Matiyu 23

Yesɔ gɔ̃ shɔmala nya ãsinɛ Musa i yusho a Farasiyayi

1Kɛɗɔn Yesɔ geliu jaɗɔyi a mɔɔ gbete i toli au ɗɔbii yɛ nɛː 2<<Shɔmala nya ãsinɛ Musa a shɔ Farasiya shɔ ã naa ji ikɔ neyi mati shɔ Musa laabeenɛ nya ãsinɛ.>> 3Ɔ̃rɔɔ tɛ a kɔrɔ ɔ gɨnyi nyatɔ ɔ pɛli vigbete i gelɔɔ yɛ. Ama ɔkɔɔ sho vigbete i shoyɛ nɛ, i gɨn ɓa Ɗalapa nya ruubii gbete i nwa yɛ ɓa. 4I tuu vi kpɛtɛ-kpɛtɛ a hãsi shɔ a lakɔrɔ, ama i yɛ pɛli viwɔɔ ɓa neyi pɔ̃si shɔ naa pɛ jaa fɛ̃ɛ̃ a ɗɔɔ vi tune niɓa.

5I pɛli vi piti kpai nɛ shɔ zɛttɔː i hã kpɛ̃ti fãrã abi a ma laabeene Ɗa nya ruu bi ai nokɨn wɔsɔ̃n naa nɛ ɗayi ɔ̃ pẽniba; 6I ɔri ɔ̃ne a ɗɔɔ pɛ̃niba aɗɔgbete mɔɔ toliyɛ aru ruu nwaanɛ nɛ shɔ basitɔ; 7I ɔri nɛ shɔ geeyi nya a lumoo wɔsɔ̃n nɛ shɔ ɓayi nɛ, <<Shɔmala.>>

8Ama ɔkɔɔ kasine shɔ ɓau ɔnɛ <<Shɔ mala,>> Ɔ piti kpai shɔ mala pɛ gbete awɔ tetteni. 9Ɔkɔɔ ɓa shɔ wɔɔ nɛ a koo nɛ, <<Uɓeye, Aru Uɓeye gbete sheeli, a kolapa.>> 10Shɔ kɔ ɓau ɔnɛ, <<Shɔ ɗekɨn,>> Aru ɔ piti kpai shɔ ɗekɨn pɛ gbete sheeli, ukɔ ɔ̃rɛ kirisi. 11Shɔ pẽniba au tetem ukɔ yɛ ɔ̃rɛ ɔ jashone. 12Shɔgbete kɛ ɔ̃ne shɔ yuu tune Ɗalapa yɛ rooruu a tipi, a shɔgbete kɛ roo rii yuu nɛ Ɗalapa tuu a lapa.

Yesɔ ɓɛɛ i Nya Yelinɛ

13Ɔ yukɔntɔ, shɔmala nya ãsine a shɔ farasiyayi ni, ɔ shɔ - shɔ ɗakine miyiǃ ɔ ku shɔ nyaba Ɗalapa wɛrɛ yɛnɛ tɛ. Ɔ ji to ɓa, ɔ ji yasi shɔgbeteyi i kasi tonɛ nyaɓa ɓa. 14Ɔ yuu kɔne aɗɔn, shɔmala nya ãsinɛ a shɔ farasiyayi ni, shɔ - shɔ ɗakineyi! Ɔ shaa suu vɔɔyi vi, ɔ gaki Ɗa dɔkɔkɔ nɛ aru shɔ zɛyi tɔ shɔ ɓanɛ nnbee. Arum kɔ Ɗalapa yɛ gɔ̃ ɔ yuusho a kakani u tɛɛ shɔwɔyi tɔ.

15Ɔ yukɔne aɗɔn, shɔ mala nya ãsine a shɔ farasiyayi ni, shɔ - shɔ ɗakineǃ Ɔ raaki yuu koo piti a tɛnɛ mii wapo da, ne kãa shɔgbete gɨn ɔ ɗɔɔ, ɔkɛ kpane ɔ risiu kɛ u ɔ̃kɛ shɔ ruvini gbete tɛɔ ɓɛɛ tɔ.

16<< Ɔ yukɔne aɗɔn, shɔ noo gbãti gbete tãti shɔ noo gbãtiyi yɛǃ ɔ shane, shɔgbete kɛ tee jaa Ɗa nɛ, viwɔ ɓa ɗɔn ɓa; ama shɔgbete kɛ teene a zinariya gbete a jaa Ɗa, teeneu yɛ sãu tɔ.>> 17Ɔ shokɔ Shɔ nogbãtiyiǃ shɔ pi ɔ̃rɛ pɛ̃niba piyaː tarimɛɛ ya, ko wɛrɛ Ɗa ya? 18Ɔ sha sɔ̃n nɛ, <<shɔgbete kɛ tee lazaa nɛ, ɓa viwɔ ɓa; ama shɔgbete kɛ teene a vinaa gbete n ti a lazãa, teeneu yɛ sãu tɔ.>> 19Shɔ noo gbãti miyiǃ shɔ pi pɛ̃niba piyaː naa ãne ya, ko lazãa kɔ pɔ̃rɛ naa ãne u ɔ̃ wɔsɔ-wɔsɔ ya? 20Aru nankɔ, shɔgbete kɛ tee lazã ne tee jo lazã kɔ a vi gbete ayuu lazã ni piti kpai. 21Shɔgbete kɛ tee jaa Ɗa ne tee jo a vi gbete a yɛti jaa Ɗa ni kpai. 22Shɔgbete kɛ tee nɛ a kolapa tee jo Ɗalapa kɔ a kpati gbete roo yɛ ni.

23Ɔ yukɔne aɗɔn, shɔ mala nya ãsineyi a shɔ farisiyayi ni, shɔshɔɗakineǃ ɔ ã Ɗalapa vi gbete a yɛti kopi a vi gbete ɔ kpaa awɔ vigbaa kɛ naa mint, dilli a kummin gbete shɔ̃tittɔ. Ama ɔ yaa vii tɔ̃vɨn shone tɛ a yɛti nya ãsine Ɗalapa ruu bi, ukɔ ɔ̃rɛ tɔ̃vɨn shone, raa ntanɛ a tɔ̃vɨn ãne. Ɔ shojo vimiyi kɔ ɔkɔ yaa wɔɔ nɛ akɨnti. 24Ɔ Shɔ noo gbãti gbete ntati shɔ noo gbãtiyi yɛǃ ɔ zɛnoo jaa pũm shɛshine tɛ a yɛti mii ɓoone ni, ama ɔ mɛ kpɛnti wɔba ɗɔɔtɔ a yɛti mii ni.

25Ɔ yukɔne aɗɔn, shɔ mala nya ãsineyi a shɔ farisiyayi ni, shɔ - shɔ ɗakineyiǃ ɔ sɔki waa ɓili a ɓari ni, ama u yɛti ɓuzɨn yiitɛ a shone gbete ɓa tɔ̃vɨn ɓa ukɔ ɔ̃rɛ shɔ ɗakine a yukasine. 26Mɔkɔ shɔ noo gbãti farisiyaǃ gaa pɛ yɛti waa sɔkine a ɓari ni, kɛɗɔn a sɔu ɓili kɛkn.

27Ɔ yukɔne aɗɔn, shɔmala nya ãsineyi a shɔ farisiyayi ni, shɔ -shɔ ɗakine, ɔ pɛ naa saa gbete shɔ maa a pɛnti puru yɛ, shɔgbete u ɓili kɔri anoo waa-ne ama ɓuzɨn pɛ kaka vɔrɔ a vigbete ɓa tɔ̃vɨn ɓa. 28Sɔ̃n nankɔ, a shɔ ɗekɨn ɔ tasi naa ɔ pɛ shɔ tɔ̃vɨn ama a sisɨn ɓuzɨn ɔ pɛ shɔ -shɔ ɗakineyi a shɔ gbete i lattɔ.

Yesɔ nwanya aru raɓoonɛ gbete shɔwiyi yɛ ɓoo yɛ

29<< Ɔ yukɔne aɗɔn, shɔmala nya ãsiyi a shɔ farasiyayi ni, shɔ -shɔ ɗakineǃ>> Ɔ maari janyagadiyi sàà tɔ̃vɨn ɔ tɔ̃ri shɔ tɔ̃vɨnyi yusàà bɛbɛriki. 30Ɔ yeeli nya sɔ̃n nɛ,<<Ɔ si ɔ̃ aɗɔn a ɗagbete mɛuruyi i si doo a noo ni yɛ, ɔ naa si ji ɔ̃ ɓa a ɓuzɨn shɔgbete i nyo janyagadiyi vɔrɔ ni ɓa.>> 31Ɔ shaa tɛ gboti ɔ nya nɛ ɔ laduru ijo ɓuzɨn shɔgbete i nyo Ɗa jashoneyi vɔrɔ yɛ ni.

32Dɔdɔrim ɔ yisi nya waa, a ruuvini gbete mɛuruyi pɛliyɛ kɛnɛ.

33Sɔɔ miyiǃ posɛɛ ɓejaayiǃ Awɔ zɛne ɔ raa naa kɛpikovi a yaa wɛrɛ ni viya? 34Aru nankɔ n yɛn sho Ɗa jaa shone tɔ a shɔ sẽrẽẽyi wɔsɔ̃n shɔ malayi. Ai tete ɔ yɛ nyo wɔyi vɔrɔ a ɓaa wɔyi naa a laa; gãsi ɔyɛ wayi tɔ kpata a jaa Ɗa wɔyi ɔyɛ gɨn lakkoo- lakkoo ɗɔgbete i ɓu aɗɔn ɔ tasi raa. 35Aruumkɔ shɔ yɛ gɔ̃ ɔ yushotɔ aru gbete ɔ nyoki shɔ tɔ̃vɨnyi a koo i kpaa yɛ sɔɔ awɔ yuu, yunɛ shɔ tɔ̃vɨn Habila anɛ Zakariya Berekiya ɓɛjaa, shɔgbete ɔ nyo atette ɗɔ wɔsɔ -wɔsɔ a lazãa i kpaa yɛ sɔɔ awɔ yuu. 36Ruugbete n kɛ gelɔɔ nɛn kɔ nizɛ, yukɔnɛm piti kpai yɛ kpaa shɔgbete i a suruni dɔdɔrim.

Yesɔ tasi Urushalima ɔrinɛ

37Gbee Urushalima, Urushalima, shɔgbete i nyoki janyagadiyi a shɔ gbeteyi lori shɔ Ɗalapa ruubii n ti nɛ a tari, ɓa nɛkɨnya n kasi n musi ɔ nya ɗɔgbete, naa gbete kɔ̃ɔ̃ musi jaayi nya a nakosẽri yɛ, ama ɔ ji kasi ɓa. 38Ɔ kn nɔɔ pɛ, Ɗalapa ya ɔ wɛrɛ tɛ ji kasɔɔ nya ɓa. 39Yunɛ dɔdɔrim yɛnɛ ɗekɨn n gelɔɔtɛ, ɔyɛ zɛn toti ɓa sitɛ ɔ shatɛ nɛ, <<Ɗalapa u tasi shɔgbete a Uɓeyelapa nii vɔɔ susãri biini.>>