Lamma Bible Translation Project
Matiyu 25
Ruuɓusinɛ a nyarã kopi i yuu
<<Kɛɗɔn Yesɔ yɛ ɗekɨn a shanɛ ni nɛ: Ɗa kpati roonɛ yɛ ɔ̃ naa nyarã kopiyi gbete i tuu pitila iyɛ ɗɔɔ shɔ sotɛnɛ naa tɛnɛ.>> Maani ai tete i si yuu nɔtti maani gaisiyi shɔ ruu kpɛnnɛ. Shɔgbete isi yuu nɔtti maani i tuuyi pitilarɛ ama i ji sã nɔɔ wɔɔ ɓa a naani ɓa. Suu gbete i ruu kpɛnnɛ̃ aɗɔnyɛ i tɛ̃ɛ̃ nɔɔ a jakotoro lɔt gbete i yɛ tɛ̃ɛ̃ a pitila. Shɔ sotɛnɛ ji to ɓa tɛ̃ɛ̃ti ɓa, nyarãyi piti kpai i yɔrɛ a roo nororɛ.
<< Atette zɨmba shɔ kanyarɛ a ɓili nɛː shɔ sotɛnɛ u yɛmiǃ Ɔ anɛ ɔ tɛu naa.>>
<<Kɛɗɔn nyarã kopiyi i yulaparɛ i tɔ̃ri pitila rɛ. Shɔgbete i yuu nɔttiyi i geli shɔgbete i kpɛnnɛ̃wi nɛ, Ɔ gakiu nɔɔ jo; u pitila kɛ nikinɛ.>>
Shɔ ruu kpɛnnɛ̃ i kasi nyanɛ<< Yɛ pɛli ɓa, Yɛ tɛsiu ɓa a ɔkɔɔ niɓa. Ɔ yɛ ɗɔgbete shɔ mɛli aɗɔn ɔ wɔɔ rɛ.>>
<< Nyarã yuu nɔttiyi i sã nyaba yɛnɛ ɗɔɔ noo wɔɔnɛ, aɗagbete i ɓa ɗɔm ɓayɛ, shɔ sotɛnɛ arɛ ai knti. Nyarã ruu kpɛnnɛ̃ maaniyi i to ɗɔɔ yumusinɛrɛ so tɛnɛrɛ a shɔ sotɛnɛ ni, shɔ ku nyejaarɛ.>>
<< Akɨntini nyarã gãsiyi i arɛ i shanɛ. Shɔmalaǃ- Shɔmalaǃ Ɔ ɓeliu nyejaa pɛ. >>
Shɔ sotɛnɛ kasiyi nyanɛ << N gelɔɔtɛ n ji zɛɔɔ nii ɓa.>>
Kɛɗɔn Yesɔ yisi nya ruu shanɛ nɛ << Ɔ ɔ̃ nɔkãkãri aru gbete ɔ ji zɛ dii u ɓa a ɗagbete n yɛn a yɛ ɓa.>>
Ruɓusinɛ a Jawɛrɛ taati i ruu bi
<<Toti, Ɗa kpati roonɛ a kolapa yɛ ɔ̃ naa shom. Jawɔɔ si yurɛ nɛn yɛ zati, a ɓau jawɛrɛyi nyarɛ a ãi u vinaa a naa nɛyi zɛsintɔ.>> Kɛɗɔn a vasiyi saa, gaa rɛ a ã shɔwɔ lazɔrɔ maani (5,000), a ã shɔwɔ lazɔrɔ zitit (2,000), shɔwɔ sɔ̃n lazɔrɔ gbete (1,000), ãi jo nɔgbete kopiya yɛ zɛ noo sãne tɔyɛ, a sã nyaba a yɛrɛ. Shɔgbete shɔ ãu lazɔrɔ maaniyɛ yurɛ pɛli vishone awuni a kpaa wɔsɔ̃n jo au yuu ni maani. Shɔgbete shɔ ãu lazɔrɔ zitit pɛli sɔ̃n jo nankɔ a kpaa wɔ au yuu ni ziti. Ama shɔgbete shɔ ãu lazɔrɔ gbete sã nyaba rɛ, a gbã ɓɛ shɔwɛrɛ saa u a tipi.
<<A kɨntiu naa i shɔwɛrɛ sɔ atɛ ɓayi nyarɛ a hɨli aru vigbete i pɛli a saa u ni yɛ. Shɔgbete shɔ ãu saa lazɔrɔ maani yɛ n ti kɛ lazɔrɔ kopi, n shɔwɛrɛ, i shane, a ãng saa lazɔrɔ maani . kn noo pɛ, N kpaara wɔsɔ̃n tɛjo lazɔrɔ maani. >>
<< U shɔwɛrɛ risi nyarɛ nɛ, m ɓee apɛ jaa wɛrɛ tɔ̃vɨn ǃ a tasi tɔ̃vɨn tɛ a yuu jaa vi fɛ̃ɛ̃; n yɛn pɔ̃ kɛ ayuu vi pɛ̃niɓa. Ane u nta binyatɔ̃ne a nyazɔ̃. >>
<<Shɔgbete shɔ ãu saa lazɔrɔ ziti yɛ a sɔ̃njo. N shɔwɛrɛ, a shanɛ, a ang saa lazɔrɔ ziti; kn noo pɛ, n kpaara wɔsɔ̃n tɛ lazɔrɔ zitit.>>
<< U shɔwɛrɛ risi nyarɛ ne, m ɓee apɛ jaa wɛrɛ tɔ̃vɨnǃ a tasi tɔ̃vɨn tɛ a ayuu jaa vi fɛ̃ɛ̃; ayuu vi pɛ̃niɓa. Ane u nta binyatɔ̃ne a nyazɔ̃ǃ>> <<Kɛɗɔn shɔgbete shɔ ãu saa lazɔrɔ gbete arɛ. <n shɔwɛrɛ, >shanɛ,< apɛ shɔ -shɔ yukɔne pɔ̃ne, a kasi vi yeene aɗɔgbete a ji ɓa ɓayɛ. Seti pɛlintɔ n yurɛ n gbã saa u a tipi. kɨnnɔɔ pɛ, nkɔ a vii yɛmi.>
<< U shɔwɛrɛ risi nya nɛ, < shɔ lanem, a pmzɛ jawɛrɛǃ a zɛtɛttɔ nɛn yee vishaa aɗɔgbete n ji ɓa ɓayɛ a toli vi sɔ̃n aɗɔgbete n ji zɔ noo vi ɓa? Asi tun n saa a pɔ̃sin a mbuntɛ, n sikɛ sɔne n si tɛkɛ au jaɗoka ni.
<< < ɔ tɛ saau nɛ au naa ni ɔ ã shɔgbete au ɓɛɛ lazɔrɔ kopim. Arum shɔ vinaayi shɔ pɛsiyi vi sɔ̃njo ayuu ɓɛɛ kɔ, n ɗa shakɛ ɓang. Shɔgbete u viɓa ɗɔn ɓa, kɔ javi gbete u wuniyɛ shɔ raa kati au naa ni. Jawɛrɛ kɔlinem ɔ maau rɛ ɔ lɔkiu a ɓeli, aɗɔ kɨnri, aɗɔwakɔ yɛ sɨnn rɛ u shaa ntari. >
Yesɔ nwanya ayuu ruu vɔsine lee gadi
<<Aɗagbete Yesɔ, shɔzɛja kɛ ɔ̃ne au ɗɔɔ basine a Ɗa jaa shone lapa ni au ɗɔbii, yɛ ɔ̃ au laɔ̃ne kpati gbete shɔ basiu yɛ a kolapa. Shɔ a koo piti kpai iyɛ toli nya au ɗɔbii, yɛ vɔsi shɔ ɗɔ ɔ̃ne kɛkn nɔgbete shɔ vivaa ganɛ i vɔsi jaayi ɗɔɔ ɔ̃ne a mɛɛrɛ. Yɛ pɔ̃ mɛɛrɛ au nakɨn u pɔ̃ jaayi au nagãn.
<< Kɛɗɔn kpatiu yɛ geli shɔgbete au nakɨn nɛ, <ɔ ane, shɔgbete mayɛ nɛ vɔɔu tasii susãri abiini; ɔ tɛɔ vivɔɔ nɛ ɔ ɗɔ Ɗa kpati roone ɗɔgbete shɔ pɔ̃sɔɔ si tɛ̃ɛtɛ̃ɛ aɗagbete shɔ shɛshi koo yɛ. aɗagbete wɔ̃ɔ̃ sɨnrɛ ɔ ãng vishaanɛ n shaarɛ, suttu mang nyarɛ ɔ ã mii tɔ n ɓoorɛ, aɗagbete n aa zati awɔ wɛrɛ ɔ tɛn naa tɔ, Aɗagbete nsi bi waati ɔ ãng fãrã tosinɛ tɔ, n si vɔrɔ ɔ kɔntɔ, n si jaahɨm ɔ geennyatɔ. >
<<Kɛɗɔn shɔ tɔ̃vɨn i yɛ kasiunya ne, <Uɓeyelapa, u zɛa pi ɗavi a wɔ̃ɔ̃ni u shaararɛ viya, ko a sutu u ã mii boonɛ rɛ viya? U zɛa piɗavi shɔ zati u tɛa naa rɛ viya, wɔsɔ̃n aɗagbete asi bi watti u ã fãrã tosinɛ rɛ viya? U zɛa piɗavi a vɔrɔ u kɔarɛ viya ko a jaahɨm u gee a nyarɛ viya? >
<< Kpatiu yɛ risi nyarɛ nɛ, <vigbeten n gelɔɔ kɔ nizɛ, vigbete ɔkɛ pɛli shɔ javi ne fɛ̃ɛ̃ a koo, ɔ pɛli ji nkɔ.>
<< Yɛ geli shɔgbete i au nagãn ne, ɔ yune ang ɗɔbii ni, n wiriɔ tɛ, yɛnɛ a yɛti yaa gbete shɔ pɔ̃si shɔ - sho ɗakineyi au jashone lapa. Aɗagbete wɔ̃ɔ̃ sɨnrɛ ɔ ji ã vishaane ɓa, n nta sutu mii ɔ ji ã mii ɓa n ɓoorɛ ɓa, N a zati ɔ ji tɛn naa ɓa, nsi bi waati ɔ ji ã fãrã tosi ɓa, nsi vɔrɔ ɔ ji kɔmɓa, wɔsɔ̃n aɗagbete nsi jaa hm ɔ ji geeng nya ɓa.>>
<<iyɛ kasiu nya sɔ̃njo nɛ, <Uɓeyelapa, u zɛa pi ɗavi a wɔ̃ɔ̃, a suttu, shɔ zati, ko abi waati ko a vɔrɔ ko a jaa hm, ɔ ji pɔ̃sa naa ɓa viya? >
<<Kpati yɛ risi nyanɛ, < vigbete n gelɔɔ kɔ nizɛ, nɔgbete ɔ ji pɛli mɛzɔ̃yi javi fɛ̃ɛ̃ wɔɓa awɔ tete niɓa, ɔ ji pɛlin ɓa. >
<<Kɛɗɔn Ɗalapa yɛ lɔkii kɛ yaa dangdang, ama shɔ tɔ̃vɨnyi iyɛ to kɛ ɗɔ kpati roone a Ɗalapa wɛrɛ.>>
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.