Skip to content
BibleKenya

Lamma Bible Translation Project

Yɔhana 12

Shɔ pmri Yesɔ nɔɔ a Betani

Si yaatɛ dii maangbete shɔ to lee yumusinɛ tɛnɛdarɛ, Yesɔ yɛ Betani rɛ, ɗɔgbete Liyazaro aɗɔnyɛ, jaa gbete Yesɔ yusuu a sàà yɛ. Shɔ nwariu vishaanɛ ɗarɛ a ɗɔukɔ, Marita ukɔ pɛli vishaanɛurɛ; Liyazaro u si jo tete shɔgbete i shaa vishaanɛ a Yesɔ ni. Kɛɗɔn Mariyamu tuu nɔɔ sũrũ-sũrũ au saa yuuni gbete shɔ pɛli a vigbete shɔ ɓaanɛ nard, a tɛ̃ri Yesɔ au dɔɔ, a yɔriukɛ au suyuu. Sẽẽ nɔɔu raa wɛrɛu kpai. Shɔzɛ gbete atette Yesɔ jadɔyi Yahuza Isikariyoti, gbete yɛ mɛli Yesɔ shanɛ, Shɔ si mɛli nɔɔm saa siliva laa kopi tu maani a ã saa u shɔ raayi ji tɛɛ ɓaya? Sha vim, ɓanɛ zɛ shɔ raayitɔ ɓa, ama aru u si ɓɔɔ. Si ji ukɔ tuu lazɔrɔ saa jo u ɗii naa a saa gbete a ɓuzɨnni.

Ama Yesɔ shanɛ, <<Ɔ shɛ sum nyaɓaǃ Ɔ yaaunɛ, woo nɔɔm aru u pɔ̃tɔ see lee gbete shɔ gbãnyɛ. Ɔ yɛ ɔ̃ ɓɛɛjo a shɔ raayini a lee-lee ama ɔ yɛ ɔ̃ ɓa nkɔng ni lee-lee ni ɓa.>>

Shɔ maruu a Liyazaro yuu

Shɔzɛ waanɛ naa i ntatɛ nɛ Yesɔ u a Betani, i yɛrɛ aɗɔn, ɓa Yesɔ yuukɔ sheeli ɓa ama wɔsɔ̃n a Liyazaru yuu, shɔgbete Yesɔ yusiu lapa a sàà yɛ. Kɛɗɔn shɔlansi wɛrɛ Ɗa i maruu nɛi nyɔ Liyazarɔ sɔ̃njo, aru ji au ruubiikɔ Yahudawayi waanɛ i yuu vãrɛ i ɗɔgbete i ã sisɨn a Yesɔ bi

Yesɔ To Urushalima Naa Kpati

A dii wɔɔ shɔzɛ waanɛ gbete i a ɗɔɔ yumusinɛ tɛnɛda i ntarɛ nɛ Yesɔ kaa Urushalima nɛ. Kɛɗɔn i tuu nalaa kolinɛ kãkã i shɛ ɓili ɗɔɔ Yesɔ kpaanɛ, i ɗee nyeenya lapa i shanɛ,

<<Hosana!>>

<<Ɗalapa u tasi shɔ gbete arɛ a Uɓeyelapa nii vɔɔ susãri biini!>>

<<Ɗalapa u tasi kpati Israila vɔɔ susãri biniǃ>>

Naa Yesɔ kpaa gãtola tɛ a gẽrɛ aɗɔn, ji naa gbete Ɗa nya ruubii shayɛ,

<<Mɔkaa nta setinɛ, koomo pɛ̃nɛ̃ba Sihiyɔna!

Ɔ kpati kaanɛ,

ɔ̃tɛ yuu jagãtola.>>

U jadɔɔyi i ji kpaa vim kara ɓa a ɗauni ɓa; ama akɨnti gbete Yesɔ yulapa a bassinɛni, i kpaa sisɨn kɛkn nɛ Ɗanyaruubii sha si tɛttɔ au ruubii ni, shɔ sɔ̃ri nya vigbete janyagadi shayɛ.

Mooyi gbete i si Yesɔ ni aɗagbete ɓaa Liyazarɔ nya a yusuu a sàà ikɔi sha vi gbete si ɗɔɔ yɛnɛrɛ. Mooyi i shɛ Yesɔ ɗɔɔ naa tɛnɛ a nyaba, aru si nta ruu vibii-zaanɛ gbete pɛli si tɛttɔ. Kɛɗɔn Farasiyayi i geli zɔɔnɛ,<<Ɔ zɛtɛ ya, Ɗa ji shaaruu ɓa! Shɔzɛ a koo kpai i au knti!>>

Gãsi Shɔ Heliniya i Kã Yesɔ Ɗɔ

Gãsi shɔ Heliniya i si jo atette shɔ gbete i yɛ Urushalima aru Ɗa bassinɛ a ɗaa yumusinɛ tɛnɛda ni. Kɛɗɔn i gɨn Filibu (shɔ Besaida a tipi Galili) i shanɛ,<<Mashɔwɛrɛ, u kasi Yesɔ zɛnɛ.>>

Filibu yɛrɛ a geli Anduru rɛ, i ziti piti i yɛrɛ i geli Yesɔ rɛ.

Yesɔ kasi i nyanɛ,<<Ɗaa pɛlitɛ gbete Shɔzɛja yɛ tɛ bassinɛ pẽneba yɛ. N gelɔɔm pɛ nizɛ: shɔ ji bu nɔɔ visha ɓatɔ a tipi a vɔrɛ ɓa, yɛ ɔ̃ ji nankɔ, kɛ vɔnɛ, kɛɗɔn rɛɛ jaa kɛkn waanɛ. Shɔ gbete kɛ ɔriu surunɛ yɛ raariu naatɔ; shɔgbeteyi i kɛ ɓɛ̃ɛ̃yi surunɛ a koo dɔdɔrim, si pɔ̃u surutɛ dangdang, suru gbete yɛ sɔ̃ nya ɓa. Shɔ gbete shoshing vishonɛ kpai ɔ̃tɛ kaka jazɨng akɔrɔ u gɨn n-tɔ, nɔgbete n jawɛrɛ yɛ ɔ̃ ji aɗɔgbete n aɗɔnyɛ. Shɔgbete yɛ shoshing vishonɛ piti kpai maye yɛ ɔriutɔ.>>

Yesɔ Nwanya Au Yuu Vɔnɛ

Yesɔ shanɛ, <<Dɔdɔrim n ɗɔgbete n nta kpetinɛ ang sisɨn, n shakɛnɛ iviya? N shanɛ,<Maye, mɔkaa yaanɛ ɗaam u arɛ u kpangrɛ ya?> Ama ji ruu gbetenkɔ n arɛ a kolapa anɛ kotipi, aru n tɛ raɓoonɛ a ɗaankɔ. Maye n ti basinɛtɔ aa nii ni!>>

Kɛɗɔn yeenya shɛ a kolapa nɛ, <<N n ti basinɛtɛ au yuuni, n yɛn pɛli sɔ̃n namkɔ tɔti.>>

Mooyi gbete i a ɗɔu i nta yeenyaurɛ, gãsiyi shanɛ pɛ jalɛ, wɔɔyi shanɛ, <<Ɗajashonɛlapa i nwanyarɛ awuni!>>

Ama Yesɔ geliyi nɛ,<< Shɔ ji nwa yeenyam ɓa ang yuu ɓa ama pɛ awɔ yuu. Shɔ yɛ yeruu kɛ dɔdɔrimkɔ a koo; kpati kotipim shɔ yɛ zɔ̃u kɛtɔ. Shɔkɛ ɗennɛ a koo n yɛn gɔ̃ shɔzɛ kpai ang ɗɔbii.>> Naa shatɛ nam, sha raɓoonɛ gbete yɛ ɓoo au vɔnɛyɛ.

Mooyi kasinya nɛ,<<U nya-ãsinɛ geliu nɛ, Shɔshɔranɛ yɛ ɔ̃ a suruni dangdang. Kɛpiru-ivi a shanɛ Shɔzɛja shɔ yɛ ɗeutɔ yɛnɛ lapa viya? Pi ɔ̃rɛ Shɔzɛja piya?>>

Yesɔ kasinya nɛ, << Ɗɔsẽsẽm yɛ ɔ̃ awɔ tete sekaa. Ɔ sã nyaba ɔ yɛrɛ ɗɔsẽsẽ doo aɗɔn, nɔgbete ɗɔkɨnri yɛ kukkɔɔ ɓa; Shɔgbete ra a ɗɔkɨnri zɛ ɗɔ yɛnɛ ɓa. Ɔ ã sisɨntɔ ɗɔsẽsẽni, dɔdɔrim ɔ yɛ kpaatɔ, aru ɔ ɔ̃ shɔ ɗɔsẽsẽ.>>

Yahudawayi i ji ã sisɨn ɓa au biini ɓa

Akɨnti gbete Yesɔ sha vim, yɛrɛ a ɓukɛtɔ aru moo i zɛurɛ.

Piti nɔgbete pɛli vibii-zaanɛ ai ɗɔbii, i ji ã sisɨn ɓa au biini ɓa, Vim ɔ̃ namkɔ aru vigbete janyagadi Ishaya shayɛ u ɔ̃ nizɛ:

<<Uɓeyelapa, shɔ gbete ã sisɨn a vigbete u shayɛni kɛpiya?

Uɓeyelapa tasiu kaka kɛpiya?>>

Arumkɔ i ji ã sisɨn ɓa, Ishaya sha si tɛttɔ nɛ:

<<Ɗalapa ɓaariyi nɔɔ tɛttɔ

wɔsɔ̃n kukiyi sisɨn tɛttɔ,

nɔgbete i nɔɔ yɛ zɛ vi ɓa

wɔsɔ̃n i sisɨn yɛ zɛ ruuɓa,

i yɛ rii nɔɔ ɓa ang ɗɔbiini ɓa, Ɗalapa sharɛ,

nɛn gatiyitɔ.>>

Ishaya sha vim aru zɛ Yesɔ bassinɛ, a nwanya kɛkn a yuuni.

Piti shomni kpai shɔ waanɛ a yupɛ̃ni Yahudawayini i ã sisɨntɔ a Yesɔ biini, ama aru seti Farasiyayi i ji tasi ɓa ɓilini ɓa, nɛ shɔ nyikiirɛ a Yahudawayi i ɗɔ ɔ̃nɛni. I ɔri ba bɛlinɛ gbete shɛ a shɔzɛ ɗɔbii u tɛɛ Ɗalapa ɓɛɛtɔ.

Ruyeenɛ a Yesɔ Nyanwanɛ

Kɛɗɔn Yesɔ ɗee nyeenya lapa shanɛ,<< Shɔgbete kɛ ã sisɨn nɛ ang bi, ji ã sisɨn ɓang bikɔ sheeli ɓa ama ã sisɨn a shɔgbete shong yɛ bi. Shɔ gbete kɛ zɛnnɛ, zɛ shɔ gbete shong yɛ. N arɛ a kootipi aru n pɛ ɗɔsẽsẽ, kopiya kɛ ã sisɨn nɛ ang biini ukɔ ɔ̃nɛ a ɗɔkɨnrini. Kopiya kɛ ntang ruugbete n shayɛnɛ, ji gɨn ɓa, n yɛn yeruu ɓa ai yuuni ɓa. N ji a ɓa nɛn yeruu a koo ɓa, ama n a ɗɔɔ shɔraanɛ. Shɔgbete kɛ ɓẽn ruubiinɛ, ji tɛ ruugbete n shayɛ ɓa, shɔ gbete yɛ yeruu ayuu aɗɔn. Nyaruu gbete n shayɛ ukɔ yɛ ɔ̃rɛ i shɔruyeenɛ a lee gadiiǃ Vim pɛ nizɛ, nya gbete n nwayɛ ji shɛ ɓa ang kaka bi ɓa, ama maye gbete shongyɛ ãsin nya tɛttɔ a vigbete n nwayɛ ang shayɛni. N zɛtɛttɔ u nya ãsinɛ n ti suru gbete yisi nyaɓa, vigbete n shayɛ ukɔ ɔ̃rɛ vigbete maye gelin yɛ nɛn shayɛ.>>

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.