Biblica® Open Lao Contemporary Version
2 ຕີໂມທຽວ 1
ຈົດໝາຍສະບັບນີ້ຈາກເຮົາໂປໂລ, ຜູ້ເປັນອັກຄະສາວົກຂອງພຣະຄຣິດເຈົ້າເຢຊູໂດຍຄວາມປະສົງຂອງພຣະເຈົ້າຕາມສັນຍາແຫ່ງຊີວິດທີ່ຢູ່ໃນພຣະຄຣິດເຈົ້າເຢຊູ,
ເຖິງ ຕີໂມທຽວລູກທີ່ຮັກຂອງເຮົາ:
ຂໍໃຫ້ພຣະຄຸນ, ຄວາມເມດຕາ ແລະ ສັນຕິສຸກຈາກພຣະເຈົ້າພຣະບິດາ ແລະ ພຣະເຢຊູຄຣິດເຈົ້າອົງພຣະຜູ້ເປັນເຈົ້າຂອງພວກເຮົາຈົ່ງມີແກ່ເຈົ້າ.
ໂມທະນາຂອບພຣະຄຸນພຣະເຈົ້າ
ເຮົາຂອບພຣະຄຸນພຣະເຈົ້າ, ພຣະອົງຜູ້ທີ່ເຮົາຮັບໃຊ້, ເຊັ່ນດຽວກັນກັບບັນພະບຸລຸດຂອງເຮົາໄດ້ກະທຳ ດ້ວຍຈິດສຳນຶກອັນໃສສະອາດ, ທັງກາງເວັນ ແລະ ກາງຄືນເຮົາໄດ້ລະນຶກເຖິງເຈົ້າໃນຄຳອະທິຖານຢູ່ສະເໝີ. ເມື່ອເຮົາລະນຶກເຖິງນ້ຳຕາຂອງເຈົ້າ, ເຮົາກໍປາຖະໜາຈະມາຫາເຈົ້າ ເພື່ອວ່າເຮົາຈະໄດ້ເຕັມດ້ວຍຄວາມຊື່ນຊົມຍິນດີ. ເຮົາໄດ້ຄິດເຖິງຄວາມເຊື່ອອັນຈິງໃຈຂອງເຈົ້າ ເຊິ່ງຕອນທຳອິດກໍມີຢູ່ໃນນາງໂລອີ ແມ່ເຖົ້າຂອງເຈົ້າ ແລະ ໃນນາງຢູນີເກ ແມ່ຂອງເຈົ້າ ແລະ ເຮົາເຊື່ອວ່າບັດນີ້ກໍມີຢູ່ໃນເຈົ້າເໝືອນກັນ.
ຮຽກຮ້ອງໃຫ້ຈົງຮັກພັກດີຕໍ່ໂປໂລ ແລະ ຕໍ່ຂ່າວປະເສີດ
ດ້ວຍເຫດນີ້ ເຮົາຈຶ່ງຂໍເຕືອນເຈົ້າວ່າຈົ່ງເຮັດໃຫ້ຂອງປະທານຂອງພຣະເຈົ້າທີ່ມີຢູ່ໃນເຈົ້າຜ່ານທາງການວາງມືຂອງເຮົານັ້ນຈະເລີນຮຸ່ງເຮືອງ1ຫລາຍຂຶ້ນ. ເພາະພຣະວິນຍານທີ່ພຣະເຈົ້າໄດ້ໃຫ້ພວກເຮົານັ້ນບໍ່ໄດ້ເຮັດໃຫ້ພວກເຮົາມີໃຈອັນຢ້ານກົວ ແຕ່ມອບລິດອຳນາດ, ຄວາມຮັກ ແລະ ການຮູ້ຈັກບັງຄັບຕົນໃຫ້ແກ່ພວກເຮົາ.
ດັ່ງນັ້ນ ຢ່າລະອາຍທີ່ຈະເປັນພະຍານເລື່ອງອົງພຣະຜູ້ເປັນເຈົ້າຂອງພວກເຮົາ ຫລື ລະອາຍໃນເລື່ອງເຮົາຜູ້ຖືກຈຳຈອງເພື່ອພຣະອົງ. ແຕ່ຈົ່ງຮ່ວມທົນທຸກກັບເຮົາເພື່ອຂ່າວປະເສີດໂດຍລິດອຳນາດຂອງພຣະເຈົ້າ. ພຣະອົງໄດ້ໄຖ່ພວກເຮົາໃຫ້ພົ້ນ ແລະ ໄດ້ເອີ້ນພວກເຮົາມາສູ່ຊີວິດທີ່ບໍລິສຸດ ບໍ່ແມ່ນເພາະການກະທຳໃດໆທີ່ພວກເຮົາໄດ້ເຮັດ ແຕ່ເພາະປະສົງ ແລະ ພຣະຄຸນຂອງພຣະອົງເອງ. ພຣະຄຸນນີ້ໄດ້ມອບໃຫ້ແກ່ພວກເຮົາໃນພຣະຄຣິດເຈົ້າເຢຊູຕັ້ງແຕ່ກ່ອນຈຸດເລີ່ມຕົ້ນຂອງເວລາ. ແຕ່ບັດນີ້ ໄດ້ເປີດເຜີຍຜ່ານທາງການມາປາກົດຂອງພຣະຄຣິດເຈົ້າເຢຊູພຣະຜູ້ຊ່ວຍໃຫ້ພົ້ນຂອງພວກເຮົາ ຜູ້ໄດ້ທຳລາຍຄວາມຕາຍ ແລະ ໄດ້ນຳຊີວິດ ແລະ ຄວາມເປັນອະມະຕະມາສູ່ຄວາມສະຫວ່າງຜ່ານທາງຂ່າວປະເສີດ ແລະ ໄດ້ແຕ່ງຕັ້ງເຮົາໃຫ້ເປັນຜູ້ປະກາດ, ເປັນອັກຄະສາວົກ ແລະ ເປັນຄູສອນຂ່າວປະເສີດນີ້. ດ້ວຍເຫດນີ້ ເຮົາກຳລັງທົນທຸກເໝືອນທີ່ເຮົາເປັນຢູ່. ແຕ່ເຮົາກໍບໍ່ອາຍ ເພາະວ່າເຮົາຮູ້ຈັກພຣະອົງຜູ້ທີ່ເຮົາໄດ້ເຊື່ອ ແລະ ເຮົາໝັ້ນໃຈວ່າພຣະອົງສາມາດເບິ່ງແຍງຮັກສາສິ່ງທີ່ເຮົາໄດ້ມອບໄວ້ກັບພຣະອົງຈົນເຖິງວັນນັ້ນໄດ້.
ຈົ່ງຢຶດຖືແບບຢ່າງຂອງຄຳສອນອັນມີຫລັກທີ່ເຈົ້າໄດ້ຍິນຈາກເຮົາດ້ວຍຄວາມເຊື່ອ ແລະ ຄວາມຮັກໃນພຣະຄຣິດເຈົ້າເຢຊູ. ຈົ່ງປົກປ້ອງຮັກສາຂໍ້ແນະນຳອັນດີທີ່ໄດ້ມອບໝາຍໃຫ້ແກ່ເຈົ້ານັ້ນ ຈົ່ງຮັກສາໄວ້ໂດຍການຊ່ວຍເຫລືອຈາກພຣະວິນຍານບໍລິສຸດເຈົ້າຜູ້ຢູ່ໃນພວກເຮົາທັງຫລາຍ.
ແບບຢ່າງຂອງຄວາມບໍ່ຈົງຮັກພັກດີ ແລະ ຄວາມຈົງຮັກພັກດີ
ເຈົ້າກໍຮູ້ວ່າ ທຸກຄົນໃນແຂວງເອເຊຍກໍໄດ້ປະຖິ້ມເຮົາ ລວມທັງຟູເຄໂລ ແລະ ເຮຣະໂມເກນ.
ຂໍໃຫ້ອົງພຣະຜູ້ເປັນເຈົ້າສະແດງຄວາມເມດຕາແກ່ຄອບຄົວຂອງໂອເນຊີໂຟໂຣ ເພາະລາວເຮັດໃຫ້ເຮົາຊື່ນໃຈເລື້ອຍໆ ແລະ ບໍ່ລະອາຍທີ່ເຮົາຖືກລ່າມໂສ້ຢູ່. ກົງກັນຂ້າມ, ເມື່ອລາວຢູ່ໃນນະຄອນໂຣມ ລາວກໍພະຍາຍາມຊອກຫາເຮົາຈົນພົບ. ຂໍໃຫ້ອົງພຣະຜູ້ເປັນເຈົ້າຊ່ວຍໃຫ້ລາວໄດ້ພົບຄວາມເມດຕາຈາກອົງພຣະຜູ້ເປັນເຈົ້າໃນວັນນັ້ນດ້ວຍ! ເຈົ້າກໍຮູ້ດີແລ້ວວ່າເມື່ອຢູ່ທີ່ເມືອງເອເຟໂຊ ລາວໄດ້ຊ່ວຍເຫລືອເຮົາໃນຫລາຍໆດ້ານ.
Source notes (1)
- Footnote ພັດໃຫ້ເປັນໄຟຂຶ້ນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.