Skip to content
BibleKenya

Lamma Bible Translation Project

Hiburuyi 13

U vishonɛ gbete Ɗalapa nta Yɛti Puru a wuniyɛ

Ɔ yɛ ɗekɨn jo a zɔ ɔrinɛ tasinɛ ni naa shɔgbete i gɨn kirisiyi tasi zɔyɛ. Ɔ tɛ shɔzatiyi naatɔ awɔ wɛrɛni. A nyabankɔ shɔwɔɔyi tɛɛ Ɗajashonɛlapayi naa ɓa ai zɛnɛ ɓa. Ɔ kpaasisɨn aru shɔgbeteyi a jahɨm bi ni naa ɔ ayini a nyazɔ. Ɔ kpaasisɨntɔ aru shɔgbete i boora bini naa ɔ ayini nyazɔ.

Zɔ tɛnɛ u ɔ̃ vipɛ̃nɛɓa awɔ kabiini piti kpai, ɔ̃ri shɔwɛrɛtɛ a ɓɛsoni kaka jazɨng a kɔrɔ i bassi zɔrɛ. Ɗalapa yɛ yeeruutɔ a shɔgbete i kɛ pɛli kpaatang nɛ a shɔgbete i kɛ roonɛ a shɔwɔɔ vɔshɔni ko a soroni.

Ɔ kɔyuutɔ aru saa kasinɛni, ɔkɔɔ kasi saa nɛ bang, aru Ɗalapa shanɛ, <<Dangdang n yɛn yawɔ ɓa akɨntini ɓa, ko fɛ̃ɛ̃ n yɛn yawɔ ɓa.>> Arumkɔ n yuuyɔrinɛ ɓa, u yɛ zɛnɔɔ shanɛtɔ nɛ,

<<Ɗalapakɔ ɔ̃rɛ n shɔ naapɔ̃sinɛ,

N yɛn nta seti ɓa.

Jashɔzɛ zɛn nɔɔ viwɔ pɛlinɛ kɛpikoviya?

Ɔ kpaa sisɨtɔ awɔ shɔ pɛ̃ni kɨntiyi biini gbeteyi nwarɔɔ ruu Ɗalapayɛ. Ɔ kpa sisɨntɔ a knti nɔgbete ɔ yupɛ̃ni i ɔ̃yɛ a nɔgbete i vɔ yɛni, ɔ matiyi nyaba nɔgbete i ɔ̃ ɔ̃nɛ sisɨn ãnɛ yɛni. Yesɔ kirisi ji kosi ɓa, nɔgbete ɔ̃ asi ɓuru u ji nankɔ nɛm, yɛ ɔ̃ sɔ̃njo dangdang. Ɔkɔɔ yaanɛ i vimatinɛ tot-tot i tuwɔ sisɨnrɛ au biini ɓa. Pɛ vitɔ̃vɨng ɔ ya ɔ sisɨnrɛ ɔ kpa Ɗalapa tɔ̃vɨn pɛlinɛrɛ, ɓa nɛ ɔ gɨn nyaãsinɛ aru vishaanɛ ɓa; shɔgbete ai gɨn nya ãsinɛmi ji pɔ̃siyi naa ɓa.

Shɔnyanwaanɛ gbete i ã viyuu ãnɛ a Yahudawayi ɗɔgɨnnɛ, i kaka nyanwanɛ ɓa ɗɔn nɛi shaa viyuu ãnɛ gbete au laazãyɛ ɓa. Shɔnyanwaanɛ pɛ̃niɓa Yahudawa i n ti kpaa vivaa a ɗɔpɛ̃niɓa wɔsɔ-wɔsɔ i ãrɛ aru ruuvini sɔkinɛ gbete i pɛliyɛ; ama vivaamiyi shɔ too a ɓili. Jo arumkɔ Yesɔ vɔ sɔ̃njo a ɓili komɔɔ pɛ̃nɛɓauni, aru u sɔki kopiya ruuvini au kpaa. U yɛnɛ jo a kɨnti komɔɔ pɛ̃niɓauni u kpaurɛ, u nta yusẽẽ awuni nyazɔ. Aru u komɔɔ pɛ̃nɛɓa ɓa aɗɔni ɓa a kotipimini gbete yɛ yisinya ɓa yɛni ɓa; U ɓɛɛji ɗɔgbete u gaa komɔɔ gbete kanɛyɛ. U ɓɛɛ ɓɛɛ jo u yɛ ɗekɨn a Ɗalapa bassinɛni a Yɛsɔ kabii, ukɔɔ ɔ̃nɛ u nyanwanɛ aru ruuvini pɛlinɛ yanɛ a Uɓeyelapa nii bassinɛ. Ɔkɔɔ sukinɛ a zɔ tɔ̃vɨn pɛlinɛ a naapɔ̃sinɛni ɓa, aru vimiyi pɛ viyuu ãnɛ gbete i pɔ̃ Ɗalapa yɛti puru ntanɛyɛ.

Ɔ nta ɔ yupɛ̃niyi nyatɔ ɔ gɨn vigbete i gelɔɔyɛ. aru i kɔwɔtɔ awɔ ɔ̃nɛni, ɔ̃ritɛ kaka jazɨng a kɔrɔ i geli Ɗalapa vigbete i pɛliuyɛ ai ɔ̃nɛni kpai. Ɔ kɛ gɨnyi nyanɛ iyɛ pɛliyi vishonɛ a sisɨn gbete; ɔ ji gɨnyi nya ɓa i pɛli vishonɛ a sisɨn lɛsinɛ, vimiyɛ pɔ̃wɔ ɓa ɔ kpa ɗekɨn yɛnɛrɛ ɓa.

Ɔgaki Ɗa jo au yuuni, u zɛtɛttɔ nɛ u yuyɔrinɛ au yuu ruuvini ni, vigbete au sisɨn ukɔɔ ɔ̃rɛ u yɛ ɗekɨn a tɔ̃vɨn pɛlinɛ a vishonɛni kpai. N gakɔɔtɔ, ɔ gaki Ɗa fɛ̃ɛm u pɔ̃rɛ nsɔ ɔ ɗɔbii weze tẽeti.

Ɗa Gakinɛ Au Nyayisinɛ

Ɗalapa yusi Uɓeyelapa Yesɔ a saa, shɔgbete upɛ jaga mɛrɛ̃ɛ̃ pɛ̃nɛba au ka kpaa, gbete shɔ maruu awuni au sɔ̃nyaɓayɛ. Mɛnɛ Ɗalapa gbete au ã sisɨn puru u ãwɔɔ vigbe a nɔgbete ɔyɛ pɛliu vishonɛ gbete au kasiyɛ, mɛnɛ a ka Yesɔ Kirisi u pɛli vigbete au kasiyɛ. Bassinɛ u ɔ̃ Kirisi ɓɛɛ dangdang! Nankɔ. Mɛnɛ Yesɔ u ãwɔ vitɔ̃vɨng gbete ɔ kasiyɛtɔ piti kpai a nogbete ɔyɛ pɛli vigbete kasiyɛ, mɛnɛ a Yesɔ kabii, u pɛli vigbete kasinɛn pɛliyɛtɔ au biini au yɛ kɔriuyɛ. Uyɛ pɛli ɓɛɛjo a Yesɔ Kirisi naa pɔ̃nɛkɔ shɛli. U ãu basin dangdang. Nankɔ.

Ruu Yeenɛ Nyayisinɛ

N gakɔɔtɔ mazɔ̃yi ɔ weshotɔ a yuu ruubii manɛ mini; aru sẽkoo gbete n beerɔɔ mi ɓa kpɛlɛ ɓa. N kasirɛ ɔ zɛtɔ nɛ u ɓɛzɔ̃ Timoti shɔ yau naatɛ a jahmni. Kanɛ ang ɗɔbiini tɛ̃ɛ̃ti, n yɛn atɔ awuni n zɛwɔrɛ.

Ɔ gee ɔ yupɛ̃niyi a shɔ sisɨn ãnɛyini nyatɔ kpai. A shɔ sisɨn ãnɛ gbeteyi a tipi Italiya yɛ i gee wɔ nyatɛ jo. Mɛnɛ Ɗalapa tɔ̃vɨn pɛlinɛ u ɔ̃ a ɔkɔɔni piti kpai.

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.