Biblica® Open Lao Contemporary Version
ປະຖົມມະການ 29
ຢາໂຄບມາເຖິງປັດດານອາຣາມ
ແລ້ວຢາໂຄບກໍໄດ້ເດີນທາງຕໍ່ໄປ ແລະ ມາເຖິງດິນແດນຂອງປະຊາຊົນຊາວຕາເວັນອອກ. ຢູ່ທີ່ນັ້ນ ເພິ່ນໄດ້ເຫັນນ້ຳສ້າງໜ່ວຍໜຶ່ງໃນກາງທົ່ງ, ມີແກະສາມຝູງນອນຢູ່ໃກ້ກັບນ້ຳສ້າງ ເພາະຝູງແກະເຄີຍໄດ້ກິນນ້ຳຈາກນ້ຳສ້າງນັ້ນ. ກ້ອນຫີນທີ່ຢູ່ເທິງປາກນ້ຳສ້າງນັ້ນໃຫຍ່ຫລາຍ. ເມື່ອຝູງແກະທັງໝົດມາເຕົ້າໂຮມກັນຢູ່ທີ່ນັ້ນແລ້ວ, ບັນດາຄົນລ້ຽງແກະກໍຈະຊ່ວຍກັນກື່ງກ້ອນຫີນອອກຈາກປາກນ້ຳສ້າງ ແລະ ຕັກນ້ຳໃຫ້ຝູງແກະກິນ. ແລ້ວພວກເຂົາກໍຈະເອົາກ້ອນຫີນປິດປາກນ້ຳສ້າງໄວ້ຄືນຄືເກົ່າ.
ຢາໂຄບໄດ້ຖາມບັນດາຄົນລ້ຽງແກະວ່າ, “ພີ່ນ້ອງທັງຫລາຍຂອງເຮົາ, ພວກເຈົ້າມາຈາກໃສ?”
ພວກເຂົາຕອບວ່າ, “ພວກເຮົາມາຈາກຮາຣານ”.
ແລ້ວຢາໂຄບຈຶ່ງເວົ້າກັບພວກເຂົາວ່າ, “ພວກເຈົ້າຮູ້ຈັກລາບານ ຫລານຊາຍຂອງນາໂຮບໍ?”
ພວກເຂົາຕອບວ່າ, “ຮູ້, ພວກເຮົາຮູ້ຈັກເພິ່ນ”.
ແລ້ວຢາໂຄບກໍໄດ້ຖາມພວກເຂົາອີກວ່າ, “ເພິ່ນສະບາຍດີບໍ?”
ພວກເຂົາຕອບວ່າ, “ເພິ່ນສະບາຍດີ, ແລະ ນີ້ເດນາງຣາເຊັນ ລູກສາວຂອງເພິ່ນກຳລັງມາພ້ອມກັບຝູງແກະ”.
ຢາໂຄບໄດ້ເວົ້າວ່າ “ເບິ່ງແມ ຍັງເວັນຢູ່; ຍັງບໍ່ເຖິງເວລາທີ່ຝູງແກະຈະມາເຕົ້າໂຮມກັນ. ຈົ່ງໃຫ້ນ້ຳຝູງແກະດື່ມແລ້ວນຳຝູງແກະເຫລົ່ານັ້ນກັບໄປກິນຫຍ້າຕໍ່”.
ພວກເຂົາໄດ້ຕອບວ່າ, “ພວກເຮົາເຮັດບໍ່ໄດ້, ຕ້ອງລໍຖ້າຈົນກວ່າຝູງແກະທັງໝົດມາເຕົ້າໂຮມກັນກ່ອນ ແລ້ວພວກເຮົາຈຶ່ງຈະກື່ງກ້ອນຫີນອອກຈາກປາກນ້ຳສ້າງ. ຫລັງຈາກນັ້ນ ພວກເຮົາຈຶ່ງໃຫ້ນ້ຳຝູງແກະ”.
ໃນຂະນະທີ່ຢາໂຄບກຳລັງເວົ້າກັບພວກເຂົາຢູ່ນັ້ນ, ນາງຣາເຊັນກໍມາເຖິງພ້ອມກັບຝູງແກະຂອງພໍ່ຂອງນາງ, ເພາະວ່ານາງເປັນຄົນລ້ຽງແກະ. ເມື່ອຢາໂຄບເຫັນນາງຣາເຊັນລູກສາວຂອງລາບານຜູ້ທີ່ເປັນລຸງຂອງຕົນ ແລະ ຝູງແກະຂອງລາບານ, ລາວຈຶ່ງໄປທີ່ນ້ຳສ້າງ ແລະ ກື່ງກ້ອນຫີນອອກຈາກປາກນ້ຳສ້າງ ແລະ ໃຫ້ນ້ຳແກ່ຝູງແກະຂອງລຸງຂອງຕົນ. ແລ້ວຢາໂຄບກໍຈູບນາງຣາເຊັນ ແລະ ເລີ່ມຮ້ອງໄຫ້ສຽງດັງ. ລາວໄດ້ບອກນາງຣາເຊັນວ່າລາວເປັນຍາດພີ່ນ້ອງທາງພໍ່ຂອງນາງ ແລະ ເປັນລູກຊາຍຂອງນາງເຣເບກາ. ດັ່ງນັ້ນ ນາງຈຶ່ງແລ່ນໄປບອກພໍ່ຂອງນາງ.
ທັນທີທີ່ລາບານໄດ້ຍິນເລື່ອງຂອງຢາໂຄບ ລູກຊາຍຂອງນ້ອງສາວຂອງເພິ່ນ, ເພິ່ນກໍຟ້າວອອກມາພົບຢາໂຄບ. ລາບານໄດ້ກອດ ແລະ ຈູບຢາໂຄບ ແລະ ໄດ້ພາລາວເມືອເຮືອນຂອງຕົນ, ແລ້ວຢາໂຄບກໍໄດ້ເລົ່າເລື່ອງທັງໝົດໃຫ້ເພິ່ນຟັງ. ແລ້ວລາບານໄດ້ກ່າວກັບຢາໂຄບວ່າ, “ເຈົ້າເປັນເລືອດເນື້ອເຊື້ອໄຂຂອງຂ້ອຍເອງ”.
ຢາໂຄບແຕ່ງງານກັບເລອາ ແລະ ຣາເຊັນ
ຫລັງຈາກທີ່ຢາໂຄບພັກຢູ່ກັບລາບານໄດ້ໜຶ່ງເດືອນເຕັມແລ້ວ, ລາບານໄດ້ເວົ້າກັບຢາໂຄບວ່າ, “ຍ້ອນເຈົ້າເປັນຍາດພີ່ນ້ອງຂອງຂ້ອຍ, ເຈົ້າຈະເຮັດວຽກໃຫ້ຂ້ອຍໂດຍບໍ່ເອົາຄ່າຕອບແທນຫຍັງບໍ? ຈົ່ງບອກຂ້ອຍວ່າຄ່າຈ້າງຂອງເຈົ້າຄວນຈະເປັນເທົ່າໃດ?”
ບັດນີ້ ລາບານມີລູກສາວສອງຄົນ; ຜູ້ເອື້ອຍຊື່ເລອາ ຜູ້ນ້ອງຊື່ນາງຣາເຊັນ. ເລອາສາຍຕາບໍ່ດີ, ແຕ່ນາງຣາເຊັນມີຮູບຮ່າງທີ່ໜ້າຮັກ ແລະ ເປັນຄົນງາມ. ຢາໂຄບຮັກນາງຣາເຊັນ ແລະ ກ່າວວ່າ, “ຫລານຈະເຮັດວຽກໃຫ້ລຸງເຈັດປີເພື່ອແລກກັບນາງຣາເຊັນລູກສາວຜູ້ນ້ອຍຂອງລຸງ”.
ລາບານໄດ້ກ່າວວ່າ, “ລຸງຈະຍົກນາງໃຫ້ຫລານກໍດີກວ່າຍົກໃຫ້ຊາຍອື່ນ. ຈົ່ງຢູ່ກັບລຸງທີ່ນີ້”. ດັ່ງນັ້ນ ຢາໂຄບຈຶ່ງຮັບໃຊ້ເຈັດປີເພື່ອຈະໄດ້ນາງຣາເຊັນ, ແຕ່ເຈັດປີເໝືອນກັບວ່າບໍ່ພໍເທົ່າໃດວັນສຳລັບຢາໂຄບ ເພາະຄວາມຮັກທີ່ລາວມີຕໍ່ນາງ.
ແລ້ວຢາໂຄບໄດ້ເວົ້າກັບລາບານວ່າ, “ຫລານໄດ້ເຮັດວຽກຄົບຕາມສັນຍາແລ້ວ, ຂໍຈົ່ງມອບເມຍຂອງຫລານໃຫ້ຫລານສາ, ຫລານຕ້ອງການຈະຮ່ວມຫລັບນອນກັບນາງ”.
ດັ່ງນັ້ນ ລາບານຈຶ່ງໄດ້ເຊີນປະຊາຊົນທັງໝົດໃນບ່ອນນັ້ນມາຮວມກັນ ແລະ ຈັດງານລ້ຽງຂຶ້ນ. ແຕ່ພໍຄ່ຳມາ, ລາບານກໍໄດ້ເອົາເລອາລູກສາວຂອງຕົນມາໃຫ້ຢາໂຄບ ແລະ ຢາໂຄບກໍໄດ້ຮ່ວມຫລັບນອນກັບນາງ. ແລະ ລາບານໄດ້ຍົກຄົນຮັບໃຊ້ຊື່ຊີລະປາໃຫ້ເປັນຄົນຮັບໃຊ້ຂອງນາງເລອາ.
ເມື່ອເຊົ້າມາ, ກໍເຫັນວ່າແມ່ນນາງເລອາຢູ່ທີ່ນັ້ນ! ດັ່ງນັ້ນ ຢາໂຄບຈຶ່ງເວົ້າຕໍ່ລາບານວ່າ, “ເປັນຫຍັງລຸງຈຶ່ງເຮັດແບບນີ້ກັບຫລານ? ຫລານໄດ້ຮັບໃຊ້ລຸງເພື່ອນາງຣາເຊັນບໍ່ແມ່ນບໍ? ເປັນຫຍັງລຸງຈຶ່ງຫລອກລວງຫລານ?”
ລາບານຈຶ່ງຕອບວ່າ, “ມັນບໍ່ແມ່ນທຳນຽມຂອງພວກເຮົາຢູ່ທີ່ນີ້ທີ່ຈະໃຫ້ນ້ອງສາວແຕ່ງງານກ່ອນເອື້ອຍ. ຂໍໃຫ້ງານລ້ຽງແຕ່ງງານຂອງນາງເລອາອາທິດນີ້ຈົບລົງກ່ອນ; ແລ້ວພວກເຮົາຈະຍົກລູກສາວຄົນນ້ອຍໃຫ້ເໝືອນກັນ, ເພື່ອແລກກັບການເຮັດວຽກອີກເຈັດປີ”.
ແລະ ຢາໂຄບກໍໄດ້ເຮັດຕາມນັ້ນ. ເມື່ອລາວຢູ່ກັບນາງເລອາຄົບອາທິດໜຶ່ງແລ້ວ, ລາບານກໍໄດ້ຍົກນາງຣາເຊັນລູກສາວຂອງຕົນໃຫ້ເປັນເມຍຢາໂຄບ. ລາບານໄດ້ຍົກຄົນຮັບໃຊ້ຊື່ນາງບິນຮາໃຫ້ເປັນຄົນຮັບໃຊ້ຂອງນາງຣາເຊັນ. ຢາໂຄບໄດ້ຮ່ວມຫລັບນອນກັບນາງຣາເຊັນເໝືອນກັນ ແລະ ຄວາມຮັກຂອງລາວຕໍ່ນາງຣາເຊັນກໍຫລາຍກວ່າຄວາມຮັກຂອງລາວຕໍ່ນາງເລອາ. ແລະ ລາວໄດ້ເຮັດວຽກໃຫ້ລາບານອີກເຈັດປີ.
ບັນດາລູກຂອງຢາໂຄບ
ເມື່ອພຣະເຈົ້າຢາເວເຫັນວ່ານາງເລອາບໍ່ໄດ້ຮັບຄວາມຮັກ, ພຣະອົງຈຶ່ງໃຫ້ນາງຖືພາ, ແຕ່ນາງຣາເຊັນຍັງບໍ່ມີລູກ. ນາງເລອາກໍຖືພາ ແລະ ເກີດລູກຊາຍຄົນໜຶ່ງ. ນາງຕັ້ງຊື່ໃຫ້ລາວວ່າຣູເບັນ,1 ເພາະນາງເວົ້າວ່າ, “ເປັນເພາະພຣະເຈົ້າຢາເວໄດ້ເຫັນຄວາມທຸກໃຈຂອງຂ້ານ້ອຍ. ບັດນີ້ ຜົວຂອງຂ້ານ້ອຍຈະຮັກຂ້ານ້ອຍຢ່າງແນ່ນອນ”.
ແລ້ວນາງກໍໄດ້ຖືພາອີກ ແລະ ເມື່ອນາງເກີດລູກຊາຍຄົນໜຶ່ງ ນາງຈຶ່ງເວົ້າວ່າ, “ເພາະພຣະເຈົ້າຢາເວໄດ້ຍິນວ່າຂ້ານ້ອຍບໍ່ໄດ້ຮັບຄວາມຮັກ, ພຣະອົງຈຶ່ງໄດ້ໃຫ້ລູກຊາຍຄົນນີ້ແກ່ຂ້ານ້ອຍດ້ວຍ”. ດັ່ງນັ້ນ ນາງຈຶ່ງຕັ້ງຊື່ໃຫ້ລາວວ່າຊີເມໂອນ.2
ນາງໄດ້ຖືພາອີກ ແລະ ເມື່ອນາງເກີດລູກຊາຍຄົນໜຶ່ງ ນາງຈຶ່ງໄດ້ເວົ້າວ່າ, “ໃນທີ່ສຸດຜົວຂອງຂ້ານ້ອຍຈະມາຜູກພັນຢູ່ກັບຂ້ານ້ອຍ ເພາະຂ້ານ້ອຍໄດ້ເກີດລູກຊາຍສາມຄົນໃຫ້ເພິ່ນແລ້ວ”. ດັ່ງນັ້ນ ນາງຈຶ່ງໄດ້ຕັ້ງຊື່ລາວວ່າເລວີ.3
ນາງໄດ້ຖືພາອີກ ແລະ ເມື່ອນາງເກີດລູກຊາຍຄົນໜຶ່ງ ນາງກໍໄດ້ເວົ້າວ່າ, “ເທື່ອນີ້ຂ້ານ້ອຍຈະສັນລະເສີນພຣະເຈົ້າຢາເວ”. ດັ່ງນັ້ນ ນາງຈຶ່ງຕັ້ງຊື່ໃຫ້ລາວວ່າຢູດາ.4 ແລ້ວນາງກໍຢຸດຕິການມີລູກ.
Source notes (4)
- Footnote ຄຳວ່າ ຣູເບັນ ມີສຽງຄ້າຍຄຳພາສາເຮັບເຣີທີ່ມີຄວາມໝາຍວ່າ ພຣະອົງເຫັນຄວາມທຸກຍາກຂອງຂ້ານ້ອຍ ຊື່ ຣູເບັນ ແປວ່າ ເຫັນ, ລູກຊາຍຄົນໜຶ່ງ
- Footnote ອາດມີຄວາມໝາຍວ່າ ຜູ້ທີ່ໄດ້ຍິນ
- Footnote ຄຳວ່າ ເລວີ ມີສຽງຄ້າຍ ແລະ ອາດມາຈາກຄຳພາສາເຮັບເຣີທີ່ມີຄວາມໝາຍວ່າ ຜູກພັນ
- Footnote ຄຳວ່າ ຢູດາ ມີສຽງຄ້າຍ ແລະ ອາດມາຈາກຄຳພາສາເຮັບເຣີທີ່ມີຄວາມໝາຍວ່າ ສັນລະເສີນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.