Lamma Bible Translation Project
Tasine 20
Saa Laa Maani Ɓa Kopi
Kɛɗɔn n zɛ Ɗajashonɛlapa kɛ nɔnɛ a kolapa, sã saanyajaa too gbikiri-gbikiri au sɔ̃nya ɓa a saganya ni au naa. A sã sɔɔ pɛ̃nibaurɛ, sɔɔ gbete si tɛ̃ɛ̃tɛ̃ɛ̃ wakɔ, ukɔ ɔ̃rɛ shɔlanɛyi kpati ko japɛ̃pɛ̃ɛ, Ɗajashonɛlapa maurɛ a saganyau ni saa laa maani ɓa kopi. Ɗajashonɛlapa lokiurɛ a ɓuzɨn too gbikiri-gbikiri au sɔ̃nya ɓanni, ɓaanya toou a rɛunya rɛ, nɔgbete yɛ ɗaki shɔ tipiyi tɔkɨn ɓa, see saa laa maani ɓa kopi tɛɛtɛ, akɨnti vim shɔyɛ yaau naa sɔ̃ntɔ sekaa.
Kɛɗɔn n zɛ lakpatiyi, a shɔgbeteyi ɔ̃li aɗɔnyɛ shɔ ãi kaka ruuyeerinɛ tɛttɔ a shɔ yuuni, ang zɛ wɔsɔ̃n suruyi shɔgbete shɔ nyoyi aru i shi a Yesɔ knti, a Ɗalapa nyaruubii, ikɔi i ji bassi viɓili pɛ̃nibau ɓa au jasuru ni ɓa. I ji tɛ viɓili pɛ̃nibau vitasinɛ ɓa ai nɔkɨn ni ko ai naani ɓa, i sɔɔ sɔ̃n a suruni, i roo kpati a Kirisini saa laa maani ɓa kopi. (Gãsi shɔgbeteyi vɔliyɛ i ji sɔɔ tɔkɨn a suruni ɓa, see knti saa laa maani ɓa kopiu tɛɛpɛtɔ.) Shomkɔ pɛ ɗaa gbete shɔ gaa yusinɛ a saa yɛ. Ɗalapa u tasiyi susãritɔ bi shɔgbeteyi gaa yunɛ saa a shɔ wɔsɔ-wɔsɔni. Vɔnɛ au pɛsiyɛ u kaka ɓa ai yuuni ɓa; i yɛ ɔ̃ shɔlansi Ɗalapa a e Kirisini, i yɛ roo kpati awuni saa laa maani ɓa kopi.
Ɗashaari Shɔ a Japɛ̃pɛ̃ɛ̃ yuu
A knti saa laa maani ɓa kopin kɛ tɛɛnɛ, shɔyɛ yaa japɛ̃pɛ̃ɛ̃ naatɔ a jahmni, Yɛ arɛ u ɗaki shɔ kotipi gbeteyi satitɛttɔ kpai yɛ, kɛ ikɔyi ɔ̃rɛ Gog a magog, Japɛ̃pɛ̃ɛ̃ yɛ toliyinyarɛ kpai aru sɨn tanɛ, i yɛ sha naa seseli a nya ɓooti wapo. I sãti a kotipi piti i knti ɗɔgbete Ɗalapa shɔbiiyi tolinya a koomo pɛ̃niba au ɔriyiyɛ. Ama yaa shɛ a kolapa a shaayirɛ. Kɛɗɔn shɔlanɛ au ɗakiyiyɛ, shɔ tuurɛ shɔ lokiu a yaa kanɛ a kolo yaa, aɗɔgbete shɔ loki viɓiliu a janyagadi nyayeenɛwi siyɛ, a ɗɔwakɔ i yɛ ɓooraa niti a zɨnbani dangdang.
Ruuyeenɛ Nawasinɛ
Kɛɗɔn n zɛ lakpati puru pɛ̃niɓa a shɔu ɔ̃ au yuuyɛni. Kotipi a konyasini i nirɛ au ɗekɨn ni, shɔ ji zɛyi tɔkɨn ɓa. Kɛɗɔn n zɛ shɔ gbeteyi vɔlitɛ shɔpɛ̃nibayi a pɛ̃tɛ̃rɛni piti i shilitɛ a ɗekɨn lakpati. Labeenɛyi ɓelirɛ, kɛɗɔn labeenɛ wɔ ɓeli sɔ̃nrɛ, kɛ labeenɛ suru. Shɔ yeeri shɔ gbeteyi vɔlitɛ i ruu jo a vigbeteyi pɛlitɛttɔyɛ, ji naa gbete shɔ bee a labeenɛwi yɛ. Kɛɗɔn wapo shɛshi shɔ gbeteyi vɔli au ɓuzɨn rɛ. Vɔrɔ a saayi kotipi ikɔma i shɛshi shɔ gbeteyi vɔli aɗɔnrɛ jo. I kpai shɔ yeeriyi ruu jo nɔgbete i vishonɛ sãyɛ. Kɛɗɔn vɔrɔ à saayi ni shɔ loki a yaa kanɛ. (Yaa kanɛ ukɔ ɔ̃rɛ vɔnɛ ɓa ziti.) Shɔgbeteyi shɔ ji kpayi nii ɓa a ɓuzɨn labeenɛ surunni ɓa, shɔ lokiyirɛ a ɓuzɨn yaa kanɛ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.