Lamma Bible Translation Project
Roomayi 15:13
Verse 13 is marked below, with the whole chapter around it. Read from the start
Pɔ̃ Mɛzɔ̃yi i Nta a tɔ̃vɨntɔ Ɓa a Yuu Ɓa
U shɔgbete ai sisɨn ãnɛ lakitɔ miyi, kɔritɔ u pɔ̃si shɔgbete ai sisɨn ãnɛ laki ɓam i naatɔ, ukɔ ɔrinɛ ɔ yuukɔ sheeli. Aru nankɔ u pɛli shɔ sisɨn ãnɛ gãsiyi jo vitɔ̃vɨng, nɔgbete i yɛ ɓaa ai sisɨn ãnɛ yɛ. Aru kirisi ji tasi ɔrinɛ ɓau yuukɔ sheeli ɓa, a nyabankɔ, Ɗa nyaruubii shanɛ, <<dãnɛ gbete shɔ dã wɔ sɔtɛ ang yuu.>> Vigbete shɔ bee a Ɗanyaruubii shanɛ, shɔ beerɛ nɛ shɔ matɔɔ vi, nɔgbete ɔ̃ yɛ a sisɨn pɔ̃nɛ a nyaba ɔ̃nɛ sisɨn zaza wɔɔ sɔ̃n a bi manɛ nɔgbete Ɗanyaruubii ãwɔ yɛ. Ɗalapa gbete ã shɔ sisɨn zaza a bi manɛni u ãwɔ ɔ̃nɛ binyatɔ̃nɛ a bilakinɛ a zɔni nagbete ɔkɛ gɨn kirisi Yesɔ vipɛlinɛ nɛ yɛ. Aru ɔ bassi Uɓeyelapa Ɗalapa Yesɔ kirisi a sisɨn gbete, ɔ nya u ɔ̃ jo gbete awɔ nyaba gɨnnɛni.
Ɗanyaruubii a Shɔgbete i ɓa Yahudawayi Atete
Ɔ tɛɛ zɔ nakaziti nɔgbete Kirisi tɛɛ nakaziti yɛ, aru Uɓeyelapa Ɗalapa nii bassinɛ. Aru n gelɔɔtɛ Kirisi vishonɛ si aru shɔ Yahudawayi yuu, u tasi rutɔ̃vɨng a Ɗalapa yuu gbete si Ɗalapa matɛ a mɛwuruyini yɛ u ɔ̃ nizɛ, aru shɔgbete i ɓa yahudawayi i basi Ɗalapa tɔ au ruu raa ntanɛ. Nagbete Ɗanyaruubii shanɛ,
<<Arumkɔ n yɛn bassaatɔ a shɔgbete i ɓa yahudawayi tetteni;
n yɛn tɔ̃soo so Ɗalapa nii basinɛtɔ.>>
Sɔ̃n Ɗanyaruubii shanɛ,
<<Ɔ nta binyatɔ̃nɛtɔ shɔgbete ɔ ɓa yahudawayi ɓayi a Ɗalapa shɔ gɨnnɛ miyi ni!>>
Sɔ̃n totti Ɗanyaruubii shanɛ,
<<ɔ bassi Ɗalapa tɔ nii shɔgbete ɔ ɓa Yahudawa ɓa kpai;
ɔ bassiutɔ shɔzɛyi piti kpai!>> toti janyagadi shanɛ, <<Yessi ɓɛwuruyi iyɛ shɛtɔ;
ukɔ yɛ arɛ u ɔ̃ shɔgbete i ɓa Yahudawa ɓayi kpati,
iyɛ pɔ̃yi sisɨn jo au bikɔ.>>
Ɗalapa gbete au ukɔ ɔ̃rɛ nyaba sisɨn pɔ̃nɛ pɛlinɛ, u pɔ̃rɛ ɔ ɔ̃ a sisɨn puru wɔsɔ̃n a binyatɔ̃nɛ nɔgbete ɔ ã sisɨn a Ɗa bi ɔ yɛ ɗekɨn a ɓaanɛni a Ɗa suru kaka naa pɔ̃sinɛ.
Vishonɛ Gbete Ɗalapa ã Bulus yɛ
Masayiː N ang yuu nta vitɔ̃vɨng tɛttɔ awɔ yuuni nɛ, ɔ kpai ɔ pɛ shɔ tɔ̃vɨnyi awɔ vipɛlinɛni, ɔ vizɛnɛ aɗɔn wannɛ aru ɔ yɛtɛ nɔgbete ɔ yɛ mati zɔ vi yɛ. Ama a ɓuzɨn sẽkoo gbete n beerɔɔ mi ayuu vigbete n nwanya a kakani au yuu, n kasirɛ ɔ mabiitɔ wannɛ aru sisɨn kpaanɛ ayuu vitɔ̃vɨng gbete Ɗalapa ãng yɛni au pɔ̃rɛ nɛn n ɔ̃ Yesɔ kirisi jawɛrɛ n pɛli shɔgbete ɓa yahudawa ɓayi vishonɛ, n pɛli vishonɛ naa yupɛ̃ni nyawanɛ n aɗɔgbete n nwari shɔ Ɗalapa nyaruubii yɛ, nɔgbete Ɗalapa yɛ tɛɛ shɔgbete i ɓa yahudawa ɓayi i viyuu ãnɛ gbete wɔsɔ-wɔsɔ a Da suru kabii yɛ. Nagbete u a kirisi Yesɔni gbete, kɛɗɔn n yɛn ɓasitɔ aɗagbete nkɛ shoshi Ɗalapa vishonɛ yɛ. N yɛn nta yɛti purutɔ n nwanya ayuu vigbete kirisi pɛlin ang kabii nɔgbete n teesi shɔgbete i ɓa yahudawa ɓayi ɗekɨn i gɨn Ɗalapa nya ãsinɛ, Ɗalapa pɛli vishonɛ au nyanwanɛ wɔsɔ̃n a vigbete pɛliyɛ. A kaka gbete shovishonɛ vibiizaanɛ a vitasinɛ wɔsɔ̃n a Ɗa suru kaka, gbete pɔ̃siu naa aɗɔ rakinɛ yunɛ Urushalima yɛnɛ tipi Ilirikun aɗɔgbete nwari shɔ kirisi nyaruubii waanɛ kopi ɗɔpiya. Vigbete n kasi n pɛli a lee-lee yɛ ukɔ ɔ̃rɛ n nwari shɔ kirisi nyaruubii aɗɔgbete shɔ ji nta ɓa shãa yɛ ɓa, nɔgbete n yɛn pɔ̃naa ɓa vigbete shɔwɔ gaa yɛ ni ɓa. Nagbete Ɗanyaruubii shanɛ,
<<shɔgbete shɔ ji geliyi ruuwɔ ɓa au yuuni ɓa i yɛ zɛ kati,
a shɔgbete i ji nta ɓa i yɛ zɛ dɔɔ ruu kati.>>
Bulus Maa au Sisɨn Nɛn yɛ Zati a Rooma
Kɛɗɔn vinkɔ pɔ̃rɛ wannɛ n ji kpaa yɛnɛ ɔ ɗɔbbii ɓa. Ama dɔdɔtrim n yisi nya vishonɛ pɛlinɛtɛ a tipimni si n gaatɛ saa waanɛ n awɔ ɗɔbiirɛ n zɛwɔrɛ, n kasirɛ n zɛwɔtɔ dɔdɔtrim ang nyaba yɛnɛ tipi Asbaniya, n yɛn ntaa tɔ̃vɨntɔ naa ɔ kɛ dɔ̃n naa yɛnɛ ɗɔutɔ, akɨnti gbete n nta yɛti puru zati nɔnɛtɔ awɔ ɗɔbiini, aɗagbete n ɔ̃ a ɔkɔni dɔɔ ziti yɛ. Dɔdɔrim n yɛkɛ Urushalima n nwari Ɗalapa shɔ gɨneyi ruutɔ̃vɨng aɗɔwakɔ. Aru shɔ Ɗalapa gɨnnɛ gbete i a tipi Makidoniya a tipi Akaya i ntaa binyatɔ̃nɛtɔ a vigbete i ã shɔranɛ gɨnnɛyi ai a tipi Urushalima yɛtɔ. I nta binyatɔ̃nɛtɔ a vigbete i pɛliyɛni, aru viwu ɔ̃tɛ naa vi kɔnɛ ai yuu, nagbete shɔ gɨnnɛ Yahudawa i ɓasiyutɛ ayini aru sẽrẽe gbete Ɗa ãi yɛni, ɔ̃ritɛ kaka jazɨng akɔrɔ i pɔ̃si shɔgbete i ɓa Yahudawa ɓa naa sɔ̃njo. Naa n kɛ yisi nya vishonɛm nɛ, n yɛn sɔri saa gbete n kpaari yɛrɛ piti kpai, n yɛn yairɛ n zakɛ tipi Asbaniya n zɛwɔrɛ ang nyaba zati yɛnɛ. N zɛtɛ naa nkɛ awɔ ɗɔbiinɛ, n yɛn a a tete kirisi vɔɔ susãri tasinɛ bi waanɛ.
Ama n gaki ɔtɔ masayi a Uɓeyelapa kirisi Yesɔ nii a ɔrinɛ gbete Ɗa suru ãwɔyɛ, ɔ pɔ̃sin naa jo ɔ gakinɛ Ɗa ang yuu. Ɔ gaki Ɗatɔ n ranaa a shɔgbete iji ã sisɨn ɓa a tipi Yahudiya a nɔgbete n vishonɛ aru Ɗanyaruubii nwanɛ shɔ Ɗa gɨnnɛyi a Urushalima i tɛɛtɔ nakaziti. N yɛn awɔ ɗɔbiitɔ a sisɨn puru naa Ɗa kɛ kasinɛ yɛ, n ntaa yɛti puru a binyatɔ̃nɛ a ɔkɔni aɗagbete nkɛ nɔzati sɔ̃n nɛ awɔ ɗɔbiiyɛni. Ɗalapa gbete au ɔ̃rɛ nyaba binyatɔ̃nɛ u ɔ̃ a ɔkɔni kpai. Nankɔ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.