MUNGA TRANSLATION PROJECT
2 Korantiyawa 10
Bulus Ghai Ba Lo Nungto Gu
Ɓang, Bulus, dǝmǝn yam ɓǝ- Ɓang kwɔ i gei angǝ ǝn ya nyitǝmmim langkwoi muantthǝ kwɔ ɓang i ɓǝllǝ kwɔ. Kwoi nyitthǝ nǝ ǝn tutha i ɓǝllǝ. I kiggǝ a langǝ i i nung a langǝ i gi Kristi. Dǝmǝn yamɓǝ bǝ nǝ ǝn wuo bǝ ɓa tom ǝn ɓanglǝ dang wa thǝ; bakwɔ la langǝ i mǝn ɗablua yakwɔ gei angǝ dǝɓi to nung to i kiggǝ ya longwam ɓǝ.
Ən ba a langǝ i ɓi ǝǝ dang longwam, kwoi dǝɓi taɓui mangǝn ya longwam kwɔ lǝu. Nung taɓui kwɔ dǝɓi ɓuob lǝ vǝm kwɔ ǝn nung ɓuob vǝm ya longwam lǝu, kwoi ǝn nung taɓui Fuh a nyimmi, kwɔ dǝɓi tolǝ nung to bǝ drǝ bǝi a nyimmi. Dǝɓi dǝr ya nyimnwa pǝllǝ lǝ tha. Dǝɓi dǝr ya lǝi lo lag bo bǝikwɔ dǝna lǝi loi pǝll bǝ ibǝ nung gi Fuh ɓǝ; dǝɓi muo bǝ nhǝm ba gi lǝ thǝb ɓi mǝrrǝmǝi i muo ba gi Kristi.
Yang nǝ ɓa mab loɓǝ dǝɓa to nung a langǝ i, yang ɓi dǝ zui lǝ yakwɔ dǝna la ba nung a langǝ i ɓǝ.
Dǝɓa ɓyǝa nung a gwam ɓuo. Yakun tthǝ gwab angǝ i ǝn a bǝ Kristi? Yang i nhǝm ba loi i nailǝ, bakwɔ ɓi ǝn a bǝ Kristi manung gi ɓǝ. Ən lǝ tthǝkku, kwɔ mǝn lǝi lom ghaatthǝ lǝ ba tthǝnyimmi kwɔ Dangbang dǝɓi ɓǝ- tthǝnyimmi ba bǝ mai ɓǝ, akwɔ ɓi drǝ ɓǝ ɓǝlǝu. Bǝɓa survulli lǝ ba nungvullǝ kwɔ dǝmǝn vullǝ ɓǝtthǝ ɓǝthǝ.
Yuu akun a gei angǝ,<<Nungvullǝ gi Bulus zii ɗing langkwoi nyimɗing, langkwoi yang nǝ u i yayuu lǝ, yang tthǝu muan lǝ muan, yang langkwoi bagu ǝn nung akunlǝu!>> Yang yuu ɓǝkwɔ a ibǝi angǝ nung akun yangǝu lǝ ganglang nungkwɔ ɓi to dang nungvullǝ kwɔ nǝɓi yangǝu tthang ɓǝu i nungkwɔ ɓi to nǝ ɓi tthangɓǝ ɓǝ.
Ɓi nhǝm bǝ nalo ɓi ko ɓi dǝlo ɓi natha i ya kwɔ dǝna lǝi loi ghaatthǝ ɓǝu. I ǝnya sullǝ! Dǝnni pǝl tha, langkwoi dǝnni to kwanlǝ loi tthǝ natha!
Manung aɓi, ɓi nyimtthǝ ɓi tthǝ nungkwɔ bǝ nyimtthǝ ɓi tǝ manung kwɔ niu; a dǝi tthǝ nungto kwɔ Fuh mab ɓi nunglǝi bǝ tou tthǝ ɓǝ, langkwoi gǝm i nungto ɓi kwɔ ganglang ɓǝlǝ ɓǝ. Lakwɔ ɓǝ dang nungto ɓǝlǝ, dǝɓi tǝ bǝ pǝl lo nungto kwɔ ɓi wuo sua ɓǝ lǝ bko ɓǝ lǝu, ɓi wullǝ ǝn ba a langǝ i gi Kristi.
Nung kwɔ ɓi nyimtthǝ ɓi lǝ ba nung to kwɔ yakun to pǝl nungkwɔ Fuh gei angǝ i to ɓǝlǝu. Manungkwɔni yang, dǝɓi dǝ nyitthǝ bǝ dǝ ba a langǝ i ɓǝ lko a ghaa yang ɓi to nung to ghaatthǝ dang ɓǝ, dǝilo nungkwɔ Fuh gei angǝ i toɓǝ.
Yang ɓi gei ba gi Fuh losua akun tthǝ tthasi ɓǝ langkwoi i lǝi loi ghaatthǝ lǝ ba nung to kwɔ i lǝ yakun tthǝ losua gi ɓǝu.
Kwoi manungkwɔ ba gi Fuh gei kwɔ,<<yuu kwɔ nǝ dǝna yidɗi bǝ lǝilo yang lǝilo lǝ ba nungkwɔ Dangbang toɓǝ.>>
Bakwɔ nǝ ǝn Dangbang nhǝm ba matthǝ lǝ baɓi yang ǝn ba a langǝ i Fuh gwab ɓi tthǝng, langkwoi ǝn bakwɔ ɓi nhǝm ba matthǝ lǝ loɓi tthǝ ɓǝlǝu.
MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.