Matiyu 17

Naa gbete Yesɔ bi kɔsiyɛ

1Akɨnti lee maangbete Yesɔ tuu Bituru, Yakubu a ɓezɔ̃ gbete shɔ ɓaune Yɔhana, nti yukɔpɔ pɛ̃niba aɗɔ gbete i ɔ̃ kagbete. 2A ɗɔu kɔ Yesɔ bi kɔsirɛ u nookn kɔli yaa naa ɗa, a Yesɔ fãrã biyi riikɛ puru kpɛlɛng- kpɛlɛng naa rutɛ. 3Kɛɗɔn Yesɔ jaɗɔ taati i zɛ Musa a Iliya i ɗɔ nyanwane a Yesɔ ni.

4Se Bituru geli Yesɔ nɛ,<<Uɓeyɛlapa, nɔgbete u ɗɔm kɔritɛ. Akɛ kasine, n yɛn pɛli jaa ɗɔm taati-gbete a ɓɛɛ, gbete Musa ɓɛɛ a gbete wɔsɔ̃n Iliya ɓɛɛ.>>

5A ɗɔgbete Bituru si ɗɔ nyawãne, sabu puru kukuyi nyawu, aɗɔn yɛnya shɛ a yɛti sabuuni a shane,<<Shɔmpɛ majaa, shɔgbete n ɔriuyɛ; bi ntong nyatɔ awuni. Ɔ wɛshɔtɔ au nyani!>>

6Naa Yesɔ jadɔyi i nta vimtɛ, seti pɛliyi rɛ i nwesi a tipi a zunoo a dii. 7Yesɔ ai ɗɔbii a ɗii naa abi a gelinɛ.<<Ɔ yuu lapanɛ,>>Yesɔ sharɛ.<<Ɔkɔ nta setine.>> 8Naa i ɗe nootɛ, ijo zɛ shɔwɔ ɓa se Yesɔ kɔ sheeli. 9Aɗagbete i ɗɔ nonɛ a kɔpɔ, Yesɔ geliyinɛ, <<Ɔkɔ geli shɔ vigbete ɔ zɛyɛ nɛ, setɛ Yesɔ jashɔzɛ yulapa tɛ a saa ni.>> 10Yesɔ jadɔyi hɨu nɛ,<<Pi ruu vi shɔmala nya ãsineyi i tɔnɛ Iliya kɔ yɛ a shɔnɛ rɛ viya?>> 11Yesɔ kasi nya nɛ, <<Nizɛ kɔ Iliya kɔ yɛ a ɗekɨn rɛ aru gbete ko u tɔ̃ri vii piti.>> 12N gelɔɔ tɛttɔ, Iliya atɛtɔ, shɔ ji zɛuni ɓa, ama i pɛli vigbete i kasiyɛ Iliya ni. I yɛ tasi Yesɔ jashɔzɛ raa sɔ̃njo nankɔ. 13Kɛɗɔn Yesɔ jadɔyi i zɛrɛ nɛ shɔ sha ruu Yɔhana shɔgbete ã Baptizima.

Yesɔ gati javɔshɔ gbete a suru kɔlinɛ

14Naa i atɛ a ɗɔgbete shɔ tolinya a ɗɔn yɛ, jawɔ arɛ a ta a Yesɔ ɗekɨn. 15<<Uɓeyɛlapa, nta majaa raajo,>>jau sharɛ.<<U vɔrɔ gɨnne ɗɔni u ɗɔraa ɓoone waane. nwesi a yaa ko a mii. 16N ntiu a jadɔyi ɗɔbii, ijo gatiu ɓa.>> 17<< Gbee shɔ gbeteyi ã sisɨn ɓa a Ɗa bi ni ɓa, shɔ kɔlineyi,>>Yesɔ risi nyanɛ,<<N yɛn ɔ̃ kɛpikovi a ɔkɔɔ niviya? N yɛn ma sisɨn kɛpikovi a ɔ̃ a ɔkɔ ni viya? Ɔ nting jaau pɛ yɛm.>> 18Yesɔ mari rãmau rɛ, a shɛrɛ jaau biini, gati rɛ tɛ̃ɛti a ɗaukɔ. 19Kɛɗɔn Yesɔ jadɔyi i ɓau nya kagbete a hɨunɛ,<<aru ivi uji shɛshi suru kɔline dɔɔɓa viya?>> 20Yesɔ risiyi nya ne,<<Aru gbete ɔ sisɨn ãne pɛ̃tɛ̃rɛ̃. N gelɔɔ tɛ nizɛ, ɔ sisɨn ãne kɛ ɔ̃ne aɗɔ pɛ̃tɛ̃rɛ̃, naa zɔvi gbete shɔ ɓane masitan yɛ, ɔ yɛ geli kɔpɔm dɔɔtɔ nɛ, <Yunɛ aɗɔm a yɛ ɗɔwa>kɔpɔ yɛ yutɔ. Viwɔ yɛ lerɔɔ ɓa.>> 21viɗɔm shɛɓa se a Ɗa gakinɛ a nya manɛ.

22Naa yi to Galili tɛ, a geliyinɛ,<<Shɔ yɛ nyasi Yesɔ jashɔzɛ tɔ a shɔ naa. 23I yɛ nyautɔ, a lee taati yɛ yulapa tɔ.>>Aɗɔn Yesɔ jadɔyi yɛti lɛsi vinivini.

Sabɛne shonɛ a jaa Ɗa

24Aɗagbete Yesɔ au jadɔyi ni i to Kafanahum yɛ, shɔ sabɛnɛ jaa Ɗa tɛne i arɛ i hɨ Bituru nɛ, Shɔmala, <<Ɔ shɔmalam shɔ sabɛnɛ jaa Ɗa jo ɓaya?>> 25<<Nn, shotɔ, Bituru risi nyarɛ. Naa Bituru to wɛrɛu tɛ, Yesɔ kɔ gaa nyanwane rɛ. A zɛ pi kovi aa sisɨn viya, Seman?>>Yesɔ hɨ rɛ.<<Kpati i tɛ sabɛne pi naa piya a ɓɛɛ jaayi naa ya ko a shɔwɔ yi naa?>> 26<<A shɔwɔyi naa,>> Bituru kasi Yesɔ nyarɛ. <<Dɔdɔrim ɓɛjaayi i yɛ sho sabɛnɛ ɓa,>> Yesɔ geliyi nɛ. 27<<Ama u jo kasiɓa shɔmi lɛsi sisɨn a ukɔuni ɓa, yɛ a nya mii a wapo a lɔki galo. Jazɨng gbete akɛ gaa yuu sãne ne, a puu nyarɛ a yɛ kpaa saa gbete shɔ ɓane azurfa au nya gbete yɛ tɛsi yɛ. A turɛ a sho sabɛne a ɓɛɛ ang ɓɛɛni.>>