Biblica® Open Lao Contemporary Version
ດານີເອນ 1
ການຝຶກຝົນຂອງດານີເອນໃນບາບີໂລນ
ໃນປີທີສາມຂອງການປົກຄອງຂອງກະສັດເຢໂຮຍອາກິມແຫ່ງຢູດາຍ, ກະສັດເນບູກາດເນັດຊາແຫ່ງບາບີໂລນໄດ້ມາທີ່ເຢຣູຊາເລັມ ແລະ ອ້ອມເມືອງໄວ້. ແລະ ອົງພຣະຜູ້ເປັນເຈົ້າໄດ້ມອບກະສັດເຢໂຮຍອາກິມແຫ່ງຢູດາຍ, ພ້ອມທັງເຄື່ອງໃຊ້ບາງຢ່າງຈາກວິຫານຂອງພຣະເຈົ້າໄວ້ໃນມືຂອງເພິ່ນ. ເນບູກາດເນັດຊາໄດ້ນຳເອົາສິ່ງເຫລົ່ານີ້ໄປທີ່ວິຫານຂອງພະຂອງເພິ່ນໃນບາບີໂລນ1 ແລະ ໄດ້ເກັບໄວ້ໃນຄັງຊັບສົມບັດຂອງພະຂອງຕົນ.
ແລ້ວກະສັດໄດ້ສັ່ງອັດຊະເປນັດ ຜູ້ທີ່ເປັນຫົວໜ້າຂ້າລາຊະການໃນວັງຂອງຕົນ, ໃຫ້ນໍາເອົາຊາວອິດສະຣາເອນບາງຄົນມາຈາກເຊື້ອສາຍຂອງກະສັດ ແລະ ຢູ່ໃນຕະກຸນຂຸນນາງເພື່ອຮັບໃຊ້ກະສັດ. ຊາຍໜຸ່ມທີ່ມີບໍ່ຂໍ້ບົກຜ່ອງທາງຮ່າງກາຍ, ງາມ, ສະຫລາດພ້ອມທີ່ຈະຮຽນຮູ້, ໄດ້ຮັບການສຶກສາອົບຮົມມາເປັນຢ່າງດີ, ມີໄຫວພິບດີ ແລະ ຄຸນສົມບັດເໝາະສົມທີ່ຈະຮັບໃຊ້ໃນວັງຂອງກະສັດ. ໃຫ້ອັດຊະເປນັດສອນພາສາ ແລະ ວັນນະຄະດີຂອງຊາວບາບີໂລນ2ໃຫ້ແກ່ພວກເຂົາ. ກະສັດໄດ້ຈັດອາຫານ ແລະ ເຫລົ້າອະງຸ່ນຈາກໂຕະອາຫານຂອງກະສັດໃຫ້ພວກເຂົາໃນແຕ່ລະມື້ ແລະ ພວກເຂົາຕ້ອງໄດ້ຮັບການຝຶກຝົນເປັນເວລາສາມປີ, ແລ້ວຫລັງຈາກນັ້ນ ພວກເຂົາຈະຕ້ອງເຂົ້າມາຮັບໃຊ້ກະສັດ.
ໃນບັນດາຜູ້ທີ່ຖືກເລືອກເຫລົ່ານັ້ນ ບາງຄົນຈາກຢູດາຍມີດັ່ງນີ້: ດານີເອນ, ຮານານີຢາ, ມີຊາເອນ ແລະ ອາຊາຣີຢາ. ຫົວໜ້າຂ້າລາຊະການໄດ້ຕັ້ງຊື່ໃໝ່ໃຫ້ພວກເຂົາດັ່ງນີ້: ດານີເອນມີຊື່ວ່າເບັນເຕຊັດຊາເຣ, ຮານານີຢາມີຊື່ວ່າຊັດຣາກ, ມີຊາເອນມີຊື່ວ່າເມຊາກ ແລະ ອາຊາຣີຢາມີຊື່ວ່າອາເບັດເນໂກ.
ແຕ່ດານີເອນໄດ້ຕັ້ງໃຈວ່າຈະບໍ່ຍອມໃຫ້ຕົນເອງເປັນມົນທິນຍ້ອນອາຫານ ແລະ ເຫລົ້າອະງຸ່ນຂອງກະສັດ, ແລ້ວລາວຈຶ່ງຂໍອະນຸຍາດຈາກຫົວໜ້າຂ້າລາຊະການທີ່ຈະບໍ່ໃຫ້ຕົນເອງເປັນມົນທິນໃນເລື່ອງນີ້. ບັດນີ້ ພຣະເຈົ້າກໍໄດ້ເຮັດໃຫ້ຫົວໜ້າຂ້າລາຊະການນັ້ນພໍໃຈ ແລະ ເຫັນໃຈດານີເອນ, ລາວຈຶ່ງບອກດານີເອນວ່າ, “ຂ້ອຍຢ້ານກະສັດຜູ້ເປັນເຈົ້ານາຍຂອງຂ້ອຍ, ເຊິ່ງເປັນຜູ້ຈັດອາຫານ ແລະ ເຄື່ອງດື່ມໃຫ້ພວກເຈົ້າ. ຖ້າຂ້ອຍປ່ອຍໃຫ້ເພິ່ນເຫັນພວກເຈົ້າເບິ່ງບໍ່ງາມກວ່າຊາຍໜຸ່ມຄົນອື່ນໄວດຽວກັນກັບພວກເຈົ້າ? ກະສັດອາດຈະຕັດຫົວຂອງຂ້ອຍເພາະພວກເຈົ້າ”.
ແລ້ວດານີເອນຈຶ່ງບອກຄົນຍາມ ເຊິ່ງເປັນຫົວໜ້າຂ້າລາຊະການທີ່ໄດ້ແຕ່ງຕັ້ງໃຫ້ຮັບຜິດຊອບດານີເອນ, ຮານານີຢາ, ມີຊາເອນ ແລະ ອາຊາຣີຢາວ່າ, “ຂໍທົດລອງຜູ້ຮັບໃຊ້ຂອງທ່ານເປັນເວລາສິບວັນຄື: ຢ່າເອົາຫຍັງໃຫ້ພວກເຮົາ ນອກຈາກຜັກເພື່ອກິນ ແລະ ນ້ຳເພື່ອດື່ມ. ແລ້ວຈົ່ງປຽບທຽບໜ້າຕາຂອງພວກເຮົາກັບຊາຍໜຸ່ມທີ່ກິນອາຫານຂອງກະສັດ, ຫລັງຈາກນັ້ນ ຂໍໃຫ້ທ່ານປະຕິບັດຕໍ່ຜູ້ຮັບໃຊ້ຂອງທ່ານຕາມທີ່ທ່ານເຫັນສົມຄວນ”. ດັ່ງນັ້ນ ຄົນຍາມກໍໄດ້ຕົກລົງຕາມນີ້ ແລະ ໃຫ້ພວກເຂົາທົດລອງເປັນເວລາສິບວັນ.
ເມື່ອຄົບສິບແລ້ວ ກໍປາກົດວ່າພວກເຂົາມີສຸຂະພາບດີ ແລະ ໄດ້ຮັບການບຳລຸງລ້ຽງດີກວ່າຊາຍໜຸ່ມທີ່ກິນອາຫານຂອງກະສັດ. ດັ່ງນັ້ນ ຄົນຍາມຈຶ່ງງົດໃຫ້ອາຫານ ແລະ ເຫລົ້າອະງຸ່ນແກ່ພວກເຂົາ ແຕ່ໄດ້ເອົາຜັກໃຫ້ພວກເຂົາ.
ພຣະເຈົ້າໄດ້ໃຫ້ຊາຍໜຸ່ມທັງສີ່ຄົນເຫລົ່ານີ້ມີຄວາມຮູ້ຄວາມເຂົ້າໃຈໃນດ້ານວັນນະຄະດີ ແລະ ການຮຽນຮູ້ທຸກຢ່າງ. ແລ້ວດານີເອນນັ້ນກໍສາມາດເຂົ້າໃຈນິມິດ ແລະ ຄວາມຝັນທຸກປະເພດ.
ເມື່ອຄົບກຳນົດຕາມທີ່ກະສັດຕ້ອງສັ່ງໃຫ້ນໍາເອົາພວກເຂົາເຂົ້າມາຮັບໃຊ້ເພິ່ນ, ຂ້າລາຊະການກໍໄດ້ນຳເອົາພວກເຂົາທັງໝົດເຂົ້າພົບກະສັດເນບູກາດເນັດຊາ. ກະສັດໄດ້ສົນທະນາກັບພວກເຂົາ ແລະ ເພິ່ນກໍພົບວ່າບໍ່ມີຊາຍໜຸ່ມຄົນໃດທຽບເທົ່າກັບດານີເອນ, ຮານານີຢາ, ມີຊາເອນ ແລະ ອາຊາຣີຢາໄດ້; ດັ່ງນັ້ນ ພວກເຂົາສີ່ຄົນຈຶ່ງໄດ້ເຂົ້າໄປຮັບໃຊ້ກະສັດ. ກະສັດໄດ້ຖາມພວກເຂົາທຸກເລື່ອງໃນດ້ານສະຕິປັນຍາ ແລະ ຄວາມເຂົ້າໃຈ, ເພິ່ນກໍພົບວ່າພວກເຂົາດີເດັ່ນກວ່າພວກນັກຫລິ້ນອາຄົມ ແລະ ພວກນັກຫລິ້ນເວດມົນໃນທົ່ວອານາຈັກຂອງເພິ່ນເຖິງສິບເທົ່າ.
ແລ້ວດານີເອນກໍໄດ້ຮັບໃຊ້ຢູ່ທີ່ນັ້ນຕະຫລອດມາຈົນເຖິງປີທີໜຶ່ງແຫ່ງການປົກຄອງຂອງກະສັດໄຊຣັດ.
Source notes (2)
- Footnote ພາສາເຮັບເຣີວ່າ ຊີນາ
- Footnote ຫລື ຊາວຄານເດອາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.