Lamma Bible Translation Project
Vishonɛyi 26
Bulus rau yuu a Agiripa ɗekɨn
Agiripa geli Bulus nɛ, <<N ã naatɛ a nwanya aru a raa yuu.>>Kɛɗɔn Bulus ɗee naarɛ a nwanya shanɛ:
Kpati Agiripa! N ãsisɨntɛ a pɛlin vitɔvɨng nɛm aa ɗekɨnkɔ n yɛn ran yuuyɛ, aru nyanwalinɛ gbete Yahudawayi sha ang yuuyɛ, Pɛ vitɔvɨng ang ɗɔbiini aru a zɛ Yahudawayi nakootɛ ai yuuyɔrinɛni kpai, aru nankɔ n gakaatɔ Ɗau ã nyamɛrɛ a shoo gbete aa wee ang nyani. <<Yahudawayi kpai i zɛn ɔ̃nɛ tɛttɔ sin doo jakasa. I zɛ nɔ gbete n ɔ̃yɛ tɛttɔ kpai, gaanɛ ang tipi a Urushalimani. I zɛ tɛttɔ tɛ̃ɛ̃-tɛ̃ɛ̃, i kɛ kasinɛ i yɛ shitɔ ang kɨnti ni nɛn ɔ̃jo atette yumusinɛ au dɔlaa gbeteu tɛɛtɛttɔ a raɓoonɛni au nyaba gɨnnɛ Farasiyayi ni. Dɔdɔrim n shitɛ awɔ dekɨn shɔu nwa ruu ang yuu, aru n sisɨn ãnɛ gbete n awuni a Ɗalapa ma a mauruyi yɛ. Shɔm ji ruumanɛ gbete u nyakoo kop atu zitiyi i pɔ̃ sisɨn nɛi zɛyɛkɔ, i mabii i bassi Ɗalapa niti a zɨmbani, Kpati ji aru gbete n sisɨn pɔ̃nɛnkɔ Yahudawayi i wulunrɛǃ Aru ivi ɓa vi pɛlaa awɔ ɗɔbiini aɗɔm, ɔ ãsisɨn nɛ Ɗalapa yɛ zɛnɔɔ shɔ gbete vɔtɛ yusinɛ dɔɔɓa sàà ni ɓa viya?
<<N ang yuu si tɛ̃ɛtɛ̃ɛ n-tɔɔ n-tɛ n pɛli ko-iviyatɔ aru n zãri Yesɔ shɔ nazara ruubii dekɨn yɛnɛtɔ. Shom vigbete n pɛli a Urushalima kɔ. N kpaa kaka a shɔlansiyi a wɛrɛ Ɗa i bi ang mali shɔ tɔ̃vɨn a jaahm; Naa Yahudawayi kɛ yeruunɛ a shɔ tɔ̃vɨn i yuu nɛ shɔ nyoyi vɔrɔ, n pɔ̃naatɔ n-tɛ shɔ pɛlinɛ. N raki a Yahudawayi ɗɔ-ɔ̃nɛ kpai n tasiyi raarɛ wɔsɔ̃n n pɔ̃rɛ i nwali ruukɔ̃linɛ a Yesɔ yuu. N lɛsi sisɨn a ikɔyi ni fɛ̃ɛm, n gɨnrɛ yɛnɛ tipi ɓili n tasiyi raarɛ.
Bulus Nwanya Aru u Sisɨn Kɔsinɛ
<<Kɛɗɔn sin aɗɔ Damasku yɛnɛ aru n tasi shɔ gbeteyi a ɗɔu raa, shɔlansi wɛrɛ Ɗa i ang kakaurɛ. Kpati, si a nyaba a tete niti, n zɛ ɗɔsẽsẽ ɓoloɓolo au tɛɛ ɗaatɔ yɛ, shɛ a kunyasi a kukinrɛ a shɔ gbeteyi radɔɔ a nkɔniyɛ. U kpai u nwesi a tipi kɛɗɔn n nta yeenya a nya Ibiraniyawa nɛ, <Shawulu, Shawuluǃ A tasin-raa pi aru-iviya? A tasipɛ ayuu raa akɛ ɔ̃nɛ n shɔnɔpɔ̃.> N hɨnɛ<Uɓeyelapa mokaa piya?> A Uɓeyelapa kasinya nɛ, <Nkɔ ɔ̃rɛ Yesɔ, shɔ gbete a tasi-raayɛ. Ama yulapa nɛ a shi dɔɔ, n shɛ aa bi n lɔɔarɛ a ɔ̃ n jashonɛ, a geli shɔ wɔyitɔ vigbete a zɛrɛ ang yuu nɛm a vi gbete a yɛn tasaa yɛ a ɗekɨn. N yɛn raatɔ a shɔ Israila i naani a shɔ Yahudawa i naani, shɔ gbete n yɛn sho-a ai ɗɔbiiyɛ. A ɓeliyi nɔɔ a shɛshi a ɗɔkɨnri anɛ ɗɔsẽsẽ, a raayi kati a japɛ̃pɛ̃ɛ̃ naani anɛ Ɗalapa ɗɔbii, nɔgbete Ɗalapa u yaasiyi ruuvini kɛkɨn, wɔsɔ̃n i yɛ vɔsi vi gbete Ɗalapa marɛ nɛn ãyɛ a shɔ wɔyini gbete Ɗalapa sɔɔyi tɛttɔ aru i ãsisɨntɛ au bi.>
Bulus nwanya au vishonɛ
<<Kpati Agiripa aru nankɔ n ji ɓɛ̃ɛ̃ vitasinɛ gbete n zɛ a kolapa nya gɨnnɛ tɔɓa. N gaapɛ shɔ Ɗa Damasku i Ɗa nyaruubii nwarinɛ ang yɛ Urushalimarɛ kɛɗɔn yɛ tipi Yahudiya piti, a shɔ gbeteyi i ɓa Yahudawa ɓani kpai, n nwariyi Ɗa nyaruubii n-tɛ ɔ̃riyi kaka jazɨng a kɔrɔ i yaa ruuvini pɛlinɛtɔ i sɔɔ Ɗalapa ɗɔbii, aruumkɔ i pɛlikɛ vi gbete yɛ tasinɛi yaa ruuvini pɛlinɛtɛ. Ji arumkɔ shɔ Yahudawa miyi i sãnrɛ a wɛrɛ Ɗa i ɗɔ gbeteyi kãlin nyaba nyonɛyɛ. Ama Ɗalapa pɔ̃sinnaatɛ anɛ dɔdɔrim, aruukɔ n yurɛ n nwanya a shɔ ɗekɨn shɔpẽniyi a jajajni ayuu Yesɔ ruubiini. Vi gbete n shayɛ ji vi gbete janyagadiyi a Musa vi gbeteyi sha sinɛ yɛ ɔ̃yɛkɔ, Nɛ ɔ̃tɛ kaka jazɨng akɔrɔ shɔshɔranɛ u ɓoraatɔ, ukɔ yɛ gaa yunɛ a suru ni a sàà, aru u n ti Yahudawayi ɗɔsẽsẽ a shɔ gbeteyi ɓa Yahudawa ɓayɛ kpai.>> Aɗagbete Bulus u ɗɔu rau yuu a nyabamyɛ, Festu sha nya a gãgãni nɛ, <<Bulus a rii rãn yaǃ A vi gbete a ɓaliɓa waanɛm risaa yuutɛ zitiǃ>>
Bulus kasinya nɛ, <<Kpatiǃ n ɓa rãn ɓa, n shapɛ vitɔ̃vɨng ang tete sisɨn gbete. Kpati Agiripa! n nwanyatɔ a moni seeti ɓa ɗɔmɓa a zɛ tɛttɔ aru vimni. N ãsisɨntɛ a yɛ kpaa sisɨntɔ ko shɔpiyani, aru vim ji pɛli ɓa a ɗɔ ɓusinɛ ɓa. Kpati Agiripa a ã sisɨntɛ a janyagadiyi biini ya? N zɛ tɛttɔ a ãtɛǃ >>
Agiripa geli Bulus nɛ, << Nkɛ aa zɛnɛ a ɗaa dokaa nkɔ a kasinɛn ɗakinkɛ nɛn ri kirisatɛ ya?>>
Bulus kasinya nɛ,<<Ko ɗaa dokaa ko raki, N gaki Ɗa ɓa mokɔ sheeli ɓa ama shɔ gbeteyi weshoo nɛm ang nya kpai, i ɔ̃ ji na gbete n ɔ̃ ɓamkɔ, see mɔkaa ɔ̃nɛ shɔ jaahm naa n ɔɓam,>>
Kɛɗɔn kpati, yulaparɛ a gomna, Banis a shɔ gbeteyi i ɗɔuni kpai i yulaparɛ, I yaa ɗɔurɛ i ɗɔ nyanwanɛ a zɔɔni nɛ, <<Jaam ji pɛli vikɔ̃linɛ wɔɔ ɓa gbete yɛtɛ nɔgbete shɔ mau a jaahm ko shɔu nyou vɔrɔrɛ ɓa.>> A Agiripa geli Festu nɛ, <<Si ɓanɛ jaam wuli ruum tɛttɔ a kayisar ɗɔbii ɓa, shɔ si yau naatɛ.>>
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.