1Korantiyi 13

Shɔvi Matinɛ Aru Ɔrinɛ

1N yɛn zɛ nɔɔ shɔ nyakoo nwanɛtɔ a Ɗalapa jashonɛ lapayi ɓɛɛni piti kpai, ama n ɔrinɛ ji ɔ̃ ɓa ɗɔn ɓa n nya nwanɛ jo nya karkinɛ weze ko toto gbete shɔ waayɛ. 2N sẽrẽ vigbete i kɛ anɛ ɗekɨn kɛ ɔ̃ nɛ a ɗɔn; ko n sẽrẽ kɛ ɔ̃ nɛ ɗɔn a viɓusinɛ zɛnɛni; ko n sisɨn ãnɛ kɛ ɔ̃nɛ ɗɔn piti kpai ang yɛn gisi kɔpɔ dɔɔtɔ yɛ, ama n ɔrinɛ ji ɔ̃ ɓa ɗɔn ɓa n ɓa viwɔ ɓa. 3N yɛn zɛnɔɔ vigbete n a wuniyɛ ãnɛ tɔ piti kpai, ko n ang bi nɛ shɔu totɔ, ama n ɔrinɛ ji ɔ̃ ɓa aɗɔn ɓa, vim yɛ pɛlin vitɔ̃vɨng ɓa ang bi niɓa.

4Ɔrinɛ ukɔ ɔ̃rɛ sisɨn mɛnɛ a vitɔ̃vɨng pɛlinɛ; ɔrinɛ ɓa gɨn kaanɛ ko baasinɛ ɓa; 5ɔrinɛ basi yuu ɓa, ɔrinɛ kasi ba ɓa u yuu ɓa, ɔrinɛ sã vigɔllɔrɔ ɓa a sisɨn ni ɓa; 6ɔrinɛ kasi vikɔ̃linɛ ɓa, ama binyatɔ̃nɛ a tɔ̃vɨn ni. 7Ɔrinɛ lɛri ɓa; au sisɨn ãnɛ ni, a sisɨn pɔ̃nɛ, au sisɨn mɛnɛ ni ɓa.

8Ɔrinɛ sɔ̃nya ɓa. Ɔrinɛ geli shɔ ruutɔ̃vɨng, ama i ɓa dangdang ɓa; sẽrẽ nyakoo tot-tot nwanɛ aɗɔn, ama i yɛ sɔ̃nyatɔ; ruu zɛnɛ aɗɔn, ama yɛ tɛɛtɔ. 9Aru u sẽrẽ vizɛnɛ a ruu nyawaanɛ ji yii ɓa; 10ama shɔ tɔ̃vɨn i kanɛ, kɛɗɔn vigbete si ji yii ɓa yɛ niikɛtɔ.

11A ɗagbete sin jabẽrẽti yɛ, n nyanwanɛ naa jajja ɓɛɛ, n ntavi naa jajja a ruu lɛrinɛ ni si jo naa jabẽrẽtiyi ɓɛɛ; dɔdɔrim ang batɛ mi, n pɛli vi tɔɓa a nyaba jajja ni ɓa. 12Vigbete u zɛ dɔdɔrim ɔ̃ jasuru zɨnan-zɨnan a zɛlivini; u yɛu zɛzɔ nɔkɨntɔ. Vigbete n zɛ dɔdɔrim i ɓa bang ɓa; kɛɗɔn n yɛn zɛkɛ piti kpai naa Ɗalapa vi zɛnɛ ang yuu. 13Vi taati miyi i ɔ̃ jinankɔ: ukɔ sisɨn ãnɛ, sisɨn pɔ̃nɛ a ɔrinɛ; a shɔgbete ɔ̃ pẽnibayɛ ukɔ ɔrinɛ.