Lamma Bible Translation Project
Galantiyayi 6
Ɔ Tuu Zɔ Yukɔnɛtɔ
N shɔbiiyi, shɔkɛ sã shɔwɔnɛ adɔɔ vikɔ̃linɛ pɛlinɛ, ɔ shɔgbete ɔ a Ɗa Suruniyɛ ɔ sãurɛ ɔ sɔriu a nyaban tɔ̃vɨn; Ama ɔ̃tɛ kaka jazɨng akɔrɔ a ɗagbete ɔ pɛliyɛ ɔ rooriyuutɔ, ko-piya u kɔuyuutɔ nɔgbete ukɔma yɛ kɔdɔɔ ɓayɛ. Ɔ pɔ̃si zɔ naatɔ a raaboonɛni, a nyabankɔ ɔ kɛ pɛlinɛ si ɔ yɛ gɨn Kirisi nya ãsinɛtɛ. Shɔwɔɔ kɛ tuu yuunɛ nɛn pɛ viwɔ ama u ɓa viwɔ ɓa, a ɗaki ɓɛɛ ji ayuu weze. Kopiya u biliu yuu pɛtɔ u zɛrɛ, kɛ ɔ̃nɛ tɔ̃vɨn kɛɗɔn kopiya yɛ baasi kɛ au yuuni, nɔgbete yɛ teesiu yuu ɓa a vigbete shɔwɔɔ pɛliyɛni ɓa. Aruviya ko-piya u tuu jo u vituunɛ.
Shɔkɛ mataa ruu Kirisinɛ, a mati shɔ vitɔ̃vɨng gbete a shɔmala mataayɛ sɔ̃njo.
Ɔkɔɔ ɗakɔɔ yuunɛ; Shɔwɔɔ yɛ zɛnɔɔ Ɗalapa mɛɛnɛ dɔɔɓa, vigbete a ɓaayɛ a kpaa sɔ̃njo ukɔ. A kɛ ɓaa vinɛ aru vigbete a sisɨn kasiyɛ, a yɛ yee vigbete yɛ nyo a vɔrɔyɛ ji ukɔ; a kɛ ɓaa vinɛ a nyaba Ɗa suru, ji nyaba Ɗa surukɔ a yɛ yee suru gbete sɔ̃nya ɓayɛ dangdang rɛ. Ukɔɔ yɔɔnɛ a vitɔ̃vɨng pɛlinɛni; aruviya u ji ã yuu ɓa, kɛɗɔn ɗaa kɛ pɛlinɛ u yɛ yeevitɔ. Aru nankɔ ukɛ kpaa nyabanɛ u pɛli ko-piya vitɔ̃vɨngtɔ, badijo shɔgbete u wɛrɛ gbete atette sisɨn ãnɛyɛ.
Yushogɔ̃nɛ au Wasina a Nyageenɛ
Ɔ zɛ sẽkoo pɛ̃niba gbete dɔdɔrim n beerɔɔ ang naayɛǃ Shɔ gbeteyi kasɔɔ pɔ̃nɛ a kaka nɛ shɔ yeerɔ shaa yɛ, ikɔyi ɔ̃rɛ shɔgbeteyi baasirɛ a tasi yuu bɛli, i pɛli vim aru shɔyɛ tasiyi raarɛ aru Kirisi naɓaanɛ laa. Ko shɔgbete shɔ yeeri shaayɛ ma i gɨn nya-ãsinɛ ɓa; i kasinɛ shɔu yeerɔ shaa nɔgbete i ɓaasi kɨn awɔ yuu nɛ shɔ yeerɔ shaatɛ. Ama ɓɛɛ ang bi n baasi ɓɛɛ aru gbete shɔ ɓaa Uɓeyelapa Yesɔ Kirisi nalaayɛ; aru gbete shɔ ɓau nalaakɔ, n lɔki ruu kotipitɛ, kotipi ma lɔkin ruubiitɛ. Ruu shaa yeenɛ ko shɔ ji yee shaa ɓa, ɓa ukɔ ɔ̃rɛ viwɔ ɓa; vigbete ɔ̃ tɔ̃vɨn a ɓuzɨn ukɔ ɔ̃rɛ vigbete Ɗalapa shɛshi sɔɔyɛ. Aru shɔgbeteyi gɨn nya-ãsinɛmiyi ai ɔ̃nɛ kpai, binyatɔ̃nɛ a shɔraantanɛ u ɔ̃ a ikɔ ni a Ɗalapa ɓɛshɔzɛ Israilayini kpai!
U yisinɛ: shɔwɔɔkɔ n ting yukɔnɛ nɛ toti, aruviya nɔrɔ gbete ang bim tasi tɛttɔ nɛn pɛ Yesɔ foo.
N shɔbiiyi n gaki Ɗa mɛnɛ Uɓeyelapa Yesɔ Kirisi u tɔ̃vɨn pɛlinɛ u ɔ̃ a ɔkɔɔni kpai. Nankɔ.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.