Skip to content
BibleKenya

Lamma Bible Translation Project

2 Timoti 1

Nkɔ Bulus Kirisi Yesɔ Jashonɛ beerɔɔmi sẽkoomrɛ a Ɗalapa kasinɛni, Ɗalapa shonrɛ nɛn nwari shɔ ruu suru au ɔ̃ dangdang gbeteu ma nɛn ã shɔ aka Kirisi Yesɔ kabii.

Yɛnɛ Timoti majaa gbete n ɔriyɛ ɗɔbiiː

Mɛnɛ Ɗalapa uɓeye a Kirisi Yesɔ Uɓeyelapa u ãwɔ tɔ̃vɨn shonɛ, u ntawɔ raatɔ, a ɔ̃nɛbiinyatɔ̃nɛni.

Bulus Ɗa gakinɛ dɔ̃rinɛ

N dɔ̃ri Ɗalapa shɔ gbete n basiuyɛtɛ, nagbete maruyi pɛli si a sisɨn gbete yɛ, n dɔ̃riutɛ nɔgbete n kpaasisɨntɔ n gakɔɔ Ɗa kopileepiya zɨmba a niti ni. N kɛ kpaasisɨn nɛ aa muruni, n kasaa zɛnɛtɛ fɛ̃ɛm, aru n kpaa ɔ̃nɛ atette sisɨn puru. N kpaasisɨntɛ a sisɨn-ãnɛ gbete a wunini, zɔng sisɨn-ãnɛ gbete mɛtara mini Loyi a mini Yunasi u sɔ̃njo a wunini. N ãsisɨntɛ a sɔ̃nji a wunini. Arumkɔ n kpaarɔɔsisɨn ɔ pɔ̃ Ɗa vi-ãnɛ u ɔ̃ suruni naa nkɛ pɔsɔɔ naa nɛ a yuu yɛni. Aruviya suru gbete Ɗalapa a wuyɛ ji pɔ̃uɓa u ɔ̃ shɔsetiyi ɓa ama ãu suru au kaka, a ɔrinɛ, a yuusãnɛ.

Mokaa ntayusẽ shinɛ nɛ ayuu Uɓeyelapa Yesɔ Kirisini, ko ang yuu mokaa ntayusẽnɛ, nkɔng shɔgbete shɔ mang a Kirisi yuu, nɔgbete a si pɛli nam a masisɨntɔ a raɓoonɛni aru ruu tɔ̃vɨnmi, Ɗalapa yɛ ãwɔ kaka tɔ au yuuni. Ɗalapa raautɛ a ɓaunyarɛ nɛu ɔ̃ n shɔbii, ji ɓau nyaɓa ayuu vigbete u pɛliyɛ tɔ̃vɨn ɓa, ama ji ayuu ruu gbete pɔ̃ au sisɨnyɛ a tɔ̃vɨn shonɛ. Ɗalapa ãu tɔ̃vɨn shonɛm a nyaba Kirisi Yesɔ kabii, koo u ɓɛɛ shɛnɛ. Ama dɔdɔrim Ɗalapa tasiutɛ a nyaba u shɔshɔranɛ anɛ Kirisi Yesɔ. Ukɔ pɔ̃ ruu vɔnɛrɛ kagbete, a tasiu ɗɔsẽsẽ ruu suru kpaanɛ a nyaba ruu tɔ̃vɨn gbete yisinyaɓayɛ.

Ɗalapa lɔntɛ nɛn ɔ̃ jashonɛ a shɔmala nɛn nwari shɔ ruu tɔ̃vɨn, pɛ ji a ruu vimkɔ n ɓoorarɛ. Ama n kaka dooɗɔ lakinɛ fɛ̃ɛm, aruviya n zɛ shɔ gbete n ãsisɨn au biini tɛttɔ, n zɛ tɛttɔ yɛ zɛnɔtɔ u sã vigbete ang ãu a naa tɔ̃vɨn anɛ leeukɔ. Ruu tɔ̃vɨn gbete n mataayɛ a sãtɔ fɛ̃ɛm, u ɔkɛ vitasinɛ aa ɗɔbii gbete a gɨnyɛ, a ɔ̃ a ɓuzɨn sisɨn-ãnɛ a ɔrinɛ gbete pɛu ɓɛɛ aka yuɓasinɛ a Kirisi Yesɔni. A nyaba Ɗa suru kaka gbete u ɗɔ ɔ̃nɛ a ukɔni, ɔ shitɔ ayuu vitɔ̃vɨng gbete Ɗalapa ãwɔ a naani.

A zɛ tɛttɔ nɛ kopiya a Tipi Asiya risin kntitɛ, piti a paijelu a Hamojeni ni. Mɛnɛ Ɗalapa u nta Onɛsiporu shɔwɛrɛyi raatɔ, aru kopileepiya masinbiitɔ. Ji ntausẽɓa nɛn a jahmni ɓa, Ama naa to Roomatɛ tɛ̃ɛti, a gaakɛ n kãanɛ a kpang pɛgotɔ. Ɗalapa u ntau raatɔ a leeuniǃ Ɔ zɛtɛttɔ fɛ̃ɛm vigbete pɛlin a Apisa yɛni.

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.