Lamma Bible Translation Project
Marku 16
Yesɔ yunɛ sàà
Akɨnti lee susunɛ a ɗadarɛ Mariyamu suu magdala a Mariyamu Yakubu ɓini wɔsɔ̃n Salomi i yurɛ i woo nɔɔ sũrũ-sũrũ aru nɛi pmri Yesɔ abi: A gadi zɨɨnkɔ alee susunɛ aɗagbete ɗa shɛyɛ i yɛ saau rɛ. A nyaba yɛnɛ saau i hɨ zɔnɛ,<<piyɛ giriu tari pi a nyɛ saau ni piya?>>
Naa i ɗee nɔɔtɛ i zɛrɛ shɔ giri tariutɛ kagbete, si tari pẽniɓa. Naa i to yusààutɛ i zɛ jakasa wɔɔ ɔ̃tɛ kagbete a fãrã puru a yusàà, kɛɗɔn i zaa kpak-kpak.
Ama, ɗajashonɛlapa geliyi nɛ, << Ɔkɔɔ zaanɛ n zɛtɛtɔ ɔ kã Yesɔ shɔ nazara gbete shɔ ɓau naa a laa yɛ, u ɓa ɗɔni ɓa, yulapatɛǃ nɔgbete shayɛ, ɔ kɨnnɔɔ nɛ ɗɔgbete shɔ yɔu ɗɔn yɛm. Dɔdɔrim ɔ yɛnɛ ɔ geli Yesɔ jaɗɔyi a Bituru ni nɛ yulapatɛ, ɔ yɛ kpau awɔ ɗekɨn yɛnɛ tipi Urushalima, ɔ zɛu aɗɔwakɔ nɔgbete shayɛ.>>
Kɛɗɔn suuwiyi shɛ a yuààu a yunɛ, i bi ɗɔɔ zaanɛ i sisɨn ji roo ɓa. I ji geli shɔwɔɔ ɓa aru gbete seti sãyitɔ.
Yesɔ shɛ a Mariyamu suu Magdala bi
Akɨnti gbete Yesɔ yulapa a sàà shɔgbete gaa Yesɔ zɛnɛ pɛ Mariyamu suu magdala, suu gbete Yesɔ shɛshiu rãman maanzii a bi yɛ. Mariyamu suu magdala yɛ Yesɔ jaɗɔyi ɗɔbii a kpai a ɗɔɔ lɛrinɛ a sɨnɛni. Ama naa Mariyamu suu magdala geli Yesɔ jaɗɔyi tɛ nɛn zɛ Yesɔ tɛ ang nɔɔ ni, iji ã sisɨn ɓa au nyani ɓa.
Yesɔ shɛ au jaɗɔyi ziti ɗekɨn
A kɨnti ni Yesɔ shɛ au jadɔyi ziti bi a nyaba tot-tot, aɗagbete i si nyaba tipi Urushalima yɛnɛ. Kɛɗɔn i sɔrɛ a geli zɔ̃ gãsi rɛ, ama i ji ã sisɨn ɓa ai nyani ɓa kɔjo.
Yesɔ shɛ au Jadɔyi kopi tu gbete i bi
Toti Yesɔ shɛ au jadɔyi kopi tu gbete bi aɗɔgbete i si ɗɔɔ vishaanɛ, kɛɗɔn Yesɔ lasirɛ aru gbete i sisɨn ãnɛ ɓa a yulakinɛ gbete i tasiyɛ, aru i bɛ̃ɛ̃ tɔ̃vɨn ãnɛtɔ a shɔ gbete zɛ Yesɔ yutɛ suruni a sàà i nya.
Kɛɗɔn Yesɔ geliyi nɛ,<< ɔ yɛnɛ a koo piti kpai ɔ nwari shɔ n nya ruubii, Shɔgbete kɛ ã sisɨn nɛ ang bi nɛ shɔu pɛlin batizima shɔyɛ rautɔ, ama shɔgbete kɛ bɛ̃ɛ̃ nɛ yɛ raa naa ɓa. Shɔgbeteyi kɛ ã tɔ̃vɨn nɛ ang nii iyɛ pɛli vibii zaanɛ tɔ, iyɛ zɛnɔɔ rãmã shɛshinɛ tɔ ang nii ni, iyɛ zɛnɔɔ nyakoo wɔɔ nwanɛtɔ. I yɛ tuu sɔɔ a naa ko i ɓoo vizɔ yɛ pɛli viwɔ ɓa, i yɛ zɛnɔɔ naapɔ̃nɛtɔ a shɔvɔrɔyi bini i yɛ gatitɔ tɛ̃ɛ̃ti.>>
Yesɔ tunɛ yɛnɛ kolapa
Akɨnti gbete Ubeyelapa yisi nyanwanɛ tɛ ayiniyɛ, kɛɗɔn Ɗalapa tuurɛ yɛnɛ kolapa a ɔ̃ a au nakɨn. Kɛɗɔn Yesɔ jadɔyi i yɛ ko piɗɔpiya a koo i ɗɔgbete i nwari shɔ Ɗalapa nya ruubii yɛ, Ubeyelapa u si ayini, i ɗɔgbete i pɛli vibii zaanɛ gbete Yesɔ ãi kaka nɛi pɛliyɛ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.