एस्तेर 6

राजा द्वारा मोर्दकै को सम्मान

1ऊ रात राजा ख नींद नहीं आयी, येकोलायी ओकी आज्ञा सी इतिहास की किताब लायी गयी, अऊर पढ़ क राजा ख सुनायी गयी। 21ओको म यो लिख्यो हुयो मिल्यो, कि जब राजा क्षयर्ष को हाकिम जो द्वारपाल भी होतो, उन्को म सी बिगताना अऊर तेरेश नाम को दोय जनों न ओको पर हाथ उठान की कोशिश करी होती ओख मोर्दकै न प्रगट करयो होतो। 3तब राजा न पूछ्यो, “येको बदला मोर्दकै को का सम्मान अऊर बड़ायी करी गयी?” राजा को जो सेवक ओकी सेवा म हाजिर होतो, उन्न ओख उत्तर दियो, “ओको लायी कयी भी नहीं करयो गयो।” 4राजा न पूछ्यो, “आंगन म कौन हय?” उच समय हामान राजा को भवन सी बाहेर आंगन म यो सोच क आयो होतो कि जो खम्भा ओन मोर्दकै लायी तैयार करायो होतो, ओको पर ओख लटकाय देन की चर्चा राजा सी करे। 5तब राजा को सेवकों न ओको सी कह्यो, “आंगन म त हामान खड़ो हय।” राजा न कह्यो, “ओख अन्दर बुलाय क लावो।” 6जब हामान अन्दर आयो, तब राजा न ओको सी पूछ्यो, “जो आदमी को सम्मान राजा करनो चाहवय हय त ओको लायी का करनो अच्छो होयेंन?” हामान न यो सोच क, कि मोरो सी ज्यादा राजा कौन्को सम्मान करनो चाहत होना, 7राजा ख उत्तर दियो, “जो आदमी को सम्मान राजा करनो चाहे, 8ओको लायी राजकीय कपड़ा लायो जाये, जो राजा पहिनय हय, अऊर एक घोड़ा भी, जेको पर राजा सवार होवय हय, अऊर ओकी मुंड पर जो राजकीय मुकुट धरयो जावय हय ऊ भी लायो जाये। 9फिर ऊ कपड़ा, अऊर ऊ घोड़ा राजा को कोयी बड़ो हाकिम ख सौंप्यो जाये, अऊर जेको सम्मान राजा करनो चाहवय हय, ओख ऊ कपड़ा पहिनायो जाये, अऊर ऊ घोड़ा पर सवार कर क् नगर को चौक म ओख फिरायो जाये; अऊर ओको आगु आगु यो प्रचार करयो जाये, ‘जेको सम्मान राजा करनो चाहवय हय, ओको संग असोच करयो जायेंन।’” 10राजा न हामान सी कह्यो, “फुर्ती कर क् अपनो कहन को अनुसार ऊ कपड़ा अऊर ऊ घोड़ा ख ले क, ऊ यहूदी मोर्दकै सी जो राजभवन की फाटक पर बैठ्यो करय हय, वसोच कर। जसो तय न कह्यो हय ओको म कयी भी कमी होनो नहीं पाये।” 11तब हामान न ऊ कपड़ा, अऊर ऊ घोड़ा ख ले क, मोर्दकै ख पहिनायो, अऊर ओख घोड़ा पर चढ़ाय क, नगर को चौक म यो तरह पुकारतो हुयो घुमायो, “जेको सम्मान राजा करनो चाहवय हय ओको संग असोच करयो जायेंन।”

12तब मोर्दकै त राजभवन की फाटक म लौट गयो पर हामान दु:ख करतो हुयो अऊर मुंड झाक क झट सी अपनो घर ख गयो। 13हामान न अपनी पत्नी जेरेश अऊर अपनो सब संगियों सी सब कयी जो ओको पर बीत्यो होतो वर्नन करयो। तब ओको बुद्धिमान संगियों अऊर ओकी पत्नी जेरेश न ओको सी कह्यो, “मोर्दकै जेक तय नीचा दिखानो चाहवय हय, यदि ऊ यहूदियों को वंश म को आय, त तय ओको पर प्रबल होनो नहीं पाजो ओको सी पूरी रीति सी नीचाच मिलेंन।”

हामान को मरनो

14हि ओको सी बात करच रह्यो होतो कि राजा को किन्नर आय क हामान ख एस्तेर लायी भोज म फुर्ती सी बुलाय ले गयो।