवर पहुंच्यो : 2“हे आदमी की सन्तान, अम्मोनियों को तरफ मुंह कर क् उन्को बारे म भविष्यवानी कर। 3उन्को सी कह्य, हे अम्मोनियों, परमेश्वर यहोवा को वचन सुनो, परमेश्वर यहोवा यो कह्य हय कि तुम न जो मोरो पवित्र जागा को बारे म जब ऊ अपवित्र करयो गयो, इस्राएल को देश को बारे म जब ऊ उजड़ गयो, अऊर यहूदा को घराना को बारे म जब हि बन्धुवायी म गयो, अहा, अहा! कह्यो। 4यो वजह देखो, मय तोख पूर्व देश को लोगों को अधिकार म करन पर हय; अऊर हि तोरो बीच अपनी छावनियां डालेंन अऊर अपनो घर बनायेंन; हि तोरो फर खायेंन अऊर तोरो दूध पीयेंन। 5मय रब्बा नगर ख ऊंटों ख रहन अऊर अम्मोनियों को देश ख मेंढी-शेरियों को बैठन की जागा कर देऊं; तब तुम जान लेवो कि मय परमेश्वर आय।”

6कहालीकि परमेश्वर यहोवा यो कह्य हय : तुम न जो इस्राएल को देश को वजह ताली बजायी अऊर नाच्यो, अऊर अपनो पूरो मन को अभिमान सी खुशी मनायी, 71यो वजह देख, मय न अपनो हाथ तोरो ऊपर उठायो हय; अऊर तुम्ख राज्य राज्य को लोगों की लूट बनाय देऊं; अऊर देश देश म सी नाश करूं। मय तोरो सत्यानाश कर डालूं; तब तय जान लेजो कि मय परमेश्वर आय।

मोआब को खिलाफ भविष्यवानी

8“परमेश्वर यहोवा यो कह्य हय : मोआब अऊर सेईर जो कह्य हंय, देखो, यहूदा को घराना दूसरो राज्यों को समान भय गयो हय। 9यो वजह देख, मोआब देश की सीमा की रक्षा करन वालो नगरों ख बेत्यशीमोत, बालमोन, अऊर किर्यातैम, जो ऊ देश को शिरोमनि हय, मय उन्को रस्ता खोल क 10मय उन्ख पूर्व देश को लोगों को वश म असो कर देऊं कि हि अम्मोनियों पर चढ़ायी करे; अऊर मय अम्मोनियों ख यहां तक उन्को अधिकार म कर देऊं कि राज्य राज्य को बीच उन्की याद नहीं करी जायेंन। 112मय मोआब ख भी सजा देऊं। तब हि जान लेयेंन कि मय परमेश्वर आय।

एदोम को खिलाफ भविष्यवानी

12“परमेश्वर यहोवा यो भी कह्य हय : एदोम न जो यहूदा को घराना सी बदला लियो, अऊर उन सी बदला ले क बड़ो दोषी भय गयो, 13यो वजह परमेश्वर यो कह्य हय, मय एदोम को देश को खिलाफ अपनो हाथ बढ़ाय क ओको म सी आदमी अऊर जनावर दोयी ख नाश कर देऊं; अऊर तेमान नगर सी ले क ददान नगर तक ओख उजाड़ देऊं; अऊर हि तलवार सी मारयो जायेंन। 143मय अपनी प्रजा इस्राएल को द्वारा एदोम नगर सी अपनो बदला लेऊं; अऊर हि ऊ देश म मोरो कोप अऊर जलजलाहट को अनुसार काम करेंन। तब हि मोरो बदला ख जान लेयेंन, परमेश्वर यहोवा की या वानी हय।

पलिश्तियों को खिलाफ भविष्यवानी

15“परमेश्वर यहोवा यो कह्य हय : कहालीकि पलिश्ती लोगों न बदला लियो, बल्की अपनी युग युग की दुश्मनी को वजह अपनो मन को अभिमान सी बदला लियो कि उन्को नाश करे, 16यो वजह परमेश्वर यहोवा यो कह्य हय, देख, मय पलिश्तियों को खिलाफ अपनो हाथ उठावन पर हय, अऊर करेतियों ख मिटाय डालूं; अऊर समुन्दर किनार को बच्यो हुयो सब रहन वालों को नाश करूं। 174मय जलजलाहट को संग मुकद्दमा लड़ क, गुस्सा को संग बदला लेऊं। अऊर जब मय उन्को सी बदला ले लेऊं, तब हि जान लेयेंन कि मय परमेश्वर आय।”