Lamma Bible Translation Project
Marku 6
Shɔ Ɓɛ̃ɛ̃ Yesɔ a Nazara
Yesɔ yaa ɗɔurɛ a yɛkɛ u wɛrɛ koo, u jadɔyi gɨu a dɔɔni. A lee susunɛ Yesɔ gaa shɔ vimatinɛ a Yahudawayi ɗɔ ɔ̃nɛ. Shɔzɛ si bang a ɗɔuni; shɔgbete i wesho au nyayɛ, i nta vigbete shayɛ bizayitɔ.
Shɔwi i hɨnɛ<<Jam kpaa vim pi nam piya?>> Pi ãu sẽrẽ a kakani u Pɛli vibiizaanɛ nankɔ piya? N ɓa kapinta ɓaya, Maryamu jaa, ɓɛzɔ̃yi Yakubu, Yusufu, Yahuza a Simanni ɓaya? Ɓa ɓɛnayi kɔ a ɗɔnkɔ ɓaya? Aruumkɔ i bɛ̃ɛ̃ Yesɔ ruubii ayuu vigbete shayɛ.
Yesɔ geliyi nɛ, <<Shɔ bassi janyagadi tɔ koɗɔpiya, see ai wɛrɛkoo a ɓɛshɔzɛyi wɔsɔ̃n u shɔwɛrɛyi basiu ɓa.>> Yesɔ ji pɛli vibiizaanɛ ɓa a ɗɔuni ɓa, pɔ̃si shɔvɔrɔyi fɛ̃ɛ̃ i naa ayuu i gatirɛ. Aruumkɔ ɔ̃ri Yesɔ kɛ vinolusinɛ fɛ̃ɛm aru gbete i sisɨng ãnɛ ɓa.
Yesɔ Shou Jadɔyi Kopi Atu ziti
Kɛɗɔn Yesɔ ɓau jadɔyi nya kopi atu ziti a shoyi ziti-ziti. A ãi kaka a suru kɔ̃linɛ yuu.
A ãsiyinyanɛ, <<Ɔkɔɔ tuu viwɔnɛ a naani, see laba sheeli--ɔkɔɔ tuu vishanɛ nɛ a naani, ɔkɔɔ tuu lazɔrɔ nɛ a naani ɔkɔɔ sã saa nɛ a duuni. Ɔ tosi kodɔɔ a dɔɔni, ama ɔkɔɔ tuu fãrã wɔnɛ nɛi sã a naani.>> Yesɔ geliyi wɔsɔ̃n nɛ<<Ɗɔgbete ɔkɛ tonɛ shɔkɛ tɛwɔ naa nɛ, ɔ ɔ̃ ɗɔukɔ yɛnɛ leegbete ɔ yaa ɗɔuyɛ. Ɔkɛ yɛnɛ koo gbete shɔ ji tɛwɔ naa ɓa, ko, i jo wesho ɓa awɔ nyani ɓa, ɔ sɔ̃ zaburu tɔ awɔ dɔɔni aɗagbete ɔkɛ yaa koou nɛ. Shɔ wakɔ ɔ̃kɛ vitasinɛ ai yuu.>> Kɛɗɔn i yɛ ɓili i ɗɔ Ɗanyaruubii waanɛ nɛ shɔu kɔsi sisɨn shɔ yaa ruuvini pɛlinɛtɔ. I shɛshi suru kɔ̃linɛyi waanɛ i pnri shɔ vɔrɔyi nɔɔ a bi i gatiyirɛ.
Yɔhana Shɔ Batizima Vɔnɛ
Kɛɗɔn kpati Hiridu nta vim piti kpai, aruviya Yesɔ nii yɛtɛ kpɛlɛ -kpɛlɛ. Shɔwɔyi i ɗɔ shanɛ nɛ,<<Yɔhana shɔ Batizima ãnɛ yulapatɛ a sàà ni, aruukɔ kpaa kaka kn u ɗɔ vishonɛ awuni.>> Shɔwɔyi shanɛ, <<Shɔmpɛ Iliya.>>Shɔwɔyi shanɛ, <<Upɛ janyagadi, naa janyagadi ai si tɛ̃ɛ̃tɛ̃ɛ̃yɛ.>>
Naa Hiridu nta vimtɛ piti, a shanɛ,<<Upɛ Yɔhana shɔ Batizima ãnɛ, shɔgbete n zɛ̃u yuuyɛ, ama yulapatɛ sàà ni!>>
Hirudu au yuu pɔ̃rɛ shɔ sã Yɔhana tɔ, nɛ shɔ mautɔ shɔ pɔ̃u a jaahm. Hirudu pɛli vim aru Hirodiya u nta sisɨn puru, ɓɛzɔ̃ Filibu ɓɛso gbete tɛuyɛ. Aru Yɔhana shɔ Batizima ãnɛ ji ya Hiridu gelinɛ ɓa nɛ, << Nyaãsinɛ zãritɔ a tuu mɛzɔ̃u ɓɛsoǃ>> Kɛɗɔn Hirodiya sã Yɔhana au sisɨn nɛn nyoutɔ, ama ji zɛu nɔɔ nyonɛ ɓa. aru Hiridu nta Yɔhana seti nɛu shɔ tɔ̃vɨn u sɔ̃n wɔsɔ-wɔsɔ, ji kasiɓa nɛ shɔ ɗiunaa bi ɓa. Kasi ɔ̃nɛ awuni u wesho au nya, ama kopiɗaviya Yɔhana kɛ nwanyanɛ sisɨn kɔ Hiridu tɔ.
A kɨntiuni Hirodiya kpaau nyabarɛ, si a Hiridu lee yeenɛ au zááyɛ, a ɓaanya au kpatiyi bi, au shɔ sɨntanɛyi, a yupɛ̃ni tipi Galiliyi nɛi ang ɗɔ yumusinɛ. Naa Hirodiya ɓɛɛjaa to ɗɔ sà sanɛtɛ, u sà kɔri ɓeye a shɔ gãsiyini waanɛ.
Kpatiu geli jasuu nɛ,<<Hɨn vigbete a kasiyɛnɛ kpai, n yɛn ããtɔ.>> Hiridu teetɔ shanɛ,<<Vigbete akɛ hɨnɛ n yɛn ããtɔ, ko tipi gbete n roo kpati ɗɔnni n ãã tete zali.>>
Kɛɗɔn jasuu shɛrɛ a geli ɓini nɛ, <<N yɛn hɨ kɛ iviya.>>
Ɓini kasinyanɛ,<<Yɔhana shɔ Batizima yuu.>>
Jasuu sɔɔ gbãgbã yɛnɛ kpati ɗɔbii nɛn kasi Yɔhana shɔ Batizima yuu, <<N kasi jo dɔdɔrim kɔ a yɛti pii.>>
Kpatiu yɛti lɛsirɛ fɛ̃ɛm, ama ji zãriu ɓa aru gbete si teetɛ gboti a shɔ ɗekɨn. Kɛɗɔn kpati sho u shɔganɛrɛ nɛu n ting Yɔhana shɔ batizima yuu. Jau yɛrɛ a zẽẽ Yɔhana yuu a jaahm. Kɛɗɔn u shɔganɛu n-tiu Yɔhana yuu a pii a ã jasuu rɛ, tuurɛ a ã ɓini. Naa Yɔhana jadɔyi ntatɛ, i arɛ a tuu Yɔhana birɛ i gbãrɛ.
Yesɔ Shari Shɔ lazɔrɔ maani (5,000)
Yesɔ jashonɛyi kopi atu ziti naa i sɔɔtɛ, i kpaa Yesɔ rɛ, i geliu vigbete i pɛliyɛ a vishɔgbete i mati shɔyɛni piti kpai. Aru shɔzɛ waanɛ i si a ɗɔ anɛ a yɛnɛni a Yesɔ ɗɔbii, i jo kpaa nyaba vishaanɛ ɓa. Kɛɗɔn Yesɔ geliu jashonɛyi nɛ, <<U yuunɛ u yɛ ɗɔ wɔɔ nɔgbete ɔ yɛ susuyɛ.>> I yuu kɛɗɔn a latosi i yɛ kagbete, i ɔ̃rɛ. Shɔzɛ waanɛ i zɛ Yesɔ tɔ aɗɔ yɛnɛni, i ã tɔ̃vɨn tɔ nɛpɛ ikɔ, shɔ a komoo tottot i raadɔɔ Yesɔ au jadɔyini i ɓɛɛ ɗɔu tonɛ shɔwi totɛ tɛ̃ɛ̃tɛ̃ɛ̃. Naa Yesɔ shɛtɛ a yɛti latosiuni a zɛ mooyi waanɛ a ntayi raarɛ, aruviya isi naa mɛrɛ̃ɛ̃ au shɔganɛ ɓayɛ. Kɛɗɔn Yesɔ gayi vimatirɛ tottot.
Si ɗɔ sɨn janɛtɛ, Yesɔ jadɔyi au ɗɔbiirɛ i shanɛ, <<Ɗaa yiitɛ, u sɔ̃n ɗɔgbete shɔ ɓa ɗɔm ɓa. Yaa shɔmiyi naa nɛ, i yɛ jakomɔɔ a tipi gbete aɗɔn maani i kãriyi yuu vishaanɛ pɛ.>>
Yesɔ kasinyanɛ<<Ɔ ãyi vishaanɛ nɛ i shaarɛ viya.>>
I hɨunɛ,<<A kasinɛ u nyo saa azurfa laa kopi (200) u woriyi vishaanɛ awuni i shaarɛ ya?>>
Kɛɗɔn Yesɔ hɨyinɛ, <<Ɔ borodi naa nɛkɨn nya? Yɛnɛ ɔ zɛrɛ.>>
Naa i zɛtɛ, i geliunɛ, <<borodi maani a jazɨng ziti.>>
Kɛɗɔn Yesɔ geliu jadɔyinɛ, ɔ geli shɔnɛ i ɔ̃li a yuu wisi zazza a kǹkǹ. See shɔ ɔ̃lirɛ a kǹkǹ shɔwɔyi si laa maani, wɔyi sɔ̃n laa ziti atu kopi. Kɛɗɔn Yesɔ tuu borodi maani a jazɨng ziti, a kɨnnɔɔ kolapa, a dɔ̃ri Ɗa a dalirɛ. A ãu jadɔyi nɛyi vɔsi shɔnɛ. Vɔsi jazɨn sɔ̃n jo a shɔwi yuu piti kpai. Kopiya shaarɛ tɛsiurɛ. Kɛɗɔn Yesɔ jadɔyi toli borodi dalinɛ a jazɨnni ɓuti kopi atu ziti. Shɔ gbeteyi shaayɛ i si lazɔrɔ maani (5,000).
Yesɔ ra ayuu mii
Ji wariyuɓa Yesɔ geliu jadɔyinɛ i to latosi nɛ, nɛi yɛ Besada a ɗekɨn, a nya ɓooti wapo da, nɛn vasi mooyi nya pogo. A knti gbete yaa mooyitɛ, gɛ̃kɛ kɔpɔ ɗɔ Ɗa gakinɛ.
Naa ɗadɗarɛ pɛlitɛ, si latosiu atette mii wapo, Yesɔ u si a yɔbm a nya ɓooti. Kɨnnɔɔ rɛ a zɛu jadɔyi ɗɔ latosi zaanɛ siyi ɗɔ bawaanɛ a sɔrɔni; si dɔɔɗa ntátɛ mɛnɛ taati yɛnɛ maangbete a gadii, Yesɔ au jadɔyi ɗɔbii u ɗɔ ranɛ ayuu mii. pɛli naa kɛ tɛyinɛ, ama i zɛu a ɗɔ ranɛ ayuu mii. I sha ai sisɨn nɛ <<pɛ rãma!>> I gaa nya kaarinɛrɛ. I piti kpai i zaatɔ aɗagbete i zɛuyɛni.
Yesɔ nwarinya gbãgbã a shanɛ,<<Ɔ mabiitɔ pɛ nkɔ. Ɔ zaa ɓaǃ>> Kɛɗɔn a to yɛti latosirɛ ayini, sɔrɔ shirɛ. Yesɔ jadɔyi vibiizaanɛ sãyi piti kpai, aru gbete i jo kpaa kara dɔɔ vigbete Yesɔ shaari shɔ lazɔrɔ maani (5,000) ɓa; siyi sisɨn lakitɛ bang.
Yesɔ Gati Shɔvɔrɔ Wɔɔ a Genɛsareti
Naa i tɛɛ nya ɓooti datɛ, i yɛkɛ Genesarati a latosi, i ma latosi kɛ ɗɔukɔ. Naa i yaa latosi tɛ a ɗɔuni tɛ̃ɛti, shɔ kpaa gɨǹ gbãgbã nɛ shɔmpɛ Yesɔ. I yuurɛ a yɛti komoo piti kpai, ɗɔ gbeteyi ntanɛ Yesɔ u ɗɔnyɛ i n-tiu shɔ vɔrɔyi a siri gbeteyi roo ɗɔnniyɛ. A ɗɔgbete Yesɔ ɗɔnyɛ piti kpai, ko pi jakomɔɔ shɔpiya, komoo shɔpiya, a jaayi, shɔ n ti shɔvɔyi a pɔ̃yi a nya lumoo. I gaki Yesɔ rɛ nɛu yapɛ shɔ ɗinaa pɛ au nya fãrã, shɔgbete i ɗii naa a Yesɔ fãrã piti i gatirɛ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.