Biblica® Open Lao Contemporary Version
ປະຖົມມະການ 26
ອີຊາກ ແລະ ອາບີເມເຫລັກ
(ປຖກ 12:10-20; 20:1-18)
ບັດນີ້ ນອກຈາກການອຶດຢາກອາຫານທີ່ເຄີຍເກີດຂຶ້ນໃນສະໄໝຂອງອັບຣາຮາມກໍຍັງມີການອຶດຢາກອາຫານໃນດິນແດນນັ້ນ, ແລ້ວອີຊາກຈຶ່ງໄດ້ໄປຫາອາບີເມເຫລັກ ກະສັດຂອງຊາວຟີລິດສະຕິນທີ່ເມືອງເກຣາກ. ພຣະເຈົ້າຢາເວໄດ້ປາກົດແກ່ອີຊາກ ແລະ ໄດ້ກ່າວວ່າ, “ຢ່າລົງໄປທີ່ເອຢິບ; ຈົ່ງອາໄສຢູ່ໃນດິນແດນນີ້ບ່ອນທີ່ເຮົາບອກເຈົ້າໃຫ້ອາໄສຢູ່. ຈົ່ງຢູ່ໃນດິນແດນນີ້ຊົ່ວຂະນະໜຶ່ງ, ເຮົາຈະຢູ່ກັບເຈົ້າ ແລະ ຈະອວຍພອນເຈົ້າ. ເພາະເຮົາຈະມອບດິນແດນທັງໝົດນີ້ໃຫ້ແກ່ເຈົ້າ ແລະ ເຊື້ອສາຍຂອງເຈົ້າ ແລະ ຈະຢືນຢັນຄຳປະຕິຍານທີ່ເຮົາໄດ້ສາບານໄວ້ກັບອັບຣາຮາມພໍ່ຂອງເຈົ້າ. ເຮົາຈະເຮັດໃຫ້ເຊື້ອສາຍຂອງເຈົ້າມີຈຳນວນຫລວງຫລາຍເໝືອນດັ່ງດວງດາວໃນທ້ອງຟ້າ ແລະ ຈະມອບດິນແດນທັງໝົດນີ້ໃຫ້ແກ່ພວກເຂົາ ແລະ ໂດຍຜ່ານທາງເຊື້ອສາຍ1ຂອງເຈົ້າ ຊົນຊາດທັງໝົດເທິງແຜ່ນດິນໂລກຈະໄດ້ຮັບພອນ2, ເພາະອັບຣາຮາມໄດ້ເຊື່ອຟັງເຮົາ ແລະ ເຮັດທຸກສິ່ງທີ່ເຮົາຕ້ອງການໃຫ້ລາວເຮັດ ໂດຍການຮັກສາຄຳສັ່ງຂອງເຮົາ, ຂໍ້ກຳນົດ ແລະ ຄຳແນະນຳຕ່າງໆຂອງເຮົາ”. ດັ່ງນັ້ນ ອີຊາກຈຶ່ງຍັງອາໄສຢູ່ທີ່ເມືອງເກຣາກ.
ເມື່ອມີພວກຜູ້ຊາຍຢູ່ທີ່ນັ້ນຖາມເລື່ອງເມຍຂອງເພິ່ນ, ເພິ່ນກໍຕອບວ່າ, “ນາງເປັນນ້ອງສາວຂອງຂ້າພະເຈົ້າ” ເພາະເພິ່ນຢ້ານທີ່ຈະບອກວ່າ, “ນາງເປັນເມຍຂອງຂ້າພະເຈົ້າ” ເພິ່ນຄິດວ່າ, “ພວກຜູ້ຊາຍທີ່ຢູ່ທີ່ນີ້ອາດຈະຂ້າຂ້ອຍຍ້ອນນາງເຣເບກາ ເພາະນາງເປັນຄົນງາມຫລາຍ”.
ເມື່ອອີຊາກໄດ້ຢູ່ທີ່ນັ້ນເປັນເວລາດົນນານແລ້ວ, ອາບີເມເຫລັກກະສັດຂອງຊາວຟີລິດສະຕີນເບິ່ງລົງມາຈາກປ່ອງຢ້ຽມ ແລະ ເຫັນອີຊາກກອດເຣເບກາເມຍຂອງເພິ່ນຢູ່. ດັ່ງນັ້ນ ອາບີເມເຫລັກຈຶ່ງເອີ້ນອີຊາກມາ ແລະ ກ່າວວ່າ, “ແທ້ຈິງແລ້ວນາງເປັນເມຍຂອງທ່ານ! ເປັນຫຍັງທ່ານຈຶ່ງບອກວ່າ, ‘ນາງເປັນນ້ອງສາວຂອງຂ້າພະເຈົ້າ’?”
ອີຊາກຕອບເພິ່ນວ່າ, “ເພາະຂ້າພະເຈົ້າຄິດວ່າຕົນເອງອາດຈະເສຍຊີວິດເພາະນາງ”.
ແລ້ວອາບີເມເຫລັກຈຶ່ງກ່າວວ່າ, “ເປັນຫຍັງທ່ານຈຶ່ງເຮັດກັບພວກເຮົາຢ່າງນີ້? ຖ້າຫາກວ່າມີຊາຍໃດໄປນອນກັບເມຍຂອງທ່ານ, ທ່ານກໍຈະນຳຄວາມຜິດມາຕົກໃສ່ພວກເຮົາ”.
ດັ່ງນັ້ນ ອາບີເມເຫລັກຈຶ່ງອອກຄຳສັ່ງເຖິງຄົນທັງປວງວ່າ: “ຜູ້ໃດກໍຕາມທີ່ເຮັດອັນຕະລາຍຕໍ່ຊາຍຄົນນີ້ ຫລື ເມຍຂອງລາວກໍຈະຖືກປະຫານຊີວິດຢ່າງແນ່ນອນ”.
ອີຊາກປູກພືດໃນດິນແດນນັ້ນ ແລະ ໃນປີດຽວກັນກໍເກັບກ່ຽວໄດ້ຮ້ອຍເທົ່າ, ເພາະພຣະເຈົ້າຢາເວໄດ້ອວຍພອນເພິ່ນ. ແລ້ວເພິ່ນກໍກາຍເປັນຄົນຮັ່ງມີຂຶ້ນ ແລະ ຄວາມຮັ່ງມີຂອງເພິ່ນກໍສືບຕໍ່ເພີ່ມຂຶ້ນຈົນເພິ່ນກາຍເປັນຄົນຮັ່ງມີຫລາຍ. ເພິ່ນມີຝູງແບ້, ຝູງແກະ ແລະ ຝູງງົວກັບຄົນຮັບໃຊ້ຈຳນວນຫລວງຫລາຍຈົນຊາວຟີລິດສະຕີນອິດສາເພິ່ນ. ດັ່ງນັ້ນ ນ້ຳສ້າງທັງໝົດທີ່ຄົນຮັບໃຊ້ຂອງພໍ່ຂອງເພິ່ນໄດ້ຂຸດໄວ້ໃນສະໄໝທີ່ອັບຣາຮາມພໍ່ຂອງເພິ່ນຍັງມີຊີວິດຢູ່ນັ້ນ, ຊາວຟີລິດສະຕີນໄດ້ປິດໄວ້ ດ້ວຍການເອົາດິນຖົມນ້ຳສ້າງເຫລົ່ານັ້ນ.
ແລ້ວອາບີເມເຫລັກຈຶ່ງໄດ້ເວົ້າກັບອີຊາກວ່າ, “ຈົ່ງຍ້າຍອອກໄປຈາກພວກເຮົາສາ; ທ່ານກາຍເປັນຜູ້ມີອິດທິພົນຕໍ່ພວກເຮົາຫລາຍເກີນໄປແລ້ວ”.
ດັ່ງນັ້ນ ອີຊາກຈຶ່ງໄດ້ຍ້າຍອອກຈາກທີ່ນັ້ນ ແລະ ໄປຕັ້ງຄ້າຍພັກຢູ່ໃນຮ່ອມພູເກຣາກ, ເຊິ່ງເປັນບ່ອນທີ່ເພິ່ນໄດ້ຕັ້ງຖິ່ນຖານຢູ່. ອີຊາກໄດ້ເປີດນ້ຳສ້າງຕ່າງໆທີ່ໄດ້ຂຸດໄວ້ໃນສະໄໝອັບຣາຮາມພໍ່ຂອງເພິ່ນນັ້ນຄືນໃໝ່ ເຊິ່ງຊາວຟີລິດສະຕິນໄດ້ຖົມຫລັງຈາກທີ່ອັບຣາຮາມໄດ້ຕາຍໄປ ແລະ ອີຊາກກໍໄດ້ຕັ້ງຊື່ໃຫ້ນ້ຳສ້າງເຫລົ່ານັ້ນຄືກັນກັບຊື່ທີ່ພໍ່ຂອງເພິ່ນເຄີຍຕັ້ງຊື່ໃຫ້ນ້ຳສ້າງເຫລົ່ານັ້ນ.
ຄົນຮັບໃຊ້ຂອງອີຊາກໄດ້ຂຸດນ້ຳສ້າງໜ່ວຍໜຶ່ງ ແລະ ພົບນ້ຳຈືດຢູ່ທີ່ຮ່ອມພູນັ້ນ. ແຕ່ຄົນລ້ຽງສັດຂອງເມືອງເກຣາກໄດ້ຜິດຖຽງກັນກັບຄົນລ້ຽງສັດຂອງອີຊາກ ແລະ ເວົ້າວ່າ, “ນ້ຳນີ້ເປັນຂອງພວກເຮົາ!” ດັ່ງນັ້ນ ອີຊາກຈຶ່ງຕັ້ງຊື່ໃຫ້ນ້ຳສ້າງນັ້ນວ່າເອເສັກ3 ເພາະພວກເຂົາໄດ້ຜິດຖຽງກັບເພິ່ນ. ຫລັງຈາກນັ້ນ ຄົນຂອງອີຊາກຈຶ່ງຂຸດນ້ຳສ້າງຂຶ້ນອີກໜ່ວຍໜຶ່ງ, ແຕ່ພວກເຂົາກໍຜິດຖຽງກັນເລື່ອງນ້ຳສ້າງນັ້ນເໝືອນກັນ. ດັ່ງນັ້ນ ເພິ່ນຈຶ່ງຕັ້ງຊື່ໃຫ້ນ້ຳສ້າງນັ້ນວ່າສິດນາ.4 ເພິ່ນໄດ້ຍົກຍ້າຍອອກໄປຈາກທີ່ນັ້ນ ແລະ ຂຸດນ້ຳສ້າງອີກໜ່ວຍໜຶ່ງ, ເທື່ອນີ້ບໍ່ມີຜູ້ໃດມາຜິດຖຽງເລື່ອງນ້ຳສ້າງອີກ. ເພິ່ນຈຶ່ງຕັ້ງຊື່ໃຫ້ນ້ຳສ້າງນັ້ນວ່າເຣໂຮໂບດ,5 ເພິ່ນໄດ້ກ່າວວ່າ, “ບັດນີ້ ພຣະເຈົ້າຢາເວໄດ້ໃຫ້ບ່ອນພວກເຮົາແລ້ວ ແລະ ພວກເຮົາຈະຈະເລີນຮຸ່ງເຮືອງຂຶ້ນໃນດິນແດນນີ້”.
ຈາກທີ່ນັ້ນ ເພິ່ນໄດ້ຂຶ້ນໄປຍັງເບເອນເຊບາ. ໃນຄືນນັ້ນ ພຣະເຈົ້າຢາເວໄດ້ປາກົດແກ່ເພິ່ນ ແລະ ກ່າວວ່າ, “ເຮົາຄືພຣະເຈົ້າຂອງອັບຣາຮາມພໍ່ຂອງເຈົ້າ. ຢ່າຢ້ານເລີຍ, ເພາະເຮົາຢູ່ກັບເຈົ້າ; ເຮົາຈະອວຍພອນເຈົ້າ ແລະ ຈະໃຫ້ເຊື້ອສາຍຂອງເຈົ້າທະວີຈຳນວນຂຶ້ນເພາະເຫັນແກ່ອັບຣາຮາມຜູ້ຮັບໃຊ້ຂອງເຮົາ”.
ອີຊາກຈຶ່ງໄດ້ສ້າງແທ່ນບູຊາຂຶ້ນຢູ່ທີ່ນັ້ນ ແລະ ຮ້ອງອອກນາມຂອງພຣະເຈົ້າຢາເວ. ເພິ່ນໄດ້ຕັ້ງເຕັນຂອງເພິ່ນຂຶ້ນຢູ່ທີ່ນັ້ນ ແລະ ຄົນຮັບໃຊ້ຂອງເພິ່ນກໍຂຸດນ້ຳສ້າງຂຶ້ນໜຶ່ງໜ່ວຍຢູ່ທີ່ນັ້ນດ້ວຍ.
ໃນເວລາດຽວກັນນັ້ນ, ອາບີເມເຫລັກ ແລະ ອາຮູຊາດທີ່ປຶກສາສ່ວນຕົວຂອງເພິ່ນ ແລະ ແມ່ທັບຟີໂກນ ກໍໄດ້ເດີນທາງຈາກເມືອງເກຣາກເພື່ອມາພົບອີຊາກ. ອີຊາກຖາມພວກເພິ່ນວ່າ, “ເປັນຫຍັງພວກທ່ານຈຶ່ງມາຫາຂ້າພະເຈົ້າ, ໃນເມື່ອພວກທ່ານເປັນສັດຕູຕໍ່ຂ້າພະເຈົ້າ ແລະ ຂັບໄລ່ຂ້າພະເຈົ້າອອກມາ?”
ພວກເພິ່ນຕອບວ່າ, “ພວກເຮົາເຫັນຊັດເຈນແລ້ວວ່າ, ພຣະເຈົ້າຢາເວຢູ່ກັບທ່ານ; ດັ່ງນັ້ນ ພວກເຮົາຈຶ່ງໄດ້ເວົ້າກັນວ່າ, ‘ຄວນຈະເຮັດຂໍ້ຕົກລົງສາບານກັນລະຫວ່າງພວກເຮົາ’ ຄືລະຫວ່າງພວກເຮົາກັບທ່ານ. ໃຫ້ພວກເຮົາເຮັດສົນທິສັນຍາກັບທ່ານ ເພື່ອວ່າທ່ານຈະບໍ່ທຳຮ້າຍພວກເຮົາ ເໝືອນທີ່ພວກເຮົາບໍ່ໄດ້ທຳຮ້າຍທ່ານ ແຕ່ໄດ້ປະຕິບັດຕໍ່ທ່ານເປັນຢ່າງດີຕະຫລອດມາ ແລະ ໄດ້ສົ່ງທ່ານໜີໄປຢ່າງສັນຕິ. ແລະ ບັດນີ້ ທ່ານໄດ້ຮັບພອນຈາກພຣະເຈົ້າຢາເວ”.
ອີຊາກຈຶ່ງໄດ້ຈັດງານລ້ຽງໃຫ້ພວກເຂົາ ແລະ ພວກເຂົາກໍໄດ້ກິນ ແລະ ໄດ້ດື່ມ. ແຕ່ເຊົ້າໆຂອງວັນຕໍ່ມາ ພວກຜູ້ຊາຍເຫລົ່ານັ້ນກໍໄດ້ປະຕິຍານສາບານຕໍ່ກັນ. ຫລັງຈາກນັ້ນ ອີຊາກກໍໄດ້ສົ່ງພວກເຂົາໃຫ້ເດີນທາງຕໍ່ໄປ ແລະ ພວກເຂົາກໍຈາກໄປຢ່າງມີສັນຕິ.
ໃນວັນນັ້ນ ຄົນຮັບໃຊ້ຂອງອີຊາກໄດ້ມາບອກເພິ່ນເລື່ອງນ້ຳສ້າງທີ່ພວກເຂົາໄດ້ຂຸດ. ພວກເຂົາໄດ້ເວົ້າວ່າ, “ພວກເຮົາພົບນ້ຳແລ້ວ!” ເພິ່ນຈຶ່ງຕັ້ງຊື່ໃຫ້ນ້ຳສ້າງນັ້ນວ່າຊີບາ6 ແລະ ເມືອງນັ້ນຈຶ່ງໄດ້ຊື່ວ່າເບເອນເຊບາ7ມາຈົນມາເຖິງທຸກວັນນີ້.
ຢາໂຄບເອົາພອນຂອງເອຊາວ
ເມື່ອເອຊາວອາຍຸໄດ້ 40 ປີ, ເພິ່ນກໍໄດ້ແຕ່ງງານກັບຢູດິດລູກສາວຂອງເບເອີຣີຊາວຮິດຕີ ແລະ ບາເສມາດລູກສາວຂອງເອໂລນຊາວຮິດຕີ. ພວກເຂົາເປັນຕົ້ນເຫດເຮັດໃຫ້ອີຊາກ ແລະ ເຣເບກາໂສກເສົ້າເສຍໃຈ.
Source notes (7)
- Footnote ຫລື ເມັດພັນ
- Footnote ຫລື ຊົນຊາດທັງປວງເທິງແຜ່ນດິນໂລກຈະນຳໃຊ້ຊື່ຂອງເຊື້ອສາຍຂອງເຈົ້າໃນການອວຍພອນ (ເບິ່ງ 48:20)
- Footnote ແປວ່າ ຜິດຖຽງ
- Footnote ແປວ່າ ການເປັນສັດຕູກັນ
- Footnote ແປວ່າ ທີ່ຫວ່າງ
- Footnote ແປວ່າ ຄຳສາບານ ຫລື ເຈັດ ກໍໄດ້
- Footnote ແປວ່າ ນ້ຳສ້າງແຫ່ງຄຳສາບານ ຫລື ນ້ຳສ້າງແຫ່ງເຈັດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.