Lamma Bible Translation Project
Marku 10
Yesɔ mati shɔ vi ayuu so naa yanɛ
Kɛɗɔn Yesɔ yaa ɗɔurɛ, a yɛkɛ tipi Yahudiya a yɛ wɔsɔ̃n tɛnɛ ɓooti Yodan. Toti mɔɔ waanɛ i toli nya sɔ̃n au ɗɔbii, Yesɔ matiyi virɛ, nɔgbete si pɛliyɛ a lee-lee.
Farasiyayi gãsi i au ɗɔbii nɛi ntau sisɨn i hɨunɛ, nya ãsinɛ gbete Musa mati shɔyɛ pɛ tɔ̃vɨn ya, shɔzɛ u yaa so gbete tɛ a wɛrɛ naa ya?
Kɛɗɔn Yesɔ kasinyanɛ,<<Musa ãsɔɔ nyanɛ iviya?>>
I shanɛ,<<Musa pɔ̃ naa nɛ shɔu beeri suwɛrɛ sẽkoo naa yanɛtɔ, shɔ ãu naa u yɛrɛ.>>
Yesɔ geliyinɛ,<<Musa ãsɔɔ nya nankɔ a laabeene aru ɔ yuu kasi.>> <<Ama gaanɛ aɗagbete Ɗalapa shɛshi koo, Ɗalapa pɛli vɔshɔ a soro. <Aruumkɔ vɔshɔ yaa ɓeye wɛrɛ a ɓini-ni u rɛɛ a ɓeso, i ziti i ɔ̃kɛ shɔzɛ gbete.> I toti ziti ɓa, ama kɛ gbete. Aru nankɔ vi gbete Ɗalapa kɛ dɔsinɛ shɔzɛ vɔsi ɓa.>> Aɗagbete i sɔɔ wɛrɛ sɔ̃ntɛ Yesɔ jadɔyi hɨu sɔ̃n arumni. Yesɔ kasiyinya nɛ,<<Shɔgbete kɛ yaa ɓeso naa nɛ, a tɛ so wɔɔ, pɛli ruuvini kpãtang tɛ a ɓeso yuu. Sɔ̃nji nankɔ so gbete kɛ yaa ɓevɔ wɛrɛnɛ a tɛ vɔshɔ wɔɔ, pɛli ruuvini kpãtang-tɛ.>>
Yesɔ a jajja pẽtẽrẽ
Shɔ gãsiyi n ti Yesɔ jajja pẽtẽrẽyi aru neu ɗii naa bi, Ama Yesɔ jaɗɔyi i shari shɔ gãgã nɛ shɔ n ti ɓa. Naa Yesɔ zɛtɛ nankɔ, lɛsi sisɨn waanɛ, a geliyinɛ,<<Ɔ yaa jajja pẽtẽrẽ i ang ɗɔbii, ɔ kɔɔ nyikiyinɛ, Ɗa kpati roonɛ kãjo shɔ naa ikɔ. N gelɔɔtɛ nizɛ, shɔgbete ji tɛ ruu Ɗa kpati roonɛ ɓa naa jajja pẽtẽrẽn kɔɓa, yɛ kpaa tonɛ ɓa a ɗɔ gbete Ɗa roo kpati-ni ɓa.>> Kɛɗɔn Yesɔ tuu jajja pẽtẽrẽyi a kɔ̃tiyi a nɔsisɨn a pɔ̃siyi naa a yuu u ɗɔgbete gaki Ɗa U tasuu vɔɔ susãri a biini.
Shɔ vinaa
Naa Yesɔ yusɔ̃ntɛ nɛn yɛ zati, jawɔɔ au ɗɔbii yuurɛ a ta yugboti au ɗekɨn.<<Shɔmala tɔ̃vɨn, n yɛn pɛli iviya Ɗalapa u ang suru gbete sɔ̃n nya ɓayɛ viya?>>
Kɛɗɔn Yesɔ hɨunɛ, <<A ɓannɛ shɔ tɔ̃vɨn aru iviya?>>Shɔ tɔ̃vɨn wɔɔɓa see Ɗalapa kɔ sheeli. A zɛ vigbete Ɗalapa ãsinya tɛttɔ au yuuni:<<Mɔkaa nyɔ shɔnɛ, mɔkaa roonɛ shɔwɔɔ so ni, mɔkaa ɓɔɔ shɔ vinɛ, mɔkaa pɔ̃naanɛ ruu gbete aji zɛ ɓa àà nɔni ɓa, mɔkaa shaa vigbete ɓaa ɓɛɛɓa nɛ, a wesho a meyeu nya a miniu nya.>>
Jau geli Yesɔ nɛ,<<Shɔmala vim piti kpai n gɨn tɛttɔ sin doo jákàsà.>>
Yesɔ kɨnnɔɔ au bi ɔruutɔ, a geliunɛ.<<Vi gbete aji gɨn ɓa, yɛnɛ a mɛli vi gbete a wuni piti kpai a ã shɔ raayi, a yɛ kpaa vinaa tɔ a kolapani. Kɛɗɔn ɗa a arɛ a gɨn kn.>>
Naa jau nta vimtɛ u nɔkɨn lɛsirɛ, yɛrɛ u sisɨn lɛsinɛ, aru gbete u si shɔ vinaa waanɛ.
Kɛɗɔn Yesɔ kɨnnɔɔ a zɛ u jaɗɔyi a geliyinɛ,<<Ɓa vi pɛlaa ɓa shɔ vinaa u ãyuu aru Ɗa kpati roonɛ!>>
Yesɔ jadɔyi bi zaatɔ arum ni. Ama Yesɔ geliyi sɔ̃nnɛ,<<Majayi, kpaanɛ yuu a Ɗa kpati roonɛ raaɓoonɛ aɗɔn waanɛ! Yɛ tɛɛtɔ wɔba u to nyaɓa ɓo a nogbete shɔ vinaa yɛ kpaa tonɛ a ɗɔɔ Ɗa kpati roonɛ.>>
U jaɗɔyi nta ruum nam i bi zaarɛ yɛ ɗekɨn, a i hɨ zɔɔ ai nɔɔ nɛ,<<Vimkɛ ɔ̃nɛ nankɔ, piyɛ ranaa piya?>>
Yesɔ kɨnnɔɔ ai bi a shanɛ,<<A shɔzɛ ɗɔbii yɛ pɛli ɓa, ama ɓa Ɗalapa ɗɔbii ɓa; a Ɗalapa ɗɔbii vi piti kpai pɛlitɔ.>>
Bituru geli Yesɔ nɛ,<< Zɛpɛ u yaa vitɛ piti kpai u gɨn atɛ!>>
Yesɔ risinyanɛ,<<N gelɔɔtɛ nizɛ, shɔgbete kɛ yau wɛrɛnɛ, ko ɓɛzɔ̃yi ko ɓɛnaayi ko ɓini ko ɓeye ko ɓɛjaayi a ɗɔ jaa lanɛ ang yuu aru tɔ̃vɨn miyi, vigbete yɛ kpaayɛ yɛ tɛɛ ɓa mááni tɔ a vigbete u awuni ni a wɛrɛ, ko ɓɛzɔ̃yi ko ɓɛnaayi ko ɓiniyi ko ɓɛjaayi a ɗɔ jaa lanɛyi, ama, setɛ ɓooraatɛ waanɛ. Kɛɗɔn a koo gbete kanɛ, yɛ kpaa suru gbete yisi nya ɓa kɛkn. Ama shɔzɛ waanɛ gbete i a ɗekɨn iyɛ sɔɔ sɔ̃n a knti, shɔ knti ikɔi yɛ ɔ̃ sɔ̃n a ɗekɨn.>>
Yesɔ Nwanya Sɔ̃n Ayuu Gbete Yɛ Vɔyɛ Ɓa taati
Yesɔ au jadɔyini i nyaɓa Urushalima yɛnɛ, Yesɔ ukɔ a ɗekɨn, U jaɗɔyi i ɗɔgbete i gɨuyɛ a knti i bi ɗɔɔ zaanɛ, shɔgbete i gɨn Yesɔ knti maa i bi ɗɔɔ zaanɛ. Toti Yesɔ toli kopi tu ziti nya kagbete a sha vigbete yɛ kpaurɛ sɔ̃n ai ɗɔbii. Shanɛ, <<U yɛkɛ Urushalima, shɔyɛ ã jaa shɔzɛ Kɛ yupɛ̃ni shɔlansi a shɔmala nyaãsinɛyi Musa i naa. I yɛ ãu shɔgbete ɓa Yahudawa ɓa a naa i nyou vɔrɔ yɛnɛ sàà, i yɛ ã riunya i tulu susãri au bi, i waurɛ a nyou vɔrɔ sàà, a knti lee taati yɛ yulapa sɔ̃n a suruni.>>
Yakubu a Yɔhana i gakinɛ
Kɛɗɔn Zabadi ɓɛjaayi, Yɔhana a Yakubu i a Yesɔ ɗɔbii i shanɛ,<<Shɔmala, u gakaatɔ pɛliu vigbete ukɛ hɨnnɛ piti kpai.>>
Yesɔ hɨyinɛ,<<Ɔ kasin n pɛlɔɔ iviya?>>
I risinyanɛ,<<U gakaa tɔ a lee gbete akɛ ɔ̃nɛ āā ɗɔɔ bassinɛ aɗagbete a roo kpati u kasirɛ shɔzɛ gbete au tetem u ɔ̃ āā nakɨn gbete wɔɔ u ɔ̃ āā nagã.>>
Yesɔ geliyi nɛ, ɔ ji zɛ vigbete ɔ gaki yɛɓa, ɔ yɛ zɛnɔɔ raɓoonɛ gbete n yɛn ɓoon dɔɔtɔya? Ko ɔ zɛnɔɔ dɔɔtɔ shɔu pɛlɔɔ batizima a batizima gbete shɔyɛ pɛlin yɛya?
I kasi nyanɛ, <<nn, u zɛnɔɔtɔ.>>
Yesɔ geliyinɛ, Nn, ɔ zɛnɔɔ raɓoonɛ tɔ naa n ɓooni, shɔ yɛ pɛlɔɔ batizima a batizima gbete shɔ yɛ pɛlinyɛni.
Ama ɔ̃nɛ ang nakɨn ang nagã ɓang nkɔng kaka ãnɛ niɓa. Dɔm see Ɗalapa yɛ ã shɔgbete mabiitɛ.
Naa Yesɔ jadɔyi kopi i nta vimtɛ, kɛɗɔn i sisɨn lɛsirɛ a Yakubu a Yɔhana ni. A kɨntiuni Yesɔ ɓaa u jaɗɔyi nya piti kpai a geliyinɛ,<<Ɔ zɛtɛ shɔgbete i ɓa Yahudawa ɓa, shɔgbete i a kpatini i tasi kaka kpati i pɔ̃ shɔ, shɔ gɨn vigbete i shayɛ, i yupɛ̃ni maa i tasi shɔ ji kaka kɔ. Ama ɔkɔɔ pɛlinɛ naa ikɔ, nɔgbete ɔ si pɛli nankɔ, shɔgbete awɔ tete kɛ kasinɛ shɔu basintɔ pẽniba, ɔ̃tɛ lakɔrɔ u sɔriu yuu naa jawɛrɛ a tete shɔ gãsini. aru nankɔ, shɔgbete kɛ kasinɛ nɛn ɔ̃ shɔ ɗekɨn, ɔ̃riutɛ lakɔrɔ u sɔri yuu foo a tete shɔ gãsini kpai. Jinankɔ Yesɔ shɔzɛja ji a ɓa nɛ shɔu shoshin viɓa, ama a ɗɔɔ shɔ vishonɛ pɛlinɛ, u ãu suru aru shɔzɛ waanɛ i yuu.>>
Yesɔ gati shɔnɔgbãti Batamawu
A kɨntiuni i arɛ a ɓuzɨn Yeriko. Yesɔ au jaɗɔyini piti a mɔɔyini waanɛ a ɗɔzɔ aɗɔgbete i yaa ɓuzɨn komɔɔyɛ, shɔnɔgbãti gbete gaki saa ɔ̃tɛ a nya nyaɓa kagbete. Naa ntatɛ shɔ shalinɛ Yesɔ shɔ Nazara kɛ tɛɛnɛ, a shati nya nɛ,<<Yesɔǃ Dauda ɓɛjaaǃ ntang raajo!>>
Shɔwɔɔ i lasiurɛ a geliyinɛ nɛu ɔ̃ a nyani, ama a yɛ ɗekɨn nya shatinɛ ni, <<Dauda ɓɛjaa, ntang raajo.>>
Kɛɗɔn Yesɔ shirɛ a shanɛ,<<Ɔ ɓaring u nyapɛ yɛm.>>
I ɓaa shɔnɔgbãtiu nyarɛ, i geliunɛ, <<Ntabii nyantɔnɛ nɛǃ yunɛ kɛ ɓaa nyanɛ.>> Kɛɗɔn loki u vibii kukinɛrɛ kagbete, a kɔbii lapa a yɛ Yesɔ ɗɔbiirɛ. Yesɔ hɨunɛ,<<A kasinɛ n pɛlaa iviya?>>
Shɔnɔgbãti shanɛ, <<Shɔwɛrɛ n kasirɛ n zɛɗɔ.>>
Yesɔ geliunɛ, <<Yɛnɛ, a sisɨn ãnɛ gataatɛ.>>Tɛ̃ɛ̃ti u nɔɔ zɛɗɔrɛ a gɨn Yesɔ rɛ i yɛrɛ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.