Vishonɛyi 12

Ratasinɛ Sha waanɛ

1A ɗaankɔ kpati Hiridu gaa shɔ gãsi a ɓuzɨn shɔ gbeteyi gɨn Ɗalapa ratasinɛrɛ. 2Hiridu pɔ̃rɛ shɔ nyo Yakub rɛ, Yɔhana ɓɛzɔ̃, a zaali. 3Naa zɛtɛ Yahudawayi nta yɛti purutɛ a vigbete pɛliyɛni, a sã Bituru sɔ̃njirɛ. (Vim pɛli a ɗaa gbete shɔ pɛli yumusinɛ borodi gbete yisiti ɓa ɗɔmɓa yɛ.) 4Akɨnti gbete Hirudu sã Bituru tɛ a mau a jahm, a ãi a sɔjayi nɛ̃ɛ̃ti i kn kopishɔpiya naa nɛi gasɨuntɔ. Si a Hiridu sisɨn nɛn n-tiu mooyi ɗekɨn aru u yeruu au yuu a knti yumusinɛ tɛnɛda. 5Shɔ pɔ̃ Bituru rɛ a jahm, ama shɔ gbeteyi ãsisɨn Ɗabii i si ɓɛjo a ɗɔɔ Ɗa gakinɛ lɔsi-lɔsi au yuuni.

Shɔ Shɛshi Bituru a jahm

6A zɨmba gbete Hiridu pɔ̃ a sisɨn nɛn shɛshi Bituru a jahm yɛnɛ shɔzɛ ɗɔbii naa dii kɛ kaanɛ yɛ, Bituru u si a noro atette sɔjayi ziti, shɔ mautɔ a saagãnya ziti, shɔ nyejaa ganɛyi i si ɗɔɔ nyejahm ganɛ. 7Ɓa shɔ zɛnɛni ɓa kɛɗɔn Ɗajashonɛlapa shɛrɛ a ɗɔuni, ɗɔsẽsẽ tasirɛ a jauni. A Ɗajashonɛlapa ɗii Bituru naarɛ a lakɔrɔ, yusiu laparɛ a shanɛ,<<Yunɛ! gbãgbã!>>Tɛ̃ɛ̃ti saagãnyawi tɛ̃ɛ̃rɛ a Bituru naani a tɛ̃ɛ̃ tipi. 8Kɛɗɔn Ɗajashonɛlapa shanɛ,<<Tosaa fãrã nɛ a kɔrãti ni.>> Bituru pɛlirɛ nankɔ. Ɗajashonɛlapa geliu nɛ, <<Vãa a fãrã nɛ bi a gɨnrɛ.>> 9Bituru gɨurɛ a shɛrɛ a jahm ni, ji zɛ ɓanɛ vigbete Ɗajashonɛlapa a ɗɔɔ pɛlinɛm pɛ nizɛ ɓa, tɔnɛ mɛnɛ nɛn zɛpɛ vigbete Ɗalapa yɛ pɛliyɛ a ɗekɨn 10Naa i tɛ shɔ nyejaa ganɛ ɗekntɛ a shɔ gbete pɛsiyɛni, ai arɛ a nyejaa saka gbete shɔ to ɓuzɨn komooyɛ, nyejau ɓelirɛ au yuu, kɛɗɔn i shɛrɛ, naa i atɛ aɗɔ gbete nyaba lanɛu doo nya aɗɔnyɛ, a ɗaukɔ tɛ̃ɛ̃ti Ɗajashonɛlapa yaa Bituru rɛ.

11Kɛɗɔn Bituru sisɨn sɔɔ kɛkn a vigbete kpauyɛni, a shanɛ, <<Dɔdɔrim n zɛtɛ pɛ nizɛ Uɓeyelapa shou Ɗajashonɛlapa rɛ aru u rantɔ a Hiridu naani, wɔsɔ̃n u rantɔ a vikɔ̃linɛ gbete Yahudawayi kasi pɛlinɛ ang yuuyɛ.>>

12Naa Bituru zɛtɛ nankɔ, a yɛkɛ Mariyamu wɛrɛ, Yɔhana Marku ɓini gbete shɔ ɓaunɛ Maraku, aɗɔgbete shɔzɛ waanɛ i tolinya i ɗɔgbete i gaki Ɗa yɛ. 13Bituru waa nyejaa ɓilirɛ, a jawɛrɛ gbete pɛli vishonɛ a wɛrɛuko u nii nɛ Roda arɛ nɛn kasi shɔu waa nyejaa nyapɛ. 14A ntarɛ Bituru yeenya, kɛɗɔn ji ɓeli nyejau ɓa, ama a sɔɔ ɓuzɨn a deyinɛ aru yɛti puru gbete ntayɛ, a geliyi nɛ Bituru shitɛ a nyejaa. 15Kɛɗɔn i geliu nɛ, A pɛ rãn yaaǃ Ukɔ ma yɛ ɗekɨn a shanɛni nɛpɛ nizɛ, kɛɗɔn i kasinya nɛ,<<Pɛ Bituru Ɗajashonɛlapa!>>

16Ama Bituru u ɓɛjo a ɗɔɔ nyejaa waanɛ. A kɨnti ni i ɓeliu nyejaarɛ, naa i zɛutɛ, bizaayi kɛtɔ. 17Bituru tasiyi kɛ naa nɛi ɔ̃ shok, a tasidɔɔ nɔgbete Uɓeyelapa shɛshiu ɓili a jahm-yɛrɛ, A shanɛ,<< Ɔ geli Yakub tɔ a gãsi shɔ gbeteyi sisɨn ãnɛ a Ɗabii aɗɔn vimtɔ.>> Kɛɗɔn yurɛ a yɛ ɗɔwɔɔrɛ.

18Naa dii kaatɛ, sɔjayi ai nɔɔ i yɔri yuu fɛ̃ɛm aru vigbete kpaa Bituru yɛni. 19Hiridu ãsinya nɛ shɔu kã Bituru ɗɔtɔ, ama i ji kpaau ɗɔ ɓa. Kɛɗɔn hɨli shɔ ɗɔganɛyirɛ a ãsinyarɛ nɛ shɔu nyoki vɔrɔnɛ.

Akɨnti vim Hiridu yurɛ a tipi Yahudiyani, yɛkɛ Kayisariya pɛli dii gãsi kɛ ɗɔwakɔ.

Hiridu vɔnɛ

20Hiridu sisɨn lɛsi fɛ̃ɛm a shɔ Taya a Sɔdom ni, kɛɗɔn i arɛ a nyazɔ a Hiridu ɗɔbii nɛi kasiu zɛnɛ, i gaa kãnɛ pɛ Bilatu jagbete sã ɗɔuyɛ, nɛu pɔ̃siyinaa. Kɛɗɔn i a Hiridu ɗɔbiirɛ a ɗɔzɔɔ aru i kã ɔ̃nɛbiinyatɔ̃nɛ, aru i tipi yeenɛ kpaa vishaanɛ ji a kpatiu tipikɔ.

21A lee gbete shɔ lɔɔyɛ nɛ shɔ kpesi zɔ a ɗɔuyɛ, Hiridu tosiu fãrã kpatirɛ, a ɔ̃rɛ a laa kpatini, a geliyi ruurɛ. 22Naa mooyi nta ruutɛ i ɗee yeenya lapa i shanɛ, <<Ɓa shɔzɛ nwanyan rɛ ɓa, ama pɛ jaaɗa wɔɔ.>> 23A ɗɔukɔ tɛ̃ɛ̃ti Uɓeyelapa Ɗajashonɛlapa waa Hiridu rɛ a tipi, aru ji bassi Ɗalapa ɓa, kɛɗɔn nweliyi shaaliurɛ a vɔrɛ. 24Ama Ɗa nyaruubii yɛ ɓɛjo ɗekɨn u ɗɔsãtinɛ a banɛni.

25Naa Barnaba a Shawuluni i yisi vishonɛtɛ i sɔɔkɛ Urushalima, ai akɛ Yɔhana shɔ gbete shɔ ɓaunɛ Maraku ni a nyazɔɔ.