Lamma Bible Translation Project
Yɔhana 4
Yesɔ A Su Samariya
Kɛɗɔn shɔ farasiya i ntanyarɛ nɛ Yesɔ kɛ kpaa jadɔɔyi nɛ bang, au pɛliyi Batizima tɛɛ Yɔhana ɓɛɛtɔ (Ama Yesɔ ji pɛli shɔ Batizima ɓa ayuu ɓa; u jadɔɔyi i kɔyi pɛli shɔ ji sheeli.) Naa Yesɔ nta vigbete shɔ shalitɛ yɛ, kɛɗɔn yaa tipi Yahudiya a sɔɔ Galili rɛ; Au nyaba yɛnɛ ɔ̃kɛ kaka jazɨng akɔrɔ Yesɔ u sɔɔ ɓuzɨn Samariya.
A ɓuzɨn Samariya arɛ a koomo wɔɔ shɔ ɓaanɛ Sika, ɗɔu si maani a ɗɔ gbete Yakubu ã ɓɛɛ jaa Yusufu si tɛ̃ɛ̃tɛ̃ɛ̃ yɛ. A ɗɔwakɔ Yakubu too mii si ɗɔn, naa Yesɔ yɔɔtɛ a ranɛni, a ɔ̃ a nya too miiukɔ. Si mɛnɛ atette niti.
Su Samariya wɔɔ arɛ nɛn omii, a Yesɔ geliunɛ,<<Ãng mii pɛ n ɓootɔ.>> ( Yesɔ jadɔɔyi i yɛ ɓuzɨn koomo nɛi woo vishaanɛ.)
Suu kasi Yesɔ nyanɛ,<<A pɛ shɔ Yahudawa, nɓɛɛ su Samariya, ivi yɛ pɔ̃rɛ a gaki mii ang naa viya?>>( Yahudawayi i ɓoo mii ɓa a waa gbete a Samariyayi ni ɓa.)
Yesɔ kasi suu nyanɛ,<<A si tɔnɛn zɛ Ɗalapa vi ãnɛtɔ, a shɔ gbete gaki mii aa naa yɛni, a si gakiu tɛttɔ, siyɛ ã mii gbete yɛ ã Suruyɛ.>>
Suu geli Yesɔ nɛ,<<Shɔmala, a vi mii gɔ̃nɛ ɓa naani ɓa, too mii sɔ̃n a dii gbikiri-gbikiri. A yɛ kpaa mii gbete ã Suru kɛpiya? U ɓɛuru Yakubu ukɔ ãu too miimrɛ; ɓoo mii si ji a ɗɔukɔ a ɓɛɛ jaayini au vivaayini kpai. Mɔkɔ tuunɛ nɛn tɛɛ Yakubu tɛ a banɛni, a tɛu tɛya?>>
Yesɔ kasinya nɛ, <<Shɔgbete i ɓoo miim kpai i yɛ nta sutu sɔ̃ntɔ, Ama shɔgbete kɛ ɓoo mii gbete n ãu yɛnɛ yɛ nta sutu toti ɓa. Mii gbete ang yɛ ãu yɛ ɔ̃riu kɛ too mii gbete yɛ watiɓa, mii yɛ ɓutɔ aɗɔn u ãu Suru gbete yɛ sɔ̃ nya ɓayɛ.>> Suu geliunɛ,<<Shɔmala, ang miiu pɛjo! Aru n yɛn nta sutu toti ɓa, n yɛn a ɗɔn toti nɛng omii ɓa.>> Yesɔ geliu suu nɛ,<<Yɛnɛ a ɓaa mɛvɔu nyarɛ, n ɗaa sɔɔ kɛkn.>>
Suu kasinya nɛ,<<N ɓa a vɔshɔni ɓa,>>
Yesɔ risinya nɛ, <<Nizɛ a shatɛ tɔ̃vɨn a ɓa a vɔshɔni ɓa. Shɔzɛ gbete gbete maani ai tɛayɛ, shɔgbete awuni dɔdɔrim ɓa mɛvɔu ɓa. Vigbete a shaɓam nizɛ.>> Suu geliunɛ,<<Shɔmala, n zɛtɛ apɛ janyagadi, Mauru Samariyayi i bassi Ɗa si ji a yukɔpɔng kɔ, ama ɔ shɔ Yahudiyayi i shanɛ, shɔ si bassi Ɗa a Urushalima.>> Yesɔ geli suu nɛ,<<Ã sisɨn ang bi suum, ɗaa yɛ atɔ gbete shɔ yɛ bassi Ɗalapa toti a kɔpɔ, ko a Urushalimankɔ ɓa. Pɛ nizɛ ɔ shɔ Samariya ɔ ji zɛ shɔgbete ɔ basiuyɛ ɓa; Ama u Yahudawayi u zɛ shɔgbete u ɓassiu ɓɛɛtɛttɔ, aruviya shɔshɔraanɛ shɛjo atette Yahudawayikɔ. Ama ɗau kaanɛ, pɛli tɛttɔ gboti, Shɔ gbete Ɗa Suru kaka a yiniyɛ, i yɛ bassi Ɗalapa tɔ, a sisɨn gbete a Suru, i ãu ji bassinɛ gbete au kasiyɛ. Ɗalapa upɛ Suru, shɔgbeteyi i basiuyɛ ɔ̃riyitɛ kaka jazɨng akɔrɔ i basiurɛ nagbete ɔ̃yɛ.>> Suu geliu nɛ, <<N zɛ tɛttɔ kirisi yɛ atɔ, naa kaanɛyɛ, yɛ geliu vitɔ kpai.>> Yesɔ kasinya nɛ,<< N shɔ gbete n ɗɔ nyanwanɛ a mɔkɔnim, nkɔng ɔ̃rɛ ukɔ.>> A ɗauni Yesɔ jadɔɔyi i sɔɔu ɗɔbiirɛ, i bizaatɔ fɛ̃ɛm a ɗagbete i kpaau a ɗɔɔ nyanwanɛ a suuni. Ama piti shɔmni kpai shɔwɔɔ ji hɨ suu ɓanɛ, <<A kasi iviya? ko i hɨ Yesɔ nɛ, a nwanya piruu ivi a suuni viya?>> Kɛɗɔn suu yaa jakpari miirɛ, sɔɔ ɓuzɨn koomorɛ, a geli shɔ ɗɔwi nɛ, <<Ɔ anɛ ɔ zɛ shɔgbete au gelin vigbete n pɛli tɛttɔ kpai. Ko ukɔ ɔ̃rɛ kirisi ya?>> Kɛɗɔn i yaa koomourɛ i yɛ Yesɔ ɗɔbiirɛ. Naa ɔ̃tɛ sekaa Yesɔ jadɔɔyi i gakiu rɛ i shanɛ, <<Shɔmala, shaa vi pɛtɔ!>> Ama a kasinya nɛ,<<N vishaanɛ ɗɔn gbete ɔ ji zɛ ɓayɛ.>> Kɛɗɔn u jadɔɔyi gaa zɔ hɨlinɛ nɛ, <<Shɔ wɔɔ n-tiu vishaanɛ tɛya?>> Yesɔ geliyi nɛ,<<N kɨn, ukɔ ɔ̃rɛ n gɨn shɔgbete au shonyɛ nya, n yisi nya vishonɛ gbete au tɔnɛn pɛliyɛ. Ɔ nya shalinɛ wɔɔ ɗɔn nɛ,<Rootɛ shɛllɛ nɛ̃ɛ̃ti shɔ yɛ yeekɛ vishaanɛ viya?.>Ama n gelɔɔtɛ, ɔ kɨnnɔɔ pɛ awɔ jaa tɔ̃vɨn; vishaanɛ zɔ̃tɛ, teesitɛ shɔ yeerɛ! Shɔgbete yee visha yɛ kpaau vi ɗɔnwanɛtɔ, u toli vishau aru Suru gbete sɔ̃nya ɓa; aru shɔ visha ɓaanɛ a shɔ visha yeenɛ i kpai, i ntabiyatɔ̃nɛ a ɗɔzɔ̃. Vi shɔ shayɛ si nizɛ,<Shɔ wɔɔ ɓaatɔ shɔ wɔɔ yeetɔ.> N showɔrɛ ɔ yee visha a jaa gbete ɔ ji shovi ɓa a ɗɔn ɓa, shɔwɔyi i shovi tɛttɔ aɗɔn, ɔ kpaa vi ɗɔnwanɛ kɛjo ai vishonɛkɔ.>> Samariyayi i waanɛ i ã sisɨn a Yesɔ bi aru gbete suu shanɛ, <<Gelin vigbete n pɛli tɛttɔ aɗɔn kpai.>> Naa Samariyayi i a Yesɔ ɗɔbiitɛ, i gakiu rɛ nɛu ɔ̃ ai ikɔyini, kɛɗɔn Yesɔ ɔ̃rɛ a ikɔyini lee ziti.
Shɔ waanɛ i ã sisɨntɔ a Yesɔ bi aru ruu gbete shayɛ, i geli suu nɛ, << Dɔdɔrim u ã sisɨntɛ, ama ɓa ruu gbete a shayɛ ɓa, u au yuu u nta tɛttɔ, u zɛ tɛttɔ nizɛ upɛ shɔshɔraanɛkɔ a kootipi.>>
Yesɔ Gati Shɔ Yupɛ̃ni Ɓɛɛ Jaa
A knti gbete Yesɔ rootɛ lee ziti a ɗɔuni, yaa ɗɔurɛ a yɛ Galili rɛ. Arumkɔ Yesɔ au yuu shanɛ,<< Janyagadi shɔ ntau nya ɓa au wɛrɛkooni ɓa.>> Naa Yesɔ to Galili tɛ, shɔ Galiliyi i tɛu naka ziti, aru gbete i si ji a ɗɔɔ yumusinɛ tɛnɛdani a Urushalimani, aru siyi zɛ vigbete Yesɔ pɛli a ɗɔɔ yumusinɛ tɛnɛda tɛttɔ kpai. Kɛɗɔn Yesɔ sɔɔ sɔ̃n Kana a Galili, ɗɔgbete pɔ̃rɛ mii rikɛ mii inabi yɛ. A ɗɔukɔ shɔ yupɛ̃ni gɔmnati wɔ ɓɛɛ jaa u si vɔrɔ a Kapanahum. Naa jaau ntatɛ nɛ Yesɔ yuutɛ a Yahudiyani atɛ a Galili, yɛ au ɗɔbii a gakiu rɛ nɛu a Kapanahum nɛu gating ɓɛɛ jaa pɛ gbete au yaa vɔnɛtɛ maani. Yesɔ geliu nɛ,<<Awɔ tete shɔ sisɨn ãnɛ ɓa ɗɔn ɓa setɛ ɔ zɛtɛ vinɔlusinɛ a vibiizaanɛ ni.>> Kɛɗɔn Yupɛ̃ni gɔmnatiu risinya nɛ,<<Mashɔwɛrɛ, anɛ u yɛrɛ ɗa n jaa vɔyɛ.>> Yesɔ geliu nɛ,<<Yɛnɛ, mɛ jaau yɛ gatitɔ!>>
Jaau ã sisɨnrɛ a Yesɔ nyani a yɛrɛ. U ɗɔ wɛrɛ yɛnɛ u jawɛrɛyi kpaaurɛ i geliu nɛ, <<Mɛjaau u ɗɔ gatinɛ!>> Jaau hɨnɛ jaau gati pi ɗaa koviya, i kasinya nɛ,<<A si ɓuru dɔɔɗa gbete a niti nɔriu yaunaarɛ.>> Kɛɗɔn Jaau ɓeye kpaa sisɨnrɛ nɛ si ji a ɗawukɔ Yesɔ gelinrɛ nɛ, <<A jaa yɛ gatitɔ.>>Kɛɗɔn u au shɔwɛrɛyini kpai i ã sisɨnrɛ a Yesɔ biini. Shɔmpɛ vibii-zaanɛ gbete Yesɔ pɛsii pɛlinɛyɛ aɗagbete sɔɔ a Yahudiya anɛ Galili.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.