Lamma Bible Translation Project
Matiyu 8
Yesɔ gati shɔ vibii wɔɔ
Aɗagbete Yesɔ notɛ a kɔpɔ, shɔ waa-ne i gɨu a kɨnti ni. Shɔ vibii wɔɔ arɛ a ɓaki yuu gboti a Yesɔ ɗekɨn ashane, << Uɓeyelapa akɛ kasine, sɔmmpɛ wɔsɔk.>>
Yesɔ ɗe naa rɛ a ɗii shɔ vibiiu rɛ.<<n kasitɛ,>>Yesɔ kasinya nɛ.<<ɔ̃ne wɔsɔkǃ>> u vibiiu gatirɛ tɛ̃ɛ̃t. Kɛɗɔn Yesɔ geliunɛ, << ntapɛ mɔkɔ geli shɔ wɔɔ nɛ. Ama yɛnɛ, a tasa a yuu a shɔlansi bi a ã Ɗalapa vigbete Musa ãsinya au yuu, nogbete shɔ zɛkɛ naa vibii yisi nya tɛ.>>
Yesɔ gati sɔja Roma jawɛrɛ
Naa Yesɔ to kafanahum tɛ, yupɛ̃ni sɔja wɔɔ a Yesɔ ɗɔ bi neu sãring naa abi. <<Uɓeyelapa, >>yupɛ̃ni sɔja shanɛ, <<n jawɛrɛ u vɔrɔ uɗɔ roone a wɛrɛ, jo zɛno rane ɓa u vɔrɔ kpokpok.>>
Yesɔ geliunɛ, << n yɛn yɛrɛ n gatiu tɔ.>>
Yupɛ̃ni sɔjau kasiu shɔ wɛrɛ nyane, <<n shɔ wɛrɛ, n jo yɛ ɓa nɔgbeten a ang wɛrɛ ɓa. Ama a nwa nya kɔ sheeli, n jawɛrɛ yɛ gati tɔ. Njong yuu npɛ shɔ nɔsisɨn, sɔjayi sɔ̃njo ang nosisɨn. n geli shɔne<yɛne,> i yɛrɛ; n geli shɔ wɔɔ nɛ,<appɛ,>arɛ. n geli n jawɛrɛ rɛ ne, <pɛli vimpɛ,> pɛli rɛ.>>
Naa Yesɔ nta vimtɛ, ɔ̃ruu kɛ vibii-zaa nɛ a geli shɔgbeteyi gɨu a knti nɛ,<<vigbeten kɛ gelɔɔ nɛn kɔ nizɛ, n jo kpaa shɔ wɔɔ ɓa Isrela ni ɓa gbete u sisɨn ãne aɗɔn nankɔ ni ɓa. Ngelɔɔ tɛ shɔ waa-ne gbeteyi sisɨn ãne aɗɔn i yɛ a aka gɨnri a paa, i ɔ̃rɛ i pɛli vi bi nyaa tɔ̃ne a Ibirayi nii a Ishayaku nii a Yakubu nii aɗagbete Ɗalapa yɛ roo kpati yɛ. Ama shɔ gbeteyi si roo kpati a Ɗa wɛrɛ ai bẽẽ a noni shɔ yɛ lokiyi a ɓili, aɗɔ kɨnri, aɗɔ gbete shɔ sɨnn rɛ a yɔɔ ntari ɗɔn.>>
Kɛɗɔn Yesɔ geli yupɛ̃ni sɔjau nɛ, <<yɛneǃ shɔ yɛ pɛlaa jo nagbete a ã sisɨn kɔ.>>A ɗawu ni tɛ̃ɛ̃ti sɔjau jawɛrɛ gati rɛ.
Yesɔ gati shɔ waa-nɛ
Naa Yesɔ atɛ a Bituru wɛrɛ, a zɛ Bituru ɓekponi soro roo tɛ aɗɔ roone, nori tuu tɔ. Yesɔ ɗii Bituru ɓekponi a naa si nori ɗɔgbete pɛliu yɛ, noriu yau rɛ, Bituru ɓekponi yulapa a gee Yesɔ nya rɛ.
A dii wɔɔ a ɗaɗɗarɛ, shɔ n ti shɔ gbeteyi suru kɔlineyi ni abi Yesɔ ɗɔ bi, Yesɔ nwa nya a shɛshi suru kɔlineyi rɛ a gati shɔ vɔrɔyi kpai. Vim ɔ̃nankɔ u sɔ̃ri nya vigbete Ɗa jaa shone Ishaya sha si tɛ̃ɛ̃tɛ̃ɛ̃ yɛː
<<Tuu vɔrɔ bi tɛ kpai
a yiki vigbeteu n tiu vɔrɔ a bi kpɛkpɛlɛ au ɗɔ bi.>>
Shɔ gbeteyi tɔnɛyi gɨn Yesɔ
Naa Yesɔ zɛtɛ mooyi tolitɛ au ɗɔ bi, a pɔ̃rɛ i tɛ ɓooti da. kɛɗɔn shɔ mala gbete tasi shɔ laabeene nya ãsine gbete Musa beeyɛ arɛ Yesɔ ɗɔ bi a shane,<<Shɔ mala, n kasi n gɨn a tɔ ɗɔ gbete a yɛ piti kpai.>>
Yesɔ kasi nya rɛ a shanɛ, <<zakulayi nya too aɗɔn, janoyi lapa i sati aɗɔn, ama jashɔzɛ u ɗɔ susune ɓa.>>
Yesɔ jaɗɔ wɔɔ shanɛ, <<ma-shɔ-wɛrɛ, yampɛ n yɛrɛ n gbã mayɛ pɛtɔ.>>
Ama Yesɔ geliunɛ, <<gɨn pɛ, a yaa shɔ gbeteyi Ɗalapa suru ɓayi bini ɓa i gbã ɓɛzɔyi rɛ.>>
Yesɔ shiri mii buu
Yesɔ to yɛti latosi mii, u jadooyi i gɨnrɛ a knti ni. Kɛɗɔn i ɗɔ yɛne a mii wapo, mii buu yurɛ waane a yɛti mii wapo, mii gãsi yurɛ to a yɛti latosi. Ama Yesɔ si ɓɛjo ɗɔ noro roone. U jadoyi i yɛu ɗɔbi a nisiu rɛ a noro, i shane, <<Uɓeyelapa, raujoǃ u kɛ vɔne.>>
Yesɔ risi nya rɛ, <<ɔ sisɨn ãne Ɗalapa bi fɛ̃ɛ̃, aru ivi ɔ nta seti nankɔ viya? >>Kɛɗɔn Yesɔ yulaparɛ a shiri sɔrɔu rɛ a mii buu ni, a ɗɔ ɔ̃rɛ shɔk laa kane ɓa.
kopiya ɔ̃ruu kɛ vi bi zaane a hɨne, << Shɔmpɛ zɔng shɔzɛ ɗɔpiya? Piti a sɔrɔ mii buu ni kpai ntau nya tɔ.>>
Yesɔ shɛshi shɔzɛ ziti suru kɔline a bi
Naa Yesɔ to nya ɓooti datɛ a tipi Ganasara, shɔzɛ ziti gbeteyi suru kɔ̃line a bini i a a saa ɗɔ gbete shɔ gbã vɔrɔ aɗɔn yɛ neu kpaa Yesɔ. I ɔ̃ri shɔ tɛ vi seti aru shɔ tɛɛ nyabau dɔɔɓa ai yuu. << Aru ne ivi ukɔni viya, Ɗa jaa? I kaanya lapa i shanɛ. Dii jo a pɛ̃nɛ̃ɓa a au ɗɔ yusho gɔ̃ne tɛ gboti ya? >>
Yɛne ɗekɨn fɛ̃ɛ̃ jaa gãnya aɗɔn pɛ̃niba shɔ gatɔ a ɗɔuni. A suru kɔ̃lineyi i gaki Yesɔ ne, << Akɛ tɔnɛn shɛshiu tɔ, nyikiu rɛ a tosiu kɛ gãnyayi bi. >>
Yesɔ geliyi nɛ, <<Ɔ yɛnɛǃ >> I shɛrɛ i tokɛ gãnyawi bi, kɛɗɔn gãnyawi a jaa ni kpai i girirɛ yɛne dii, i tɛ̃kɛ mii wapo a vɔlirɛ a yɛti mii. Shɔ gbeteyi ga gãnyayi, i yurɛ a yɛkɛ koomoo a kɔri shɔ vigbete pɛli gãnyayi, a vigbete yesɔ pɛli shɔ suru kɔlineyi ni kpai. Kɛɗɔn shɔ koowiyi kpai i shɛ ɗɔ Yesɔ kpaa nɛrɛ. Naa i zɛu tɛ, a i gakiu rɛ ne Yesɔ u yaayi dɔlaa tɔ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.