Lamma Bible Translation Project
Tasine 2
Sẽkoo yɛnɛ Shɔ sisɨn Ãnɛyi bi a Afisa
<<A beeri Ɗajashonɛlapa kn shɔ sisɨn ãnɛyi a Afisa nɛ:
<<Shɔmpɛ ruu au shɛ a shɔgbeteu sã sɛyi manzii au nakɨn yɛ, au raki atette laatarimɛɛ manzii au sã yaa yɛ. <N zɛ vigbete a pɛliyɛ tɛtɔ. n zɛ nɔgbete a shovishonɛ fɛ̃ɛmyɛtɛ, a nɔgbete a mɛɛsisɨnyɛni. N zɛ tɛttɔ a tɛ shɔ gɔnlɔrɔyi naa ɓa, a nta shɔyi tɔnɛ i pɛ jashonɛyi sisɨn tɛttɔ ama i ɓa jashonɛ ɓa, a zɛrɛ i pɛ shɔnyayenɛyi. A pɛ shɔ sisɨnmɛɛnɛ, a ɓooraatɛ ang yuuni, ama a ji yɔɔɓa. Ama nkɔ a yukɔnɛ yɛm: A ji ɔrin dɔdɔrim tɔkɨn ɓa nɔgbete a ɔrin siyɛ ɓa. Kpaa sisɨn pɛ a nɔgbete a ɔrin siyɛ anɛ aɗagbete a nwesiyɛ! A yaa ruuvini pɛlinɛtɔ a pɛlijo vi a gaa pɛlinɛyɛ, a ji yaa ruuvini pɛlinɛ ɓa, n yɛn aa ɗɔbiitɔ n tuu laa au sã yaa au ɗɔu ɔ̃yɛni. Ama a kawɔ a pɛli vi tɔ̃vɨntɛ nɔgbete a bɛ̃ɛ̃ Nikolatanyi vishonɛyɛ ji naa n bɛ̃ɛ̃ yɛ.
<<Ɔ shoo kɛ ɔ̃nɛ ɗɔn, ɔ wesho a vigbete Ɗa Suru kɛ geli shɔ sisɨnɛyi nɛ mi!
<<Shɔgbete ɗashariyitɛ, n yɛn ãyi naatɔ i sha nɔlaa au n ti suru au ba a Ɗalapa jaayɛtɔ.
Sẽkoo Yɛnɛ Simirnayi
<<Beeri Ɗajashonɛlapa shɔ sisɨn ãnɛyi a Simirnayi nɛ:
<<Shɔmpɛ ruu au shɛ a shɔgbete ukɔ ɔ̃rɛ gaanɛ a nyayisinɛni, shɔu vɔyɛ a ɔ̃ sɔ̃n suruniyɛni. N zɛ a yukɔnɛ tɛttɔ; n zɛtɛttɔ a shɔraa-- ama a shɔvinaa nizɛ! N zɛ vikɔ̃linɛ gbete shɔyi tɔnɛyi Yahudawa ama i ɓa i Yadudawa ɓa i sha aa yuuni, i pɛ kn japɛ̃pɛ̃ɛ̃yi! Mɔkɔ nta setinɛ a raa a yɛ ɓooyɛni. Weshopɛ! shɔlanɛm yɛ ntawɔ sisɨntɔ, yɛ sɨnrɛ shɔ lɔki zɔ gãsiyi a jaahm, ɔ yɛ ɓooraa dɔɔ kopi. Ɔ pɔ̃ sisɨn ang bi, ko shɔ tɔnɛ shɔ nyɔwɔ vɔrɔ, n yɛn ãwɔ suru tɔ au ukɔ ɔ̃kɛrɛ vi ɗasharɔɔ au yuuniyɛ.
Ɔ shoo ntanɛ sitɛ ɗɔn, ɔ wesho a viu Ɗa Suru geli kn shɔ sisɨn ãnɛ miyi!
<<Shɔgbete ɗashariyitɛ, vɔrɔ au pɛsiyɛ, yɛ ɗiyi naa tɔkɨn a biini ɓa.
Sẽkoo Yɛnɛ Pagamum Bi
<<A bee vim yɛnɛ Ɗajashonɛlapa kn shɔ sisɨn ãnɛyi bi a Pagamum
Shɔmpɛ ruu au shɛ a shɔgbete u zali ɗɔn nya kaziti pii-pipi. N zɛ ɗɔgbete a ɔ̃ ɗɔnyɛ tɛttɔ, pɛ ɗɔgbete japɛ̃pɛ̃ɛ̃ lakpati ɗɔnyɛ. A shɔmni piti a sãn niitɔ katakata, a ji yaa sisɨn ãnɛ ɓa ang biini ɓa, ko a ɗagbete shɔ nyo Antifa n shɔshinɛkɨnti sisɨn ãnɛ tɔ̃vɨn a ɗɔgbete japɛ̃pɛ̃ɛ̃ ɔ̃yɛ. Ama nkɔ ruuvini a n kpawɔ awuni yɛmː ɔ zɔ gãsiyi awɔ tete i gɨn Balaam vimatinɛ, shɔu mati Balak u pɔ̃ Israilayi i pɛli ruuvini, i shaa vishaanɛ a shɔ nwari vigbete i suru ɓayɛ, i pɛli sɔ̃n kpantang. Sɔ̃njo nankɔ, shɔwɔyi awɔ tetteni i gɨn Nikolatanyi vimatinɛ. Dɔdɔrim a yaa ruuvini pɛlinɛtɔǃ A ji yaa ɓa, yɛ ɔ̃ ɓa dɔkɔkɔ ɓa, n yɛn atɔ n waaba a shɔwiyini a zali gbete shɛ ang nyayɛ.
Ɔ shoo kɛ ɔ̃nɛ ɗɔn, ɔ wesho a vigbete Ɗa Suru kɛ geli kn shɔ sisɨn ãnɛyi nɛm!
<< Shɔgbete ɗasharitɛ, n yɛn ãyitɔ atette vishaanɛ a shɔ ɓanɛ manna ang ɓusiyɛni. Kopiya n yɛn ãu sɔ̃n tari puru gbete shɔ bee nii sɔɔ a shɔwɔ ji zɛɓayɛni see shɔgbete au tɛ tariuyɛ.
Sẽkoo Yɛnɛ Kn Shɔ sisɨn ãnɛyi Tiyatira
<<A bee vim yɛnɛ Ɗajashonɛlapa kn shɔ sisɨn ãnɛ a Tiyatira nɛ:
<<Shɔmpɛ ruu au shɛ a Ɗa jaa nya, shɔu nɔɔ naa rɛɛti yaa, u dɔɔ kɔli naa lasaka nweri a shɔ too a yaa yɛ. N zɛvi a pɛliyɛ tɛttɔ. N zɛa ɔrinɛ tɛttɔ, aa sisɨn ãnɛni, aa vishonɛni, aa sisɨnmɛɛnɛni. N zɛtɛttɔ a vi pɛlinɛ dɔdɔrim tɛɛ shɔu a pɛli si a ɗekɨn yɛtɛ. Ama shɔmpɛ ruuvini ang kpaa awuni yɛm: a mɛɛsisɨntɛ a suu a shɔ ɓaunɛ Yezɛbelni, shɔ au ɓau yuunɛ Ɗalapa jashonɛ. Au vimatinɛ u ɗɔgbete au shɔlin n shɔ biyiyɛ, sɨnyitɛ nɛi pɛli kpantang wɔsɔ̃n nɛi shaa vishaanɛ a shɔ ã vi shɔ basiyi yɛ ai suru ɓayɛ. N ãu dii tɛ u yau ruuvinitɔ, ama ji kasiu kpantang yanɛɓa. N yɛn pɔ̃urɛ a shɔgbete i pɛli kpantang a wuni i yɛ ɓooraa fɛ̃ɛm, naa i jo yaa vikɔ̃linɛ pɛlinɛ ai pɛli awuni ɓayɛ. N yɛn nyo u shɔ gɨnɛyi sɔ̃ntɔ, kɛɗɔn kn shɔ sisɨn ãnɛyi kpai i yɛ zɛttɔ nɛ nkɔng ɔ̃rɛ shɔu zɛ kopiya, shɔ sisɨn a vi pɛlinɛni. N yɛn shori kopiya jo ji nogbete u vishonɛ sãyɛ.
<<Ama ɔ shɔ Tiyatirayi gãsi jo gɨn vimatinɛ kɔ̃linɛm ɓa; ɔ ji mati vigbete shɔ gãsiyi ɓaanɛ <japɛ̃pɛ̃ɛ̃ viɓusinɛ gaa nɛm ɓa.> n gelɔɔtɛ n yɛn pɔ̃sɔɔ vikpetinɛ wɔɔɓa. Ama ɔ̃rɔɔtɛ kaka jazɨng akɔrɔ ɔ sãwɔ sisɨn ãnɛtɔ fɛ̃ɛm seetɛng atɛ. Shɔgbete ɗashariyitɛ, i kɛ gɨn vigbete n kasiyɛnɛ yɛnɛ yisinɛ, n yɛn ãyi ji kaka gbete ang tɛ a Maye naayɛː n yɛn ãyi kaka i sã shɔ a kopiti kpai. I yɛ sã shɔ a labaa lasaka i sãkiyi ɗetɛ-ɗetɛ naa ɓari tɔ̃pɔ̃. I yɛ kpaa kaka nagbete n kpaa a Mayɛ ɗɔbii yɛ, n yɛ ãyi wɔsɔ̃n sɛ gadi ɗa kɛ shariyinɛyɛ. Aru nankɔ shɔyi sho ntanɛ ɗɔn i nta vigbete Ɗa suru geli kɨn shɔ sisɨn ãnɛyitɔ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.