MUNGA TRANSLATION PROJECT
Korantiyawa 1 4
Nungto Gi Ya Nwatummi Gi Kristi
Ɓa ɓyǝa ɓi mangǝ ɓi ǝn thǝb gi Kristi, yakwɔ Fuh ji loba ba bǝ pyǝa ba a langǝ i gu ɓǝ. Ko ǝn togwoi anwɔ dǝna yiɗi thǝb ɓǝ a to nung to dang wa kun dang nung to kwɔ i duu ɓǝ. Lakwɔ, ziim mu kwɔ ɓa tom kwan tthǝɓǝ ko bǝ to kwan thayuu; langkwoi ǝn to kwan lǝ lom tthǝu.
Dang nyim kai nǝkwam, kwoi ǝǝ mangǝ ǝn ibǝ nung lǝu. Dangbang lǝ yuu kwɔ a tom kwan tthǝ ɓǝ. Nungkwɔ yang bǝɓa to kwan lǝ yuu kun tthǝ nwuni bǝ lona a langǝ i wuo thǝ. Kwan a nǝsua dǝisua nǝ Dangbang wuo ɗǝ; wuo gablua tthǝ nungkwɔ pyǝa lǝ pyǝa dang bǝthǝl ɓǝ langkwoi u yǝb nung a pyǝalǝ pyǝa dang nyi yayuu. Langkwoi yang yayuu ǝndǝi a tǝi bǝ khabǝi na Fuh. Ya ǝnthǝm, lǝba ɓǝ, ǝn to nungkwɔ ǝndǝi tthǝ Apolos i ɓanglǝ, yangbǝ ɓa naɓi lǝ nungkwɔ dǝi gei angǝ, <<Ɓa tonungto kwɔ zuu geiɓǝ.>> Yuu a kun yangǝu a lǝilo i yuu akun yang la yuu kun nǝu. Ən yi da angǝ a lo yakun? Fuh da nung ǝndǝi kwɔ dǝmma yiɗi ɓǝlǝu? Ən ba ɓǝ bǝ dǝmma lǝi lomǝ, mangǝtǝn nungkwɔ a muo kwɔ ǝn nungdǝ bǝgǝ Fuh lǝu?
A osi a tǝi nung ǝndǝi kwɔ dǝmma yiɗi ɓǝngha? A osi a tǝi nungtǝi ngha? A mǝrrǝm lǝ ya yigwoi ngha, kwɔ ɓi i ɓǝlǝ lǝu ɓǝ? Dǝm yiɗi kaso ɓǝ ǝn ya yigwoi, yangbǝ ɓi lo yigwoi i mǝ. Bakwɔ tom tthǝ mangǝ Fuh dǝɓi bǝi a sua ǝndǝi ɓi ya nwatummi, mangǝn yayuu kwɔ a ɓui nung pangbǝi lǝ nungto tthǝkku ba ya longwam ya nwatummi Fuh langkwoi i thayuu. Lǝ ba Kristi ɓi mǝrrǝm lǝ ya sulǝ; kwoi ɓǝlǝ ya yiggǝi dang tha i Kristi! Tthǝ ɓi muan ɗing, kwoi tthǝ ɓǝ nyimɗing! I laɓi kwoi i dǝ ɓǝ ghaali! Wulǝ lakwɔ gwom tǝi ɓi i ɗimung; dǝɓi li tǝrnung; dǝi ɓuob ɓi; ɓi thko ɓui kwɔ ǝndǝi dǝɓi mǝrrǝm lǝ ɓi yangǝu i bǝi kwɔ ɓi ǝǝtthǝ ɓǝu; Ɓi to nung to ɓuontthǝ thǝm ɓi. Kwɔ nǝ i tthǝm ɓiɓǝ, ɓi khana lo; kwɔ nǝ i toɓi lǝ zuii, ɓi nyimnyi; Kwɔ nǝ i dal ɓi, yang ɓi gwab i ba a langǝ i. Ɓi pǝl ɓillǝng longwam kwɔ lǝu; ɓi ǝn vurri longwam wulǝ lakwɔ!
Ən vullǝ nungkwɔ suaɓǝ, ǝn babǝ dǝɓǝ tthǝkku lǝu, kwoi yangbǝ ǝn naɓǝ natthǝ nung mangǝ ǝn yathangǝm kwɔ dǝm yiɗi ɓǝ. Bakwɔ ko ɓǝtthǝ i yakwɔ dǝna naɓǝ natthǝ nung thǝm sob ɓua tthǝm rab pǝmna sob dang bǝto nung to ya Krista, daa ɓǝ kun ɓuo. Bakwɔ dang nwongǝi ɓǝ dang tha i Kristi Yeso ǝn mǝrrǝm lǝ daa ɓǝ tthǝ bǝ wulǝ ba a langǝ i lǝ sua ɓǝ. Dǝm yam ɓǝ, yang, ɓa nalǝ nwam. Lǝ ba nungkwɔ dǝm tum Timitawos, yuu kwɔ lǝ yuim kwɔ dǝm yiɗi ni dang nung to ya Kristǝ ɓǝ. U o ɓǝ nyitthǝ nunglǝi afu kwɔ ǝn muo tthǝ dang tha i Kristi Yeso langkwoi kwɔ dǝm nanatthǝ lǝ ya kǝm pinwa bǝi ǝndǝi ɓǝ.
Yakun ɓǝ mǝrrǝm lǝ ya lo angǝ a bakwɔ dǝɓa nhǝm ɓangǝ ǝn wuo sua ɓǝu. Nǝ Dangbang gwab, sua tuu lǝu yang dǝm wuo sua ɓǝ, langkwoi yang mǝn ibǝi ttha lo angǝ a yayuu kwɔ, langkwoi ǝn nungkwɔ dǝi gei ɓuo lǝu. Bakwɔ bǝ lo yigwoi Fuh ǝn ba a nwa lǝu kwoi ǝn ba ttha. Ən anwɔ ɓa yiɗi? Ən wuo suaɓǝ i kab ba? Ko i ɓyang yiɗi bǝi i bǝ ɓuob lo sua?
MUNGA TRANSLATION PROJECT. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.