जीवन को वचन
आमोस 1
तकोआवासी आमोस जो जनावर चरावन वालों होतो, ओको यो वचन आय जो ओन यहूदा को राजा उजिय्याह को, अऊर योआश को टुरा इस्राएल को राजा यारोबाम को दिनों म, भूईडोल सी दोय साल पहिले, इस्राएल को बारे म दर्शन देख क कह्यो :
“यहोवा सिय्योन सी गरजेंन , अऊर यरूशलेम सी अपनो शब्द सुनायेंन ; तब चरवाहों की चराइयाँ विलाप करेंन , अऊर कर्मेल पहाड़ की सेंडी झुलस जायेंन।”
इस्राएल को पड़ोसी राज्यों को न्याय
अराम
यहोवा यो कह्य हय : दमिश्क को तीन का, बल्की चार अपराधों को वजह मय ओकी सजा नहीं छोड़ूं; कहालीकि उन्न गिलाद ख लोहा को दांवन वालो अवजारों सी रौंद डाल्यो हंय। येकोलायी मय हजाएल को किल्ला म आगी लगाऊं , अऊर ओकोसी बेन्हदद को किल्ला भी जर क भस्म होय जायेंन। मय दमिश्क को द्वारों ख तोड़ डालूं , अऊर आवेन नाम की तरायी को रहनवालों ख अऊर बेतएदेन को घर म रहनवालो राजदण्डधारी ख नाश करूं; अऊर अराम को लोग गुलाम होय क कीर ख जायेंन, यहोवा को योच वचन आय।
पलिश्तिया
यहोवा यो कह्य हय : “गाजा को बार बार करयो हुयो अपराधों को वजह मय ओकी सजा नहीं छोड़ूं; कहालीकि हि सब लोगों ख बन्दी बनाय क ले गयो कि उन्ख एदोम राज्य को वश म कर दे। येकोलायी मय गाजा नगर की दीवाल म आगी लगाऊं अऊर ओको सी ओको किल्ला जर क भस्म होय जायेंन। मय अशदोद नगर को रहनवालों ख अऊर अश्कलोन नगर को राजा ख भी नाश करूं; मय अपनो हाथ एक्रोन को खिलाफ चलाऊं, अऊर बच्यो पलिश्ती लोग नाश होयेंन, परमेश्वर यहोवा को योच वचन आय।”
सोर
यहोवा यो कह्य हय सोर को बार बार करयो हुयो अपराधों को वजह मय ओकी सजा नहीं छोड़ूं; कहालीकि ओन सब लोगों ख गुलाम बनाय क एदोम को वश म कर दियो अऊर भाऊ को संग को करी हुयी वाचा ख याद नहीं करयो। येकोलायी मय सोर को नगर को किल्ला ख आगी लगाऊं, अऊर ओकोसी ओको किल्ला भी भस्म हो जायेंन।
एदोम
“यहोवा यो कह्य हय एदोम को बार बार करयो हुयो अपराधों को वजह मय ओकी सजा नहीं छोड़ूं ; कहालीकि ओन अपनो भाऊ ख तलवार पकड्यो हुयो भगायो अऊर कुछ भी दया नहीं करी, पर गुस्सा सी उन्ख लगातार फाड़तच रह्यो, अऊर अपनो गुस्सा ख हमेशा लायी बनाये रह्यो। येकोलायी मय तेमान शहर म आगी लगाऊं, अऊर ओको सी बोस्रा को किल्ला भस्म हो जायेंन।”
अम्मोन
यहोवा यो कह्य हय : “अम्मोन को बार बार करयो हुयो अपराधों को वजह मय ओकी सजा नहीं छोडूं कहालीकि ओन अपनी सीमा ख बढ़ावन लायी गिलाद की गर्भवती बाइयों को पेट चीर डाल्यो। येकोलायी मय रब्बा नगर को किल्ला म आगी लगाऊं, अऊर ओको सी ओको भवन भी भस्म होय जायेंन। ऊ युद्ध को दिन म ललकार होयेंन, ऊ आन्धी बल्की माट्या को दिन होयेंन; अऊर उन्को राजा अपनो अधिकारी समेत गुलामी म जायेंन,” यहोवा को योच वचन आय।
जीवन को वचन. Copyright © 2020-2025 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.