Skip to content
BibleKenya

MUNGA TRANSLATION PROJECT

HEB 1

Ba Gi Fuh Nwa Yuiu

Tthasua kullo Fuh gei ba lǝ ya bǝba ɓi lona kpaatthǝ langkwoi nunglǝi kpaatthǝ tthǝ ya gei ba a tthasi, kwoi dang vii a tthasua kwɔ u gei ba nwa Yuiu. Tthǝn tthǝu Fuh mab longwam i wayi, yuu akwɔ Fuh mko yangbǝ u dǝilo nung ǝndǝi vii asua ɓǝ.

Yui Fuh ɓǝ gablua tthǝ ghaali gi ba Fuh ǝn nungɓǝlǝ nungkwɔ itha i Fuh lǝ ɓǝ, u muo lowayi i ttha ba gu. Tthasua kwɔ u muo nung a langǝ i tthǝ bǝ yǝrnwa tthǝ nung a ɓko gi thayuu ǝndǝi, ǝrr u ǝǝsua lona a nali gi Fuh, bǝ ǝǝ angǝ a.

Ghaali Gi Yui Fuh

Yui ɓǝ ghaa pǝl ya nwatummi gi Fuh, manung ɗuǝn kwɔ Fuh du kwɔ ghaa pǝl abǝi. Fuh gei ya nwatummi lǝu bokun angǝ,

<<Mǝ ǝn Yuim;

Ɗiggǝ kwɔ ǝn mǝrrǝm lǝ Daa mǝng lǝu.>>

Ko Fuh gei ba lo ya nwatummi guung,

<<Mǝng mǝrrǝm lǝ Daa gu,

langkwoi u mǝrrǝm lǝ yuim.>>

Langkwoi kwɔ Fuh dǝna tum nwasi Yuiu longwam, u gei angǝ,

<<Ya nwatummi gi Fuh ǝndǝi a wabbu.>>

Langkwoi lǝ ba ya nwatummi Fuh gei angǝ,

<<Fuh mab wa lǝ ya nwatummi gu tthǝ,

kwoi ya thǝb gu u ji bǝb lua.>>

Lǝ ba Yui ɓǝ, manungkwɔ ni yang:

<<Bǝ lo yigwoi mǝ, mǝ Fuh, a ǝǝ laɗing langkwoi laɗing!

A dǝ kab nwa yayuu mǝ la langǝ i.

A yiɗi nung to a langǝ i yang a la nung a ɓko.

Lǝ ba ɓǝkwɔ Fuh, kwɔ lǝ Fuh mǝ, mko ɓǝ

langkwoi u da tthǝla i ghaali ghaatthǝ langkwoi tutthǝ ɓǝ

pǝl akwɔ u dǝlǝ yakwɔ dǝma kǝbtha lo i ilǝ ɓǝ.>>

Langkwoi u gei angǝ,

<<Mǝ, Dangbang, la nwasiu a mab pangsua,

langkwoi i namǝ a mab wayi.

I nungkwɔ ǝndǝi pǝmpa, kwoi mǝ amǝ ma ǝǝ laɗing;

i ǝndǝi i kuu mangǝ ǝn nunglitthǝ.

Ma kuluam mǝi mangǝ ǝn nung ɓuobtthǝ,

langkwoi i prǝmmǝi mangǝ ǝn nunglitthǝ.

Kwoi mǝ amǝ ma dǝi manungɓǝni vii ǝndǝi,

langkwoi nwongǝi mǝ thǝmmu.>>

Fuh gei lǝ ya nwatummi gu bo kun lǝu angǝ:

<<A ǝǝ bǝikwɔ lonam a nali

tǝlǝ vii kwɔ mǝn dǝ ya ɓui mǝ

lǝ thko nung dǝbo mǝ.>>

Ən ɓǝttǝn lǝ ya nwatummi gi Fuh, lakwɔ? I ǝn Ɓyang kwɔ dǝna to nung to lǝ Fuh tthǝ langkwoi Fuh tummǝi yangbǝ tǝi nwong yakwɔ a muo bǝ sob lo gu ɓǝ.

MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.