Biblica® Open Lao Contemporary Version
ລູກາ 17
ຄວາມບາບ, ຄວາມເຊື່ອ ແລະ ໜ້າທີ່
ພຣະເຢຊູເຈົ້າກ່າວກັບພວກສາວົກຂອງພຣະອົງວ່າ: “ສິ່ງທີ່ເປັນຕົ້ນເຫດໃຫ້ຄົນສະດຸດລົ້ມຈະມີມາແນ່ນອນ, ແຕ່ວິບັດແກ່ທຸກຄົນທີ່ເປັນຕົ້ນເຫດໃຫ້ສິ່ງເຫລົ່ານັ້ນມາ. ເອົາຫີນໂມ້ແປ້ງຜູກໃສ່ຄໍຂອງພວກເຂົາແລ້ວຖິ້ມລົງໃນທະເລກໍຍັງດີກວ່າປ່ອຍໃຫ້ພວກເຂົາເປັນຕົ້ນເຫດເຮັດໃຫ້ຄົນໜຶ່ງໃນຜູ້ເລັກນ້ອຍເຫລົ່ານີ້ສະດຸດລົ້ມ. ດັ່ງນັ້ນ ຈົ່ງລະວັງໃຫ້ດີ.
“ຖ້າພີ່ນ້ອງຂອງພວກເຈົ້າເຮັດບາບຕໍ່ພວກເຈົ້າ, ຈົ່ງຕັກເຕືອນພວກເຂົາ ແລະ ຖ້າພວກເຂົາກັບໃຈໃໝ່ ຈົ່ງອະໄພໃຫ້ພວກເຂົາ. ເຖິງແມ່ນວ່າພວກເຂົາໄດ້ເຮັດບາບຕໍ່ເຈົ້າເຈັດເທື່ອໃນວັນດຽວ ແລະ ກັບມາຫາເຈົ້າເຈັດເທື່ອແລ້ວເວົ້າວ່າ, ‘ຂ້ອຍກັບໃຈໃໝ່ແລ້ວ’ ພວກເຈົ້າຈະຕ້ອງຍົກໂທດໃຫ້ພວກເຂົາ”.
ພວກອັກຄະສາວົກເວົ້າຕໍ່ອົງພຣະຜູ້ເປັນເຈົ້າວ່າ, “ຂໍເພີ່ມເຕີມຄວາມເຊື່ອຂອງພວກຂ້ານ້ອຍດ້ວຍ!”
ພຣະອົງຕອບວ່າ, “ຖ້າພວກເຈົ້າມີຄວາມເຊື່ອພຽງເລັກນ້ອຍເທົ່າແກ່ນຜັກກາດເມັດໜຶ່ງ, ພວກເຈົ້າຈະສັ່ງຕົ້ນມອນນີ້ວ່າ, ‘ຈົ່ງຖອນຮາກອອກໄປປູກໃນທະເລ’ ແລະ ມັນກໍຈະເຊື່ອຟັງພວກເຈົ້າ.
“ສົມມຸດວ່າຄົນໜຶ່ງໃນພວກເຈົ້າມີຄົນຮັບໃຊ້ໄຖນາ ຫລື ເບິ່ງແຍງແກະ. ເມື່ອຄົນຮັບໃຊ້ກັບມາຈາກທົ່ງນາລາວຈະບອກຄົນຮັບໃຊ້ຄົນນັ້ນບໍວ່າ, ‘ມາດຽວນີ້ ມານັ່ງກິນອາຫານ’? ລາວຈະບໍ່ເວົ້າບໍວ່າ, ‘ຈົ່ງຕຽມອາຫານຄໍ່າໃຫ້ເຮົາ, ຕຽມໂຕໃຫ້ພ້ອມ ແລະ ເຝົ້າຮັບໃຊ້ເຮົາໃນຂະນະທີ່ເຮົາກິນ ແລະ ດື່ມ, ຫລັງຈາກນັ້ນເຈົ້າຈຶ່ງກິນ ແລະ ດື່ມ’? ນາຍຈະຂອບໃຈຄົນຮັບໃຊ້ເພາະລາວໄດ້ເຮັດຕາມຄຳສັ່ງບໍ? ດັ່ງນັ້ນ ພວກເຈົ້າກໍເໝືອນກັນ, ເມື່ອພວກເຈົ້າໄດ້ປະຕິບັດທຸກສິ່ງຕາມຄຳສັ່ງທີ່ໃຫ້ເຮັດແລ້ວ ກໍຄວນເວົ້າວ່າ, ‘ພວກຂ້ານ້ອຍເປັນຄົນຮັບໃຊ້ທີ່ບໍ່ມີຄຸນຄ່າ, ພວກຂ້ານ້ອຍພຽງແຕ່ໄດ້ເຮັດຕາມໜ້າທີ່ຂອງພວກຂ້ານ້ອຍເທົ່ານັ້ນ’ ”.
ພຣະເຢຊູເຈົ້າຮັກສາຄົນຂີ້ທູດສິບຄົນ
ລະຫວ່າງທາງໄປເຢຣູຊາເລັມ, ພຣະເຢຊູເຈົ້າໄດ້ເດີນທາງໄປຕາມເຂດແດນລະຫວ່າງແຂວງຊາມາເຣຍ ແລະ ຄາລີເລ. ຂະນະທີ່ພຣະອົງໄດ້ເຂົ້າໄປໃນໝູ່ບ້ານແຫ່ງໜຶ່ງ, ມີຊາຍຂີ້ທູດ1ສິບຄົນລໍຖ້າພົບພຣະອົງ. ພວກເຂົາຢືນຢູ່ແຕ່ໄກ. ພວກເຂົາຮ້ອງສຽງດັງວ່າ, “ພຣະເຢຊູເຈົ້າ ນາຍເອີຍ, ສົງສານພວກເຮົາດ້ວຍ!”
ເມື່ອພຣະອົງເຫັນພວກເຂົາກໍກ່າວວ່າ, “ຈົ່ງໄປສະແດງໂຕກັບພວກປະໂລຫິດ”. ຂະນະທີ່ພວກເຂົາກຳລັງຍ່າງໄປນັ້ນ ພວກເຂົາກໍຫາຍດີ.
ຄົນໜຶ່ງໃນພວກເຂົາເມື່ອເຫັນວ່າຕົນໄດ້ດີພະຍາດແລ້ວຈຶ່ງກັບມາ ແລະ ສັນລະເສີນພຣະເຈົ້າດ້ວຍສຽງດັງ. ລາວຖິ້ມໂຕລົງທີ່ຕີນຂອງພຣະເຢຊູເຈົ້າແລ້ວຂອບພຣະຄຸນພຣະອົງ. ລາວເປັນຊາວຊາມາເຣຍ.
ພຣະເຢຊູເຈົ້າຖາມວ່າ, “ມີສິບຄົນດີພະຍາດບໍ່ແມ່ນບໍ? ອີກເກົ້າຄົນນັ້ນຢູ່ໃສ? ບໍ່ມີຈັກຄົນກັບຄືນມາສັນລະເສີນພຣະເຈົ້ານອກຈາກຄົນຕ່າງຊາດຄົນນີ້ບໍ?” ແລ້ວພຣະອົງຈຶ່ງກ່າວກັບລາວວ່າ, “ຈົ່ງລຸກຂຶ້ນ ແລະ ໄປສາ ຄວາມເຊື່ອຂອງເຈົ້າເຮັດໃຫ້ເຈົ້າດີພະຍາດແລ້ວ”.
ການມາປາກົດຂອງອານາຈັກພຣະເຈົ້າ
(ມທ 24:37-39)
ຄັ້ງໜຶ່ງ ມີພວກຟາຣີຊາຍໄດ້ຖາມວ່າອານາຈັກຂອງພຣະເຈົ້າຈະມາເຖິງເມື່ອໃດ, ພຣະເຢຊູເຈົ້າຕອບວ່າ, “ການມາຂອງອານາຈັກຂອງພຣະເຈົ້າບໍ່ແມ່ນສິ່ງທີ່ສັງເກດໄດ້, ຫລື ຄົນທັງຫລາຍຈະບໍ່ເວົ້າວ່າ, ‘ອານາຈັກນັ້ນຢູ່ທີ່ນີ້’ ຫລື ‘ຢູ່ທີ່ນັ້ນ’ ເພາະອານາຈັກຂອງພຣະເຈົ້າຢູ່ໃນທ່າມກາງ2ພວກເຈົ້າ”.
ຫລັງຈາກນັ້ນ ພຣະອົງກໍກ່າວກັບພວກສາວົກວ່າ, “ເວລານັ້ນຈະມາເຖິງເມື່ອພວກເຈົ້າຢາກຈະເຫັນພຽງແຕ່ວັນໜຶ່ງຂອງບຸດມະນຸດ ແຕ່ພວກເຈົ້າຈະບໍ່ເຫັນ. ຄົນທັງຫລາຍຈະບອກພວກເຈົ້າວ່າ, ‘ພຣະອົງຢູ່ທີ່ນັ້ນ!’ ຫລື ‘ພຣະອົງຢູ່ທີ່ນີ້!’ ຢ່າໄປແລ່ນຕາມພວກເຂົາ. ດ້ວຍວ່າ ໃນວັນຂອງບຸດມະນຸດ3ຈະມາເໝືອນດັ່ງສາຍຟ້າແມບທີ່ສ່ອງແສງສະຫວ່າງຈາກຂອບຟ້າເບື້ອງໜຶ່ງຈົນເຖິງຂອບຟ້າອີກເບື້ອງໜຶ່ງ. ແຕ່ກ່ອນໜ້ານັ້ນ ພຣະອົງຕ້ອງທົນທຸກທໍລະມານຫລາຍຢ່າງ ແລະ ຄົນໃນສະໄໝນີ້ຈະປະຕິເສດພຣະອົງ.
“ເຫດການໃນສະໄໝຂອງໂນອາເປັນຢ່າງໃດ ໃນສະໄໝຂອງບຸດມະນຸດກໍຈະເປັນຢ່າງນັ້ນ, ຄົນທັງຫລາຍໄດ້ກິນ, ໄດ້ດື່ມ, ໄດ້ແຕ່ງງານ ແລະ ໄດ້ຍົກໃຫ້ເປັນຜົວເມຍກັນຈົນເຖິງວັນທີ່ໂນອາໄດ້ເຂົ້າໄປໃນເຮືອ. ຫລັງຈາກນັ້ນ ນ້ຳກໍມາຖ້ວມ ແລະ ໄດ້ທຳລາຍພວກເຂົາທັງໝົດ.
“ໃນສະໄໝຂອງໂລດກໍເໝືອນກັນ. ຄົນທັງຫລາຍໄດ້ກິນ ແລະ ໄດ້ດື່ມ, ໄດ້ຊື້ ແລະ ໄດ້ຂາຍ, ໄດ້ປູກຝັງ ແລະ ໄດ້ກໍ່ສ້າງ. ແຕ່ໃນວັນທີ່ໂລດໄດ້ອອກໄປຈາກເມືອງໂຊໂດມ, ໄຟ ແລະ ມາດໄດ້ຕົກມາຈາກຟ້າ ແລະ ໄດ້ທຳລາຍພວກເຂົາທຸກຄົນ.
“ຈະເປັນດັ່ງນີ້ແຫລະໃນວັນທີ່ບຸດມະນຸດມາ. ໃນວັນນັ້ນ ຄົນທີ່ຢູ່ເທິງຫລັງຄາ, ກໍບໍ່ຕ້ອງລົງມາເພື່ອເກັບເອົາສິ່ງຂອງທີ່ຢູ່ໃນເຮືອນ. ເຊັ່ນດຽວກັນກັບຄົນທີ່ຢູ່ໃນທົ່ງນາກໍບໍ່ຕ້ອງກັບຄືນມາເອົາສິ່ງໃດ. ຈົ່ງລະນຶກເຖິງເມຍຂອງໂລດ! ຜູ້ໃດກໍຕາມທີ່ພະຍາຍາມຮັກສາຊີວິດຂອງຕົນ ຜູ້ນັ້ນຈະເສຍຊີວິດ, ແລະ ຜູ້ໃດກໍຕາມທີ່ສະຫລະຊີວິດ ຜູ້ນັ້ນກໍຮັກສາຊີວິດໄວ້. ເຮົາບອກພວກເຈົ້າວ່າ, ໃນຄືນນັ້ນຈະມີສອງຄົນນອນຢູ່ໃນຕຽງດຽວກັນ ຄົນໜຶ່ງຈະຖືກຮັບໄປ ແລະ ອີກຄົນໜຶ່ງຈະຖືກປະໄວ້. ຈະມີຍິງສອງຄົນກຳລັງໂມ້ແປ້ງຢູ່ນຳກັນ ຄົນໜຶ່ງຈະຖືກຮັບໄປ ແລະ ອີກຄົນໜຶ່ງຈະຖືກປະໄວ້4”. ສອງຄົນຢູ່ໃນທົ່ງນາ ຄົນໜຶ່ງຈະຖືກຮັບໄປ ແລະ ອີກຄົນໜຶ່ງຈະຖືກປະໄວ້.5
ພວກເຂົາຖາມວ່າ, “ຢູ່ບ່ອນໃດ, ອົງພຣະຜູ້ເປັນເຈົ້າ?”
ພຣະອົງຕອບວ່າ, “ຊາກສົບຢູ່ບ່ອນໃດ ຝູງແຮ້ງກໍຈະເຕົ້າໂຮມກັນຢູ່ບ່ອນນັ້ນ”.
Source notes (5)
- Footnote ຄຳໃນພາສາກຣີກອາດໝາຍເຖິງ ພະຍາດຜິວໜັງຕ່າງໆ ບໍ່ຈຳເປັນຕ້ອງໝາຍເຖິງ ພະຍາດຂີ້ທູດເທົ່ານັ້ນ
- Footnote ຫລື ຢູ່ພາຍໃນ
- Footnote ເອກະສານເກົ່າທີ່ຂຽນດ້ວຍມືບໍ່ມີຄຳວ່າ ໃນວັນຂອງພຣະອົງ
- Footnote ເອກະສານເກົ່າທີ່ຂຽນດ້ວຍມືບາງສະບັບວ່າ ຖືກຖິ້ມໄວ້
- Footnote ຕົ້ນສະບັບເກົ່າແກ່ບາງສະບັບບໍ່ມີຂໍ້ນີ້
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.