1 Bituru 5

Ɗalapa Jaaviva

1Nkɔng shɔpẽni, n ang yuu n gaki shɔpẽni wɛrɛ Ɗa gbete i awɔ teteyɛ, nkɔng ɔ̃rɛ shɔshinɛkɨnti au zɛ kirisi raaɓoonɛ yɛ, n yɛn kpaa bassinɛ tɔ a leegbete yɛ ayɛni. 2Ɔ ɔ̃ naa jagavivayi, ɔ ga jaaviva a Ɗalapa ãwɔyɛtɔ awɔ kasinɛ nɔgbete Ɗalapa kasinɛ ɔ pɛliyɛ, ɓa naa shɔ ntosɔɔtɔ ɓa, ɔ shovishonɛ ɓanɛ aru nazã ɓa ama a sisɨn vishonɛ gaanɛ. 3Shɔgbete Ɗalapa ãwɔ nɛ ɔ sãyɛ ɔkɔɔ tasiyi kakanɛ, ɔ ɔ̃ shɔgbete ɔ shɔ gɨnnɛ i mativi awɔ biiyɛ. 4Naa kpati jagaviva kaanɛyɛ ɔ yɛ tɛ Salabu bassinɛ gbete u ɗɔkɔlinɛ yɛ sɔ̃nyaɓayɛtɔ.

5Sɔ̃n ji nankɔ, ɔ jakasayi ɔ̃rɔɔtɛ kaka jazɨng akɔrɔ ɔ ãyuutɔ awɔ shɔpẽni biini. Ɔ kpai ɔ̃rɔɔtɛ kaka jazɨng akɔrɔ ɔ pɛli zɔ vi ɔ rooriyuutɔ, ɔ shoshi zɔvitɔ; aru laabeenɛ shatɛttɔ nɛ,<<Ɗalapa bɛ̃ɛ yubassinɛtɔ, ama tasi shɔyuuroonɛ tɔ̃vɨn pɛlinɛtɔ.>> 6Ɔ rooriyuutɔ, a Ɗalapa nosisɨn shɔgbete vi tɛu kaka ɓayɛ naa, nɔgbete yɛ ɗeuwɔ kɛkn rakaka a ɗau kasiyɛ. 7Ɔ tuu ɔ yuyɔrinɛ piti ɔ ãu a naa, aruviya ukɔ kɔwɔrɛ.

8Ɔ ɔ̃ nokãkãri, ɔ kɨnlinɔɔtɔ! Ɔ shɔ nɔpɔ̃, shɔruuvini u ɗɔ witinɛ naa zingan witiyɛ, u ɗɔu kã shɔu yɛ shayɛ. 9Ɔ shi dɔkaziti awɔ sisɨn ãnɛni, ɔ kpaa sisɨntɔ shɔ sisɨn ãnɛ gãsiyi kpai a kotipi i ji ɗɔ raaɓoonɛ nankɔ. 10Ama a knti gbete ɔ ɓooraatɛ sekaa, Ɗalapa e tɔ̃vɨn shonɛ au ɓawɔnya nɛ ɔ kpaa bassinɛ gbete sɔ̃nyaɓayɛ aka yuɓasinɛ a Kirisi, u au yuu yɛ pɔ̃wɔrɛ ɔ shidɔkaziti tɛpɛ-tɛpɛ, pɔ̃rɛ ɔ ɔ̃ a kakani a bimanɛni. 11Kaka kpati roonɛ u ɔ̃kɔɔ u ɓɛɛkɔ dangdangǃ nankɔ.

Nyageenɛ Au kunayɛ

12N beerɔɔ sẽkoo dokaam Sila pɔ̃sinnaa rɛ, shɔu n zɛ naa ukɔ ɔ̃rɛ shɔ sisɨn ãnɛ Kirisa tɔ̃vɨn. n beerɔɔ jaa sẽkoom n kasirɛ n masɔɔbii, n gelɔɔtɔ shomkɔ ɔ̃rɛ Ɗalapa tɔ̃vɨn shonɛ. Ɔ shidɔkaziti a yuuni.

13Shɔ sisɨn ãnɛyi a Babila, a Ɗalapa lɔyi sɔnjo naa ɔkɔɔ i gee ɔ nyatɛ, wɔsɔ̃n majaa Marikusini gee wɔ nyatɛjo. 14Ɔ gee zɔ nya ɔ kɔ̃ti zɔ naa bii naa ɔrinɛ kirisa.

Mɛnɛ ɔ̃nɛbiinyatɔ̃nɛ u ɔ̃ a ɔkɔɔni kpai ɔ shɔ gbete ɔ pɛ Kirisi ɓɛɛ yɛ.