Skip to content
BibleKenya

MUNGA TRANSLATION PROJECT

Muanni 22

Ya nwatummi gi Fuh langkwoi tamnatthǝ dual mung nwongǝi, kai mangǝttǝn ǝn ɓui a yumi, langkwoi dǝna kyal bǝ lo yigwoi gi Fuh langkwoi gi Yui Ɓangam. Langkwoi dǝna kyal nunglǝi ganglang gwoi angǝ a. Nwangwu dual lǝ ǝndǝi kab nwongǝi tthǝ, kab nwongǝi ɓǝ dǝna si lona sob iu rab, bokun dang fih; langkwoi yangǝu ǝn yǝng dǝ tthǝla lǝ ya losua ǝndǝi. Nung akun yangǝu kwɔ Fuh ɓanglǝ i tǝi dang gwoi angǝ a lǝu.

Bǝ ǝǝ yigwoi Fuh langkwoi a bǝ Yui ɓangam dang gwoi angǝ a lǝ. Langkwoi ya thǝb gu a wabbu. I ɓyǝa dang nungǝu, langkwoi i vullǝ ɗuǝnnu nwaɗasiǝ lǝ. Bǝi gub akunu, langkwoi i yiɗi fitilǝu ko fuh adu, bakwɔ Dangbang Fuh a mǝrǝmlǝ lua gi, langkwoi i lo yigwoi la ɗing langkwoi laɗing.

Bǝ Wuo Gi Yeso

Yang ya nwatummi gi Fuh ɓǝ geim angǝ, <<Bakwɔ ǝn ba a langǝ i langkwoi i dǝba a langǝ i tthǝ. Langkwoi Dangbang Fuh, kwɔ dǝna dǝ Ɓyang gulǝ ya gei ba a tthasi kwɔ, u tum ya nwatummi gu u tanatthǝ nungkwɔ a to nung nǝnǝng kwɔ lǝ ya thǝb gu.>>

Yeso gei angǝ, <<Alǝ! Dǝmǝn wuo nǝnǝng kwɔ, tthǝla ǝn a bǝ yakwɔ dǝna to nung to i nwaba a tthasi dang nungvullǝ kwɔ ɓǝ!>>

Ɓang, Yohanna, ǝnlǝ langkwoi ǝn ɓyǝa i nungkwɔ ǝndǝi. Langkwoi kwɔ ǝn alo bǝ lǝu langkwoi i bǝ ɓyǝa i nungkwɔ, Ən bai nwalongǝm pangsua tthasi ya nwatummi gi Fuh kwɔ tamnatthǝ i nungkwɔ ɓǝ, langkwoi dǝmǝn tǝbǝ wabbu. Kwoi u geim angǝ, <<Bǝ a ato ni thǝ! Ɓang ǝn thǝb i mǝlǝ langkwoi i ya youngmǝ ya gei ba a tthasi langkwoi i yakwɔ ǝndǝi dǝna to nung to i ba dang nungvullǝ kwɔ ɓǝ. A wab Fuh!>> Langkwoi u geim angǝ, <<Bǝ pyǝa nwaba bǝ gei ba a tthasi kwɔ dang nungvullǝ kwɔ nung a pyǝa thǝ. Bakwɔ lona gbagǝng kwɔ i nungkwɔ ato nung tthǝ ɓǝ. Yuu akwɔ dǝna to nung a ɓko u lilotthǝ u to nung a ɓko, yuu akwɔ dǝna to ɓilǝng u lilotthǝ uto ɓilǝng; yuu akwɔ dǝna to nung to a langǝ i u lilotthǝ uto nung to a langǝ i, langkwoi yuu akwɔ ǝn ya langǝ i lilotthǝ bǝ to nung a langǝ i.

Yeso gei angǝ, <<Alǝ! Dǝmǝn wuo nǝnǝngǝkwɔ! Mǝn wulǝ nwathanǝm nalǝ, mǝn dǝlǝ ko ǝnya ǝndǝi natha i nungkwɔ uto ɓǝ. Ɓanglǝ a nungsi langkwoi a nǝsua, bǝ baipiu langkwoi i bǝ alo.>>

Bǝ khana lo ǝn a bǝ yakwɔ ɗiggǝ nunglitthǝ itthǝ langkwoi i ɓǝ i tǝi nunglǝi kwɔ i tang sikab kab nwongǝi langkwoi i ɓǝ kwɔ i tǝ gwoi angǝ ttha nwalǝgwoi lǝ. Kwoi ttha mual gwoi angǝ a lǝ ǝn i ɗua langkwoi i ya kǝbpǝllǝ nungpi, i ǝn ya to nung a ɓko langkwoi i ǝn ya thǝbbǝi, i ǝn ya wab nung a wabwab langkwoi i ǝn ya kǝbpǝllǝ lo nungkwɔ dǝi gei i bǝ to nung to.

Ɓang, Yeso, ǝn tum ya nwatummim sua ya kǝm pinwa gei i nungkwɔ tthǝ ya muo sua Fuh. Ɓang ǝn yǝng dang woi gi Dawuda; Ɓanglǝ vin a yuimi nungwoi.>>

Ɓyang a langǝ i i Yisi afu gei angǝ, <<A wuo!>>

Yuu akwɔ ǝndǝi nǝ lǝ nungkwɔ yang langɓǝ a gei angǝ, <<A wuo!>>

A wuo, yuu akwɔ ǝndǝi dǝna lǝ ɗimung ɓǝ; yang u muo mungki nwongǝi mangǝn nungdǝ, yuu akwɔ ǝndǝi dǝna yiɗi ɓǝ.

Bǝ Alo

Ɓang, Yohanna, dǝmǝn gub ɗuogsui yuu akwɔ lǝ nwaba a tthasi kwɔ dang nungvullǝ kwɔ: nǝ yuu akun lilo nung akun lolǝ yang, Fuh a lilo bǝ ɗablua bǝi gu zui kwɔ i gei dang nungvullǝ kwɔ ɓǝ. Langkwoi nǝ yuu akun lǝi nung akun dang nwaba a tthasi kwɔ dang nungvullǝ kwɔ, Fuh a lǝi nwathan abǝi dang sikab kab nwongǝi langkwoi i a gwoi angǝ a a langǝ i, kwɔ i gei dang nungvullǝ kwɔ ɓǝ.

Yuu akwɔ gei nungkwɔ ǝndǝi kwɔ gei angǝ, <<Manungɓǝni lalangǝ i! Dǝmǝn wuo nǝnǝngǝ kwɔ!>>

Dǝitthǝ manungɓǝ. A wuo, Dangbang Yeso!

Kaso nung a langǝ i gi Dangbang Yeso ǝǝ i yayuu ǝndǝi.

MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.