Biblica® Open Lao Contemporary Version
ພຣະນິມິດ 11
ພະຍານທັງສອງ
ຂ້າພະເຈົ້າໄດ້ຮັບໄມ້ອໍ້ອັນໜຶ່ງເໝືອນກັບໄມ້ວັດແທກ ແລະ ໄດ້ຮັບຄຳສັ່ງວ່າ, “ຈົ່ງໄປ ແລະ ວັດແທກວິຫານຂອງພຣະເຈົ້າ, ແທ່ນບູຊາ ແລະ ນັບຈຳນວນຜູ້ທີ່ນະມັດສະການຢູ່ທີ່ນັ້ນ. ແຕ່ຍົກເວັ້ນເດີ່ນຊັ້ນນອກ, ເນື່ອງຈາກທີ່ນັ້ນໄດ້ຍົກໃຫ້ຄົນຕ່າງຊາດແລ້ວ. ພວກເຂົາຈະຢຽບຢ່ຳນະຄອນສັກສິດເປັນເວລາສີ່ສິບສອງເດືອນ. ເຮົາຈະມອບລິດອຳນາດໃຫ້ແກ່ພະຍານທັງສອງຂອງເຮົາ ແລະ ພວກເຂົາຈະນຸ່ງຫົ່ມຜ້າກະສອບເຂົ້າ ແລະ ຈະທຳນວາຍເປັນເວລາໜຶ່ງພັນສອງຮ້ອຍຫົກສິບວັນ” ພະຍານທັງສອງຄື “ຕົ້ນໝາກກອກສອງຕົ້ນ ແລະ ຫລັກຕະກຽງຄຳສອງອັນທີ່ຕັ້ງຢູ່ຕໍ່ໜ້າອົງພຣະຜູ້ເປັນເຈົ້າຂອງໂລກ”.1 ຖ້າຜູ້ໃດພະຍາຍາມທີ່ຈະທຳລາຍພະຍານທັງສອງ, ໄຟຈະອອກມາຈາກປາກຂອງພວກເພິ່ນ ແລະ ເຜົາຜານບັນດາສັດຕູຂອງພວກເພິ່ນ. ຜູ້ໃດຢາກທຳລາຍພວກເພິ່ນຜູ້ນັ້ນຈະຕ້ອງຕາຍຢ່າງນີ້ແຫລະ. ພວກເພິ່ນມີອຳນາດທີ່ຈະອັດທ້ອງຟ້າເພື່ອບໍ່ໃຫ້ຝົນຕົກຂະນະທີ່ພວກເພິ່ນກຳລັງທຳນວາຍຢູ່ນັ້ນ, ແລະ ພວກເພິ່ນມີອຳນາດເຮັດໃຫ້ນ້ຳກາຍເປັນເລືອດ ແລະ ເພື່ອຟາດແຜ່ນດິນໂລກດ້ວຍໄພພິບັດທຸກຊະນິດໄດ້ເລື້ອຍຕາມທີ່ພວກເພິ່ນຕ້ອງການ.
ແລະ ເມື່ອທັງສອງໄດ້ເປັນພະຍານສຳເລັດແລ້ວ, ສັດຮ້າຍຈາກເຫວເລິກຈະຂຶ້ນມາທຳຮ້າຍພວກເພິ່ນ, ຈະເອົາຊະນະພວກເພິ່ນ ແລະ ຂ້າພວກເພິ່ນ. ຊາກສົບຂອງພະຍານທັງສອງຈະຖືກຖິ້ມຢູ່ເທິງຖະໜົນແຫ່ງນະຄອນໃຫຍ່ ເຊິ່ງຖືກປຽບທຽບວ່າເປັນໂຊໂດມ ແລະ ເອຢິບ. ບ່ອນທີ່ອົງພຣະຜູ້ເປັນເຈົ້າຂອງພວກເພິ່ນໄດ້ຖືກຄຶງເທິງໄມ້ກາງແຂນ. ຕະຫລອດສາມວັນເຄິ່ງນັ້ນຄົນຈຳນວນໜຶ່ງຈາກທຸກກຸ່ມຄົນ, ທຸກຊົນເຜົ່າ, ທຸກພາສາ ແລະ ທຸກປະເທດຈະມາຈ້ອງເບິ່ງສົບຂອງພວກເພິ່ນ ແລະ ບໍ່ຍອມໃຫ້ຝັງສົບ. ຜູ້ອາໄສຢູ່ໃນແຜ່ນດິນໂລກຈະເບິ່ງສົບຂອງພວກເພິ່ນດ້ວຍຄວາມດີໃຈ ແລະ ຈະສະເຫລີມສະຫລອງໂດຍໃຫ້ຂອງຂັວນແກ່ກັນ, ເພາະຜູ້ທຳນວາຍທັງສອງນີ້ໄດ້ທໍລະມານບັນດາຜູ້ທີ່ອາໄສຢູ່ໃນໂລກ.
ແຕ່ຫລັງຈາກສາມວັນເຄິ່ງແລ້ວລົມຫາຍໃຈ2ແຫ່ງຊີວິດຈາກພຣະເຈົ້າກໍໄດ້ເຂົ້າໃນສົບນັ້ນ, ພວກເພິ່ນທັງສອງຈຶ່ງລຸກຢືນຂຶ້ນ, ຄົນທີ່ພົບເຫັນກໍຢ້ານກົວຫລາຍ. ແລ້ວພວກເພິ່ນກໍໄດ້ຍິນສຽງດັງຈາກສະຫວັນກ່າວກັບພວກເພິ່ນວ່າ, “ຈົ່ງຂຶ້ນມາທີ່ນີ້”. ແລ້ວພະຍານທັງສອງນັ້ນກໍຂຶ້ນໄປໃນເມກສູ່ສະຫວັນ ຂະນະທີ່ສັດຕູທັງຫລາຍຂອງພວກເພິ່ນເບິ່ງຢູ່.
ໃນຊົ່ວໂມງນັ້ນເອງກໍເກີດແຜ່ນດິນໄຫວຢ່າງຮ້າຍແຮງ ແລະ ໜຶ່ງສ່ວນສິບຂອງເມືອງນັ້ນໄດ້ຖະຫລົ່ມລົງ. ມີຄົນຕາຍເຈັດພັນຄົນໃນແຜ່ນດິນໄຫວຄັ້ງນີ້, ສ່ວນຜູ້ທີ່ລອດຊີວິດກໍຕົກໃຈຢ້ານ ແລະ ຖວາຍກຽດຕິຍົດແກ່ພຣະເຈົ້າແຫ່ງຟ້າສະຫວັນ.
ວິບັດທີສອງໄດ້ຜ່ານພົ້ນໄປ, ວິບັດທີສາມຈະມາເຖິງໃນໄວໆນີ້.
ແກທີເຈັດ
ເທວະດາຕົນທີເຈັດເປົ່າແກຂອງຕົນ ແລະ ມີສຽງດັງຫລາຍສຽງໃນສະຫວັນ ເຊິ່ງກ່າວວ່າ:
“ອານາຈັກຂອງໂລກນີ້ໄດ້ກາຍເປັນ
ອານາຈັກຂອງອົງພຣະຜູ້ເປັນເຈົ້າຂອງພວກເຮົາ ແລະ ເປັນຂອງພຣະຄຣິດເຈົ້າຂອງພຣະອົງແລ້ວ
ແລະ ພຣະອົງຈະປົກຄອງຕະຫລອດໄປເປັນນິດ”.
ແລ້ວຜູ້ອາວຸໂສທັງຊາວສີ່ທ່ານທີ່ນັ່ງເທິງບັນດາບັນລັງຂອງຕົນຕໍ່ໜ້າພຣະເຈົ້າ ກໍໝອບໜ້າລົງນະມັດສະການພຣະເຈົ້າ, ໂດຍກ່າວວ່າ:
“ພວກຂ້ານ້ອຍທັງຫລາຍຂອບພຣະຄຸນພຣະອົງ, ອົງພຣະຜູ້ເປັນເຈົ້າພຣະເຈົ້າຜູ້ລິດອຳນາດຍິ່ງໃຫຍ່,
ຜູ້ດຳລົງຢູ່ໃນປັດຈຸບັນ ແລະ ຜູ້ດຳລົງຢູ່ໃນອະດີດ,
ເພາະພຣະອົງໄດ້ສະແດງລິດອຳນາດອັນຍິ່ງໃຫຍ່ຂອງພຣະອົງ
ແລະ ໄດ້ເລີ່ມປົກຄອງແລ້ວ.
ບັນດາປະຊາຊາດກໍໂກດຮ້າຍ,
ແຕ່ຄວາມໂກດຮ້າຍຂອງພຣະອົງມາເຖິງແລ້ວ.
ເວລານັ້ນໄດ້ມາເຖິງແລ້ວສຳລັບພິພາກສາຄົນທີ່ໄດ້ຕາຍແລ້ວ,
ແລະ ເພື່ອມອບບຳເໜັດແກ່ບັນດາຜູ້ທຳນວາຍຜູ້ຮັບໃຊ້ຂອງພຣະອົງ
ແລະ ແກ່ບັນດາຄົນຂອງພຣະອົງຜູ້ທີ່ຢຳເກງນາມຂອງພຣະອົງ
ທັງຜູ້ໃຫຍ່ ແລະ ຜູ້ນ້ອຍ
ແລະ ເປັນເວລາສຳລັບການທຳລາຍບັນດາຜູ້ທີ່ທຳລາຍໂລກ”.
ແລ້ວວິຫານຂອງພຣະເຈົ້າໃນສະຫວັນກໍເປີດອອກ ແລະ ຂ້າພະເຈົ້າໄດ້ເຫັນຫີບພັນທະສັນຍາພາຍໃນວິຫານຂອງພຣະອົງ. ແລະ ທີ່ນັ້ນເກີດຟ້າແມບເຫລື້ອມ, ສຽງດັງ, ສຽງຟ້າຮ້ອງ, ແຜ່ນດິນໄຫວ ແລະ ພາຍຸໝາກເຫັບຕົກຢ່າງຮ້າຍແຮງ.
Source notes (2)
- Footnote ຊກຢ 4:3,11,14
- Footnote ອຊກ 37:5,14
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.