Lamma Bible Translation Project
Matiyu 14
Yɔhana Shɔ Baptizima ãne, vɔnɛ
A ɗawuni Hiridu, Kpati Galili ntanya a Yesɔ yuu, A geliu jadɔyi ne, <<N pɛ Yɔhana gbete pɛli shɔ Batizima yɛ; Yulapa tɛ a saa ni, Aruumkɔ vibii zaane a ɗɔ vishɔne pɛline a kaka ni au bi.>> Si Hirudu sã Yɔhana tɛttɔ mautɛ a lɔkiu a javɨng, pɛli vim aru Hiridiya ɓezɔ̃ Filibu ɓesɔ. Aru si Yɔhana geli Hiridu nɛ: <<Ɓa vi tɔ̃vɨn a tɛ Hiridiya rɛ ɓa.>> Hiridu kasi Yɔhana nyɔne tɔ, ama nta seti shɔ Yahudawa gbete i a wuniyɛ, aru shɔ tuu Yɔhana nɛu pɛ Ɗa jashone.
A lee gbete Hiridu u ɗɔɔ yɛti puru ntanɛ aru lee yenɛ, ɓɛjasoro sassa rɛ tosiu a sisɨn Vim pɔ̃ Hiridu a teenɛ nɛng ãu vigbete kɛ gakinɛ piti kpai. Hiridiya Ɓɛjaa yurɛ a yɛu ɗɔbii, Hiridiya geliu nɛ, nɛu gaki Yɔhana gbete ãshɔ Baptizima yuu, kɛɗɔn a geli Hiridu nɛ, <<ãng Yɔhana shɔu ã shɔ Baptizima yuu a yɛti pii.>> Kpati sisɨn lɛsi waanɛ, kɛɗɔn aru gbete si tee tɛ a shɔzatiyi ɗekɨn, a ãsi u sojayi nya nɛ n ti Yɔhana shɔ Batizima yuu nɛ sho nyarɛ nɛ shɔu yee Yɔhana yuu rɛ a javɨng. Shɔ n ti jasuu Yɔhana yuu rɛ, kɛɗɔn turɛ a ã ɓini rɛ. Yɔhana shɔ Baptizima ãne jadɔyi arɛ a tuu vɔrɔ rɛ i gbãrɛ. Kɛɗɔn Yɔhana jaɗɔyi yɛrɛ a geli Yesɔ rɛ.
Yesɔ Shari Shɔzɛ Laa- Laa Ziti Tuu Kop Au Jaa Maani Ɓa Maani (5,000)
Naa Yesɔ nta tɛ nɛ shɔ nyo Yɔhana tɛ, a yuu rɛ a to latosi a yɛ ɗɔgbete shɔɓa ɗɔm ɓa yɛ. Mɔɔyi nta nankɔ, i yaa ɗɔgbete i ɗɔn i gɨn Yesɔ a dɔɔ ni yɛnɛ kou. Naa Yesɔ nɔtɛ a yɛti latosi ni a zɛ mɔɔyi rɛ, raa pɛliu ayini, gati shɔgbete i vɔrɔ abi ni.
A ɗaɗɗarɛukɔ, Yesɔ jadɔyi i arɛ a geliunɛ,<<Vishaane ɓa aɗɔni ɓa, ɗaa yitɛ. Yaa mɔɔyi naa nɛ, i yɛrɛ i kã vishaane pɛ a jakomɔɔyi.>> Yesɔ risi nyanɛ, <<Ji kɔriɓa i yɛrɛ ɓa. Ɔ ãi vishaane nɛ viya.>>
Yesɔ jaɗɔyi i risiu nyanɛ,<<Vigbete u a wuniyɛ borodi maani a jazɨng ziti.>> Kɛɗɔn Yesɔ shanɛ,<<Ɔ n ting arɛ yɛm.>> Yesɔ ãsi shɔwi nyanɛ nei ɔ̃linɛ a yuu wisi. Kɛɗɔn tuu borodi maani a jazɨng ziti a ɗe nɔɔ a lapa, dɔ̃ri Ɗalapa a dali borodi a jazɨng ni. Kɛɗɔn turɛ a ãu jadɔyi, u jadɔyi i ãli shɔ rɛ. Kopiya shaarɛ tɛsiu rɛ. Yesɔ jadɔyi i toli borodi dalinɛ ɓuti kopi atu ziti gbete yaa yɛ. Shɔgbete i shaa yɛ isi shɔzɛ Laa- Laa ziti tu kop ɓa maani (5,000) vɔshɔ kɔ sheeli, soroyi a jajayini i ɓa ɓuzɨn ni ɓa.
Yesɔ ra'a yuu mii
Kɛɗɔn Yesɔ pɔ̃u jadɔyi i to latosi tɛnɛ ka nyasasa da, nɛn vasi shɔ nyapɛ tɛlɛ. Naa vasi shɔ nyatɛ, a gɛ̃kɛ yukɔpɔ nɛn gaki Ɗa pɛ. Naa ɗaɗɗarɛ pɛlitɛ, Yesɔ sijo yɔɓũm a ɗɔuni, Ama si latosi gbete u jaɗɔyi aɗɔn a tete mii wapɔ kpɛlɛ awuni, si rimii aɗɔ waanɛ a sɔrɔ mii aɗɔgbete dusi yɛ waanɛ. Si dii kaatɛttɔ shɔ zɛ Yesɔ au jaɗɔyi ɗɔbii u ɗɔɔ ranɛ ayuu mii wapo. Naa Yesɔ jadɔyi i zɛutɛ a ɗɔɔ ranɛ ayuu mii wapo seti pɛliyi tɔ. pɛ rãma,<< i sharɛ,>>i sɨn nyavɔ a gãgãni aru seti. Kɛɗɔn Yesɔ nwa nya gbãgbã ashane: <<Ɔ yɔri yuu ɓa, pɛ nkɔ. Seti kɔ pɛlɔɔ nɛ.>> Kɛɗɔn Bituru risi Yesɔ nyanɛ,<<Uɓeyɛlapa, kɛ ɔ̃nɛ mɔkɔ, ɓang nya pɛ nn aa ɗɔbii pɛ ayuu mii.>> Yesɔ shanɛ<<Anɛ.>> kɛɗɔn Bituru shɛ a yɛti latosi, a ra'a yuu mii yɛnɛ Yesɔ ɗɔbii. Ama naa nta sɔrɔ tɛ aɗɔ dusunɛ waanɛ, seti pɛliurɛ, sikɛ lune mii, sɨn nya vɔ nɛ, << Uɓeyɛlapa, rang jo!>>
Yesɔ gɨn naa gbãgbã a sãurɛ, A shanɛ<<Mɔkɔ shɔ sisɨn ãnɛ pɛ̃tɛ̃rɛ̃mi! A lɛri aru iviya?>>
I kpai i to yɛti latosi rɛ, sɔrɔ shirɛ. Yesɔ jaɗɔyi gbete i si yɛti latosi i gee Yesɔ nyarɛ, i shane, <<Nizɛ kɔ apɛ Ɗa jaa.>>
Naa i tɛɛ da wapo tɛ, i to tipi Janazara rɛ. Naa shɔ ɗɔwi kpaa sisɨn tɛ a Yesɔ biini, i shonya a yukoo piti kpai. Shɔ n ti shɔ vɔrɔrɛ kpai a Yesɔ ɗɔbii I gakiu rɛ nɛ shɔ vɔrɔ i ɗiu nya fãrã pɛ, shɔgbete i ɗiu nya fãrã yɛ i gatirɛ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.