यहेजकेल 14

परमेश्वर द्वारा मूर्तिपूजकों ख चेतावनी

1फिर इस्राएल को कुछ बुजूर्ग लोग मोरो जवर आय क मोरो सामने बैठ गयो। 2तब परमेश्वर को यो वचन मोरो जवर पहुंच्यो, 3“हे आदमी की सन्तान,” हि आदमियों न त अपनो देवता की मूर्ति अपनो मन म बसाय लियो हय, अऊर अपनो अधर्म को ठोकर अपनो सामने रख्यो हय; फिर का हि मोरो सी कुछ पूछ पायेंन?

4येकोलायी तय उन्को सी कह्य, प्रभु परमेश्वर यो कह्य हय : इस्राएल को घराना म सी जो कोयी अपनी देवता की मूर्ति अपनो मन म बसाय क, अऊर अपनो अधर्म को ठोकर अपनो सामने रख क भविष्यवक्ता को जवर आयेंन, ओख मय परमेश्वर, ओकी बहुत देवता की मूर्तियों को अनुसार उत्तर देऊं, 5जेको सी इस्राएल को घराना, जो अपनी मूर्तियों को द्वारा मोख छोड़ क दूर भय गयो हय, उन्ख मय उन्कोच मन को द्वारा फसाऊं।

6“येकोलायी इस्राएल को घराना सी कह्य, प्रभु परमेश्वर यो कह्य हय : पश्चाताप करो अऊर अपनी घृणित मूर्तियों सी मुंह मोड़ों; अऊर अपनो घृणित कामों ख छोड़ो।”

7कहालीकि इस्राएल को घराना म सी अऊर उन्को बीच म रहन वालो परदेशियों म सी कोयी भी होना, जो मोरो पीछू चलनो छोड़ क अपनी देवता की मूर्ति अपनो मन म बसाय ले, अऊर अपनो अधर्म को ठोकर अपनो सामने रखेंन, अऊर सब मोरो सी अपनी कोयी बात पूछन लायी भविष्यवक्ता को जवर आयेंन, त ओख मय परमेश्वर खुदच उत्तर देऊं। 8मय ऊ आदमी को खिलाफ होय क ओख निराश करूं, अऊर चिन्ह ठहराऊं; अऊर ऊ अपनी दुर्दशा को वजह समाज म कहावत बन जायेंन, मय ओख अपनो निजी लोगों को बीच म सी निकाल देऊं; तब तुम जान लेवो कि मय परमेश्वर आय।

9यदि भविष्यवक्ता न धोखा खाय क कोयी वचन कह्यो हय, त जानो कि मय परमेश्वर न ऊ भविष्यवक्ता ख धोखा दियो हय; अऊर मय अपनो हाथ ओको खिलाफ उठाय क ओख अपनी प्रजा म सी नाश कर देऊं। 10हि सब लोग अपनो अपनो अधर्म को बोझ उठायेंन, मतलब जसो भविष्यवक्ता सी पूछन वालो को अधर्म ठहरेंन, वसोच भविष्यवक्ता को भी अधर्म ठहरेंन। 11ताकि इस्राएल को घराना आगु सी मोरो पीछू चलनो मत छोड़े अऊर नहीं अपनो अलग अलग तरह को अपराधों को द्वारा आगु सी अशुद्ध बने; बल्की हि मोरी प्रजा बने अऊर मय उन्को परमेश्वर ठहरू, प्रभु परमेश्वर कि या वाणी आय।

नूह, दानिय्येल, अऊर अय्यूब

12तब परमेश्वर को यो वचन मोरो जवर पहुंच्यो, 13“हे आदमी की सन्तान,” जब कोयी देश को लोग मोरो सी विश्वासघात कर क् पापी होय जायेंन, तब मय उन्ख सजा देन लायी उन पर हाथ उठाय क उन्को भोजन को आधार बन्द करूं, अऊर उन पर अकाल भेजूं, मय वहां सी आदमी अऊर जनावर दोयी ख नाश करूं, 14तब चाहे वहां नूह, दानिय्येल, अऊर अय्यूब रहत होना, त हि अपनो धर्म को वजह अपनो जीव बचाय सकेंन; प्रभु परमेश्वर की या वाणी आय।

15यदि मय कोयी देश म जंगली जनावर भेजूं जो ओख रौंद क उजाड़ डालेंन, अऊर जंगली जनावर को वजह कोयी भी ऊ देश म सी होय क यात्रा नहीं करेंन, 16त चाहे ओको म हि तीन धार्मिक आदमी रहत होना, तब भी परमेश्वर की या वाणी हय, मोरो जीवन की कसम, नहीं हि टुरावों ख अऊर नहीं टुरियों ख बचाय सकेंन, केवल हि तीनच आदमी बचेंन; पर पूरो देश नाश होय जायेंन।

17यदि मय ऊ देश पर दुश्मन द्वारा तलवार चलवाय क कहूं, हे तलवार ऊ देश म चल; अऊर यो रीति सी मय ऊ देश म सी आदमी अऊर जनावर दोयी ख नाश करूं, 18तब चाहे ओको म हि तीन धार्मिक आदमी भी होना, तब भी प्रभु परमेश्वर की या वाणी हय, मोरो जीवन की कसम, नहीं हि टुरावों ख अऊर नहीं टुरियों ख बचाय सकेंन, केवल हि अकेलोच बचेंन।

19यदि मय ऊ देश म महामारी फैलाऊं अऊर ओको पर अपनो गुस्सा भड़काय क ओको खून असो बहाऊं कि वहां को आदमी अऊर जनावर दोयी नाश होय जायेंन, 20त चाहे नूह, दानिय्येल अऊर अय्यूब भी वहां होना, तब भी प्रभु परमेश्वर की या वाणी हय, मोरो जीवन की कसम, हि नहीं टुरावों ख अऊर नहीं टुरियों ख बचाय सकेंन, अपनो धर्म को द्वारा हि केवल अपनोच जीव ख बचाय सकेंन। 211

“कहालीकि प्रभु परमेश्वर यो कह्य हय : मय यरूशलेम नगर पर अपनी चार विपत्तियां भेजूं, मतलब तलवार, अकाल, जंगली जनावर अऊर महामारी, जेको म आदमी अऊर जनावर सब ओको म सी नाश होय जायेंन। 22तब भी ओको म सी थोड़ो सो टुरा-टुरियां बच जायेंन जो वहां सी निकाल क तुम्हरो जवर लायेंन, अऊर तुम उन्को चालचलन अऊर कामों ख देख क वा विपत्ति को बारे म जो मय यरूशलेम पर डालूं, बल्की जितनी विपत्ति मय ओको पर डालूं, हि सब को बारे म शान्ति पावों। 23जब तुम उन्को चालचलन अऊर काम देखो, तब हि तुम्हरी शान्ति को वजह होयेंन; अऊर तुम जान लेवो कि मय न यरूशलेम नगर म जो कुछ करयो, ऊ बिना वजह नहीं करयो, प्रभु परमेश्वर की याच वाणी आय।”