निर्गमन 39

याजकीय कपड़ा तैयार करनो

(निर्गमन २८:१-१४)

1तब उन्न नीलो, जामुनी अऊर लाल रंग को सूत सी पवित्र वेदी की सेवा करन वालों याजकों लायी पहिनन लायी कपड़ा बनाये, अऊर हारून लायी भी पवित्र कपड़ा बनाये; जो तरह परमेश्वर न मूसा ख आज्ञा दी होतो। 2ओन एपोद पोशाक ख सोनो सी, पतलो सूत सी बुन्यो हुयो नीलो, जामुनी अऊर लाल रंग को कपड़ा सी बनायो। 3अऊर उन्न सोनो ख पीट क पतली पत्तियां बनायी अऊर उन्म सी तार काट्यो। बाद म उन तार बनायो अऊर कुशल कारीगरों को द्वारा पतलो सूत सी बुन्यो हुयो नीलो, जामुनी अऊर लाल रंग को कपड़ा पर बनावट सी मिलाय दियो। 4उन्न एपोद लायी ओको दोयी कोनो पर जुड़्यो हुयो दोय कन्धा बनाये। 5अऊर ओख कसन लायी जो बारीक बुन्यो हुयो पट्टा ओको पर बन्यो, ऊ ओको संग बिना जोड़ को होतो, अऊर ओकीच बनावट को अनुसार, मतलब सोनो अऊर नीलो, जामुनी अऊर लाल रंग को कपड़ा को, अऊर स्वर्ण को कपड़ा को बन्यो; जसो परमेश्वर न मूसा ख आज्ञा दी होती।

6अऊर उन्न सुलैमानी गोटा काट क सोनो की खांचों म जोड़्यो गयो, यो गोटा इस्राएल को बारा टुरावों को नामों को अनुसार मुहर को समान खोद्यो गयो होतो। 7अऊर ओन उन्ख एपोद पोशाक को कन्धावों पर लगाय दियो, जेकोसी इस्राएलियों लायी याद करान वालो मनि ठहरे; जो तरह परमेश्वर न मूसा ख आज्ञा दी होती।

सीनाबन्द यां सीनाबन्द बनानो

(निर्गमन २८:१५-३०)

8ओन सीनाबन्द ख एपोद को समान सोनो की, अऊर नीलो, जामुनी रंग को कपड़ा सी बनायो, अऊर बन्यो हुयो सन को कपड़ा म कलात्मक ढंग सी सीनाबन्द बनायो। 9सीनाबन्द चार च कोना बराबर बन्यो होतो; डबल मोड़्यो हुयो, अऊर ऊ डबल होय क नव इंच अऊर नव इंच चौड़ो बन्यो। 10अऊर उन्न ओको पर चार लायीन म मनि लगायो। पहली लायीन म एक माणिक्य; एक पुखराज, अऊर लालड़ी लगायो गयो; 11अऊर दूसरी लायीन म मरकत, नीलमनि, अऊर हीरा की होती; 12अऊर तीसरी लायीन म लशम, सूर्यकान्त, अऊर नीलम; 13अऊर चौथी लायीन म लशम, सुलैमानी मनि, अऊर यशब जड़े; यो सब अलग अलग सोनो को जड़्यो गयो। 14अऊर यो मनि इस्राएल को टुरावों को नामो को अनुसार बारा होतो; एक एक मनि पर एक एक कुल को नाम छाप को समान खोद्यो हुयो होतो। 15अऊर उन्न सीनाबन्द कवच पर डोरियां को समान गूथ्यो हुयो शुद्ध सोनो की संकली बनाय क लगायी; 16तब उन्न सोनो को दोय खाना, अऊर सोनो की दोय कड़ियां बनाय क दोयी कड़ियों ख सीनाबन्द कवच को दोयी कोनो पर जोड़ दियो; 17तब उन्न सोनो की दोयी गूथी हुयी संकली ख सीनाबन्द कवच को कोनो पर की दोयी कड़ियों म लगायो। 18अऊर गूथी हुयी दोयी संकलीयों को दोयी बाकी कोनो ख उन्न दोयी खांचों म लगायो, एपोद को आगु दोयी कन्धों को बन्धनो पर लगायो। 19तब उन्न सोनो की अऊर दोय कड़ियां बनायो अऊर उन्ख एपोद पोशाक को बाजू को अन्दर किनार पर, एपोद को खल्लो कोनो पर जोड़ दियो। 20अऊर उन्न सोनो की दोय अऊर कड़ियां भी बनाय क एपोद को दोयी कन्धों को खल्लो भाग को जोड़ पर, एपोद पोशाक को पतलो बुन्यो हुयो पट्टा को ऊपर जोड़ दियो। 21तब उन्न सीनाबन्द कवच ख ओकी कड़ियों को द्वारा एपोद की कड़ियों म नीलो पट्टा सी असो बान्ध्यो कि ऊ एपोद को लगायो हुयो पट्टा को ऊपर रहेंन, अऊर चपरास एपोद सी अलग नहीं हो सकेंन; जसो परमेश्वर न मूसा ख आज्ञा दी होती।

दूसरो याजकीय कपड़ा बनानो

(निर्गमन २८:३१-४३)

22ओन एपोद लायी सम्पूर्न नीलो रंग को एक अंगरखा बुन क बनायो। 23अंगरखा को बीचो बीच एक छेद होतो, यो छेद को चारयी तरफ कपड़ा की गोट लग्यो होतो जेकोसी ऊ फट नहीं सकेंन। 24उन्न अंगरखा को खल्लो वालो घेरा म पतलो सूत सी बुन्यो हुयो नीलो, जामुनी अऊर लाल रंग को कपड़ा को अनार जसो गोल बनाये। 25उन्न शुद्ध सोनो की घुंगरू भी बनाय क अंगरखा को नीचो वालो घेरा को चारयी तरफ अनारों को बीचो बीच लगायी; 26मतलब झगली को खल्लो वालो घेरा को चारयी तरफ एक सोनो की घन्टी, अऊर एक अनार, फिर एक सोनो की घन्टी, अऊर एक अनार लगायो गयो कि उन्ख पहिन्यो हुयो सेवा कार्य करे; जसो परमेश्वर न मूसा ख आज्ञा दी होती।

27उन्न हारून अऊर ओको टुरावों लायी यो पोशाकें बनायी: महीन सूती कपड़ा को कुरता, फेटा अऊर टोपियां पतलो सूत सी बुन्यो हुयो कपड़ा को जांघियां, 28पतलो बुन्यो हुयो कपड़ा को फेटा, सुन्दर टोपियां, अऊर जांघियां बनायी, 29अऊर पतलो सूत सी बुन्यो हुयो नीलो, जामुनी फिर लाल रंग को कपड़ा को कमर पट्टा, जो पर सूई सी बुनायी करयो गयो होतो, जसी परमेश्वर न मूसा ख आज्ञा दी होती।

30तब उन्न पवित्र मुकुट की पट्टी शुद्ध सोनो की बनायी; अऊर जसो मुहर म वसोच उन्म यो अक्षर खोद्यो गयो, मतलब “परमेश्वर लायी पवित्र।” 31उन्न ओको फेटा को आगु नीलो रंग की रस्सी संग बान्ध दियो, ठीक जसो “परमेश्वर न मूसा ख आज्ञा दी होती।”

मिलाप वालो तम्बू को तैयार होनो

(निर्गमन ३५:१०-१९)

32यो तरह मिलाप वालो तम्बू को निवास को सब काम पूरो भयो, अऊर जो काम की आज्ञा परमेश्वर न मूसा ख दी होती, इस्राएलियों न ओको अनुसार करयो।

33अऊर हि निवास को तम्बू अऊर ओकी सब चिजों सहित मूसा को जवर ले आये : मतलब हंसिया, चौखट, सलाखें, खम्बा अऊर तम्बू तक ले आये; 34अऊर लाल रंग सी रंगी हुयी मेंढा की खाल को ओढ़ना, अऊर सूइसों की खाल को ओढ़ना, अऊर बीच को परदा; 35गवाही-चिट्ठी को सन्दूक अऊर ओको खम्बा, अऊर पश्चाताप को ढक्कन; 36मेज अऊर ओकी सब चिजे अऊर भेंट की रोटी; 37शुद्ध सोनो की दीवट, अऊर ओको संग ओकी सजावट को दीया, अऊर ओकी सब चिजे फिर दीया जलावन लायी तेल; 38सोनो की वेदी, अऊर अभिषेक को तेल; सुगन्धित धूप अऊर तम्बू को दरवाजा को परदा; 39पीतल की वेदी अऊर ओकी पीतल की जाली, ओकी सब चिजों सहित खम्बा; गंगार अऊर ओको पाये; 40खम्बों अऊर पाया समेत आंगन को परदा, अऊर आंगन को फाटक को परदा, अऊर डोरियां, अऊर खूटा, अऊर मिलाप वालो तम्बू को निवास को सेवा को पूरो सामान; 41पवित्र जागा म सेवा करतो समय पहिन्यो हुयो कपड़ा, अऊर याजकीय सेवा काम करन लायी हारून याजक को पवित्र कपड़ा अऊर ओको टुरावों को कपड़ा। 42जसी परमेश्वर न मूसा ख आज्ञा दी होती ओको अनुसार इस्राएलियों न सब काम करयो। 43तब मूसा न पूरो काम ख जांच क देख्यो कि उन्न वसोच करयो होतो जसो परमेश्वर न आज्ञा दी होती। अऊर मूसा न उन्ख आशीर्वाद दियो।