MUNGA TRANSLATION PROJECT
Romawa 14
Bǝ A Tokwan Lǝ Yakun Thǝ
Ɓa muo yakwɔ bǝ dǝnyitthǝ gi muani ɓǝ. Kwoi bǝ ɓa nyimtha nwa i ilǝ ba bǝ nhǝm ba gi thǝ. Bǝ dǝ nyitthǝ a bǝ yakun gwabǝi tthǝ i tang nungkwɔ ǝndǝi, kwoi yuu a kwɔ muani dang bǝ dǝnyitthǝ dǝna tang wog ɓuo.
Yuu akwɔ a tang nungkwɔ ǝndǝi kwɔ bǝ tthǝm yuu akwɔ tangǝu ɓǝthǝ: langɓǝ yuu akwɔ dǝna tang ǝn wog ɓuo kwɔ bǝ to kwan lo yuu akwɔ a tang nungkwɔ ǝndǝi ɓǝthǝ: bakwɔ Fuh gwab yuu ɓǝ kullong. Mǝ ǝn yittǝn kwɔ ma to kwan lo thǝb yuu akun ɓa? Ən togwoi gi a gwab u ilo ko u owh. Langkwoi i ilo, bakwɔ Dangbang a ɓuan gwabǝi tthǝ i ilo.
Yakun dǝna nhǝm angǝ vii akun pǝl sua vii kwɔ. Langkwoi yakun dǝna nhǝm angǝ vii kwɔ ǝndǝi natha. Ko ǝn ya ǝǝ dang nungkwɔ dang wko geiu tthǝ ɓǝ. Yakwɔ dǝna nhǝm ba ghaatthǝ lǝ ba vii akun kwɔ i toni i bǝ dǝ ghaali lǝ Dangbang; yakwɔ dǝna tang nungkwɔ ǝndǝi kwɔ i toni i bǝ dǝ ghaali lǝ Dangbang, bakwɔ dǝi to sakko lǝ Fuh lo nungtang lǝ. Yakwɔ la bǝ tang nung akun toni i bǝ dǝ ghaali lǝ Dangbang, langkwoi dǝi to sakko lǝ Fuh. Ɓi ǝǝ longwam kwɔ lǝ ǝnba loɓi ɓuo lǝu, langkwoi ɓi ɓui lǝba lo ɓiu. Nǝ ɓi ǝǝ longwam kwɔ, ǝn ba Dangbang nungkwɔ ɓi ǝǝ, langkwoi nǝ ɓi ɓui, ǝn ba Dangbang ɓi ɓui. Nungkwɔ ko ɓi ǝǝ ko ɓi ɓui, ɓi ǝn a bǝ Dangbang. Bakwɔ Kristi ɓui langkwoi ǝrr i nwongǝi gu yangbǝ u ǝlǝ Dangbang yakwɔ i nwongǝi ɓǝ langkwoi yakwɔ ɓuiɓua. Mǝ yang, kwɔ dǝma tang wog ɓuo kwɔ-ǝnba ɓǝ bǝ dǝma to kwan lo yakun? Langkwoi mǝ kwɔ dǝma tang nungkwɔ ǝndǝi kwɔ- baɓǝ bǝ dǝma tthǝm sua ya dǝ ba a langǝ i tthǝ Fuh? Ɓi ǝndǝi ɓi dǝi tthasi Fuh u toɓi kwan tthǝ.
Bakwɔ nungvullǝ ba Fuh gei angǝ,
<<Manung a langǝ i kwɔ ɓang lǝ Fuh ya nwongǝi kwɔ, Dangbang gei ni,
yayuu ǝndǝi a bainwa longǝi sua tthasim,
langkwoi yayuu ǝndǝi a gei i nwai lǝ angǝ ɓang ǝn Fuh.>>
Ɓi kwɔ ǝndǝi, yang, ɓi gei i nwa ɓi lonung kwɔ ɓi to lǝ Fuh.
Bǝ Ato Yakun Owh Thǝ
Nungkwɔ yang, ɓi yitthǝ bǝ to kwan lǝ tha, Manung kwɔ niyang, a mǝrrǝm lo nyi mǝ bǝ a to nungkwɔ a lag bo yakun a o ko dang nung a ɓko thǝ. Bǝ ǝǝm dang tha i Dangbang Kristi ǝn gwabbǝng geigǝ nungtang akun yangǝu kwɔ i nkolǝ kwɔ mko tthasi Fuh ɓǝ; kwoi nǝɓa dǝ ba a langǝ i tthǝ ɓangǝ i nungtang akun tthǝ mko, yang mko tthǝn tthǝ ɓǝ. Nǝ dǝɓa dǝ ba zii bǝi lǝ yakun ba nungkwɔ dǝɓa tangkwɔ, yang lakwɔ a to nung to dang bǝ yiɗi bǝi lǝu. Bǝ a yitthǝ nungtang kwɔ dǝma tang kwɔ ɓanglǝ yuu akwɔ Fuh ɓui lǝ bagu ɓǝthǝ! Bǝ a yitthǝ nungkwɔ dǝma lǝi lǝ nung a langǝ i kwɔ tǝi ɗuǝn a ɓko thǝ. Bakwɔ bǝ lo yigwoi gi Fuh ǝn ba bǝ tang nungtang i bǝ nwamung lǝu, kwoi ǝn ba ya to nung a langǝ i, i ya ǝǝ i tǝmmi, i tthǝlla, kwɔ Ɓyang a Langǝ i dǝna dǝɓǝ. Langkwoi kwɔ nǝɓa to nung to lǝ Kristi tthǝ nung lǝi kwɔ, yang ɓa dǝ tthǝ la lǝ Fuh langkwoi yayuu a gwab tha i ɓǝ.
Nungkwɔ yang, ɓi dǝ nungɓi tthǝ nungkwɔ a wulǝ bǝ ǝǝ tǝmmi langkwoi kwɔ a wulǝ bǝ dǝ tthǝ nyimmi lǝ tha. Bǝ a, ɓanglǝ nung to gi Fuh, ba nungtang thǝ, nungtang ǝndǝi i ɓuan i tang ǝn tang, kwoi mko kwɔ ma tang nungkwɔ a to yuu akun a o dang nung a ɓko ɓǝ. Nung a langǝ i kwɔ ɓato kwɔ ɓa yitthǝ bǝ tang nyam, bǝ nwa min, ko bǝ to nung akun kwɔ ato ya dǝ ba a langǝ i yakun a o ɓǝ. A muo natthǝ nungkwɔ a dǝ ba langǝ itthǝ lǝ ba bakwɔ ɓǝ, yang, ganglang mǝ i Fuh. Bǝ khana lo ǝn a bǝ yakwɔ ɓyǝa i yangǝu i nung a ɓko nǝ i to nung kwɔ i ɓyǝa ǝn lo zuiiu ɓǝ! Kwoi nǝ ito shaka lo nungkwɔ i tang yang, Fuh a ɓangǝ ilǝ nǝ i tang nungɓǝ kwɔ ɓǝ, bakwɔ nungto gi tthǝn lobǝ dǝnyitthǝ lǝu. Langkwoi nungkwɔ ǝndǝi nǝ tthǝn lo bǝ dǝnyitthǝ lǝu yang ǝn nung a ɓko.
MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.