Skip to content
BibleKenya

Lamma Bible Translation Project

1 Bituru 2:9

Verse 9 is marked below, with the whole chapter around it. Read from the start

Tari Suru a Shɔ Ɗalapa.

Aru nankɔ ɔ zɔ̃wɔ yuu kati a vini pɛlinɛni; nyayeenɛ tɔɓa, ko shɔɗakinɛ tɔɓa ko gɨnkaanɛ ko nyakoo dãnɛ tɔɓa. Ɔ ɔ̃ naa jabẽrẽti sɔɔ a shɔ yeeu dɔɔtɔyɛ, au kã mii e suru zalak kopiɗaviya, nogbete ɔkɛ ɓoonɛ ɔ barɛ ɔ ranaarɛ. Nɔgbete laabeenɛ Ɗanyarubii shayɛ nɛ, <<Ɔ zɛ nɔgbete Uɓeyelapa u tɔ̃vɨn ɔ̃ yɛ.>> Ɔ a Uɓeyelapa ɗɔbiitɔ, tari suru gbete jashɔzɛyi bẽu a nɔniyɛ, ama Ɗalapa lɔurɛ u ɔ̃ kiriri. Ɔ a jo naa tari suru, a Ɗalapa shovi awuni u ɗɔɔ wɛrɛ Ɗa suru manɛyɛ. Ɗɔgbete ɔ yɛ shɔvi a ɗɔn naa shɔlansi wɔsɔ-wɔsɔyi, ɔ ã viyuu ãnɛ a Ɗalapa tɛyɛ aka Yesɔ Kirisi. Aruukɔ laabeenɛ Ɗanyaruubii shanɛ,

<<N lɔɔ tari kiriri au vishonɛ tɛɛ gãsiyi kpai a dɔjaa tanɛ,

gbete n ɗɔ pɔ̃nɛ a ɗɔɔ wanɛ a Siyona;

shɔgbeteu kɛ ã sisɨnnɛ au biini yɛ ntayusẽ ɓa.

Ɔ shɔgbete ɔ ã sisɨntɛ tarim pɛ tɔ̃vɨn awɔ ɗɔbiini; ama shɔgbete i ji ã sisɨn ɓami:

<<Tari gbete shɔɗɔmaanɛ i bɛ̃ɛ̃ yɛ nɛu vishonɛ ɓa,

ukɔ ɔ̃ tɛ tari gbete au tɛɛ tari gãsiyi kpai.>> Laabeenɛ Ɗanyaruubii wɔɔ sha sɔ̃nnɛ,

<<Shom pɛ tari gbete yɛ pɔ̃ shɔ dɔkɔnɛ kɔ,

tari gbete yɛ pɔ̃yirɛ i wẽsiyɛ.>>

I kɔdɔɔ aru i ji ã sisɨn ɓa a ruumni ɓa; shɔm pɛ Ɗalapa pɔ̃yirɛ.

Ama ɔkɔɔ nyakoo gbete Ɗalapa lɔɔyɛ, ɔkɔɔ kpati shɔlansiyi, ɔ tipi Wɔsɔ-wɔsɔ, Ɗalapa shɔbiiyii, shɔ lɔɔurɛ nɛu waanya aru vinɔlusinɛ pɛ̃niba e Ɗalapa, shɔgbete ɓaunya a ɗɔkɨnri yɛnɛ u vinɔlusinɛ ɗɔsẽsẽ. Si a ɗauni ɔ siɓa Ɗalapa shɔbiiyi ɓa, ama dɔdɔrim ɔ pɛ u shɔbiiyi; a ɗauni si ɔ ji zɛ Ɗalapa raatãnɛ ɓa, ama dɔdɔrim ɔ tɛu raatãnɛtɛ.

Ɗalapa Fooyi

Masayi n gakɔɔtɔ, ɔ naa shɔzati ɔ wɛrɛ ɓa a kotipimni ɓa! Ɔkɔɔ sɨ sisɨn nɛ a vijazɛbii kasinɛ, aruviya i pɛ shɔnɔpɔ̃ a suruni. Ɔ ɔ̃ ɔ̃nɛ atette shɔgbeteyi gɨn Ɗa ɓayɛ u ɔ̃ tɔ̃vɨn, naa ikɛ shanɛ nɛ ɔ pɛlinɛ pɛ vini, i yɛ zɛwɔ vi tɔ̃vɨntɔ i bassi Ɗalapa rɛ au leegbete yɛ a yɛ.

Aru Uɓeyelapa u kpaa bassinɛ, ɔ ãwɔ yuutɔ ɔ gɨn shɔgbete i kaka shɔzɛyi yuuni nyatɔ, ɔ gɨn kpati pɛ̃niba nyatɔ, aru u kaka tɛɛ kopiyatɛ, ɔ gɨn gɔmnayi nyatɔ, au lɔyi nɛi tasi shɔruuvini raayɛ, u bɛli shɔgbeteyi pɛli vi tɔ̃vɨntɔ. Aruviya Ɗalapa kasinɛ nɛ ɔ ɓusi shɔgbete i sẽrẽ ɓayɛ i nyashanɛtɔ a vitɔ̃vɨng gbete ɔ pɛliyɛni. Ɔ ɔ̃ ɔ ɔ̃nɛ yuu, ɔkɔɔ pɛlishovininɛ ɔ ɔ̃nɛ yuuni nɛi kuki vini, ama ɔ ɔ̃ ɔ̃nɛ au tasinɛ ɔ Ɗalapa fooyi. Ɔ bassi kopiyatɔ, ɔ ɔri shɔ sisɨn ãnɛ gãsiyitɔ, ɔ bassi Ɗalapa tɔ, ɔ bassi kpati tɔ.

Vitasinɛ e Kirisi Raaɓoonɛ

Jawɛrɛyi ɔ ãwɔ yuutɔ awɔ showɛrɛyi biini ɔ tasiyi basinɛtɔ, ɓanɛ shɔ tɔ̃vɨn a shɔ yuuroorinɛyikɔ shɛli ɓa, ama a shɔgbete i lattɔni kpai. Naa akɛ mɛɛsisɨnnɛ a ɓooraa aru gbete ɓa ruuvini ɓa, ama a pɛli aru Ɗalapa ruubii, yɛ tasaa susãritɔ. Naa shɔkɛ waanɛ aru ruuvini a pɛliyɛ akɛ mɛɛsisɨnnɛ a yɛ kpaakɛ iviya? Ama naa akɛ mɛɛsisɨnnɛ aru vigbete a pɛli tɔ̃vɨn, Ɗalapa yɛ tasa susãritɔ a yuuni. Ɗalapa ɓawɔ nya jo aru ruumkɔ, aru Kirisi au yuu ɓooraatɔ awɔ yuuni, yawɔɔtɛ a vitasinɛ, aru ɔ sɔɔ nyaba gbete au sɔɔyɛ. Ji pɛli ruuvini wɔɓa, shɔwɔ ji nta nyazɔ̃ wɔɔ ɓa au nyani ɓa. Shɔ dãurɛ ji kɔsi nɔɔ ɓa a dãnɛ ni ɓa. Naa ɓooraatɛ ji tɔɓanɛn kɔsipɛ ɓa, ama pɔ̃ sisɨn a Ɗalapa bi, shɔgbeteu yeeruu tɔ̃vɨnyɛ. Kirisi au yuu tuu ruuvini au bi yɛnɛ laa a shɔ ɓaunaa aɗɔnyɛ, pɛli ɗɔkɔ aru u yaa ruuvini, u ɔ̃ ɔ̃nɛ tɔ̃vɨn pɛlinɛ, aru nɔrɔ̃ gbete shɔ ntarukɔ u kpaa gatinɛrɛ. Ɔ si naa mɛrẽẽ ai ni nyabayɛ, ama dɔdɔrim shɔ sɔrɔɔtɛ ɔ gɨn jagaviva, au kɔwɔ suruyɛ.

Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.