Lamma Bible Translation Project
1Korantiyi 1
N nkɔ Bulus shɔgbete Ɗalapa ɓau nya nɛu ɔ̃ Kirisi Yesɔ jashonɛ, shoshiu sẽkoo nyageemrɛ au ɓezɔ̃ Sasitɛni-
Yɛnɛ shɔ sisɨn anɛ a Ɗabii gbete a Koranti, yɛnɛ shɔgbete shɔ ɓai nyanɛ i ɔ̃ Ɗalapa ɓɛshɔzɛ wɔsɔ-wɔsɔ kpai, shɔ gbeteyi pɛ u ɓɛɛyɛ, gbeteyi ɓasi yuu kopiɗɔpiya a Kirisi Yesɔ nii, a shɔgbete i bassi Uɓeyelapa Yesɔ Kirisi a koo kpai, i ɓeye au ɓɛɛ:
Mɛnɛ Ɗalapa u ɓeye a Uɓeyelapa Yesɔ Kirisi u ãwɔ tɔ̃vɨn pɛlinɛ a ɔ̃nɛ binyatɔ̃nɛni.
Ɗa vɔɔ Susãri Tasinɛ a Kirisi Bi
Kopiɗaviya n ɗɔgbete n dɔ̃ri Ɗalapayɛ awɔ yuu aru gbete ãwɔ tɔ̃vɨn pɛlinɛ a Kirisi Yesɔ kabii. Aru gbete ɔ ɓasi yuu a Kirisi ni ɔ ɔ̃tɛ shɔvinaa ayuu vi piti kpai, ɓasinɛ nyanwanɛ a vizɛnɛni kpai. Ruu gbete ɔ nta a Kirisi yuu shɔu zɛtɔ awɔ biini. Aru nankɔ vim ji lɛrɔɔ vɔɔ susãri tasinɛ tɛnɛ ɓa ko gbete, nagbete ɔ ga Uɓeyelapa Yesɔ Kirisi anɛyɛ Ukɔma yɛ sãwɔ sɔ̃njo katakata yɛnɛ lee nyayisinɛ, nɔgbete ɔ yɛ ɔ̃ ɓa shɔrukɔ̃linɛ a lee gbete Uɓeyelapa Yesɔ Kirisi yɛ yeeri shɔ ruu ayuu yɛ. Ɗalapa pɛ shɔ gbete shɔ pɔ̃ sisɨn au bi, Ɗalapa au ɓawɔ nya nɛu pɛli vibiinyatɔ̃nɛ a ɓɛɛ jaa Yesɔ Kirisi ni Uɓeyelapa ni yɛ.
Yuu Vɔsinɛ Atette Shɔ sisɨn Anɛ Ɗabii
N shɔbiiyi n gakɔɔtɔ piti kpai au Uɓeyelapa Yesɔ Kirisi nii, ɔ ɓasiyuu ɔ nya u ɔ̃ gbete ayuu vigbete ɔ shayɛni, nɔgbete yuvɔsinɛ yɛ ɔ̃ tɔɓa awɔ tetteni ɓa. Ɔ yuɓasinɛ u ɔ̃ gbete shɔrɔrɔ, ɔ sisɨn u ɔ̃ gbete ɔ nyashanɛ u ɔ̃ gbete. Aruviya shɔwɔyi a Kuluwi wɛrɛ i gelin tɛttɔ baras n shɔbiiyi nɛ nyamarinɛ awɔ tɛtɛni. N shapɛ naam: ko-piya awɔ tete shajo viwɔ tot. Shɔzɛ gbete shanɛ, <<N gɨnma Bulus>>; wɔsɔ̃n nɛ, <<N gɨnma Apolosi>>; wɔnɛ, <<N gɨnma Bituru>>A wɔsɔ̃n nɛ, <<N gɨnma Kirisi>>. Shɔ vɔsi Kirisitɛ a kn kn ya! Sipɛ Bulus vɔrɛ a laa awɔ yuuni ya? Shɔ pɛlɔɔ batizima naa Bulus jadɔɔyi ya?
N dɔ̃ri Ɗa tɛ aru n ji pɛli shɔzɛ gbete wɔɔ batizima ɓa awɔ tetteni ɓa see Kiripusi a Gayu. Shɔwɔyɛ sha dɔɔɓa nɛ, shɔ pɛlɔɔ batizima ɓa ang nii ɓa. ( Pɛ nizɛ, n pɛli IStifanu batizima au shɔwɛrɛyini; ama n yɛn kpaa sisɨn dɔɔɓa nɛn pɛli shɔwɔ batizimatɛ toti ɓa.) Kirisi ji shomɓa nɛn pɛli shɔwɔ batizima ɓa. Shon nɛn geli shɔ ruu tɔ̃vɨn, ji sha ɓa nɛn pɛli vishonɛ a shɔzɛ sẽrẽ ɓa, n ji kasi ɓa Kirisi vɔnɛ a yula u ɔ̃ri shɔ waati weze ɓa.
Kirisi U pɛ Ɗalapa Kaka Au Sẽrẽ
Aru ruu gbete Kirisi vɔnɛ a yulaa ɔ̃ a shɔgbeteyi niiyɛ bi vikɔ̃linɛ weze; ama au bi shɔgbete shɔ rauyɛ pɛ Ɗalapa kaka. Ɗa nyaruubii shanɛ,
<<N yɛn lɛsi shɔvizɛnɛyi sẽrẽtɔ,
n yɛn pɔ̃ shɔgbeteyi ɓali laatɛ bang vizɛnɛ u ɔ̃ weze.>>
Kɛɗɔn Shɔ vizɛnɛyi kɛpiya? Shɔ laa ɓali bang i kɛpiya? Shɔ gbeteyi tɔnɛyi zɛnɔɔ nya masinɛtɛ a kotipim kpai i kɛpiya? Ɗalapa tasi tɛttɔ nɛ vizɛnɛ a kotipim waati wezeǃ Aru Ɗalapa sẽrẽ shɔzɛ iyɛ zɛ Ɗalapa dɔɔ ɓa ai sẽrẽni ɓa. Naa i si baali ɓaanɛ nɛ<<rãng>>ruu gbete u nwayɛ, Ɗalapa pɔ̃ au sisɨn nɛn raa shɔgbete i ã sisɨn yɛtɔ. Yahudawayi kãɓɛɛ nɛ shɔu tasiyi vibiizaanɛ gbete yɛ pɔ̃i i ã sisɨnrɛ yɛ, Heliniyawayi kãbɛɛ nɛi kpaa sẽrẽ. Ɓɛɛ au bi, u nwa ɓɛɛ ruu Kirisi gbete shɔ ɓau naa laayɛ, ruu gbete a Yahudawayi ɗɔbii ɓɛɛ ruuvini, a shɔgbeteyi ɓa Yahudawa ɓa i ɗɔbii ɓɛɛ vi rãng; ama a shɔgbeteyi Ɗalapa ɓai nyayɛ bi ko shɔ Yahudawa ko ɓa shɔgbeteyi ɓa Yahudawa ɓa, ruum ai bi pɛ Kirisi, u pɛ Ɗalapa kaka a Ɗalapa sẽrẽ. Aru viya vigbete shɔ zɛnɛ Ɗalapa vi rãng pɛlinɛ ukɔ ɔ̃rɛ vigbete au tɛɛ shɔzɛ sẽrẽyɛ, a vigbete shɔ zɛnɛ Ɗalapa vibiivɔsinɛ ukɔ ɔ̃rɛ vigbete au tɛɛ shɔzɛ kakayɛ. Masayi dɔdɔrim ɔ kpaasisɨntɔ nɔgbete ɔ si ɗɔnyɛni, a ɗagbete Ɗalapa ɓawɔ nyayɛ. A shɔzɛ vi zɛnɛ, shɔ kpɛ̃nɛ, shɔ kaka, a shɔgbete i ɔ̃ a dɔlaa pɛ̃niba i si fɛ̃ɛ. Ɗalapa lɔɔ vigbete a shɔzɛ tuunɛ nɛpɛ vi rãng aru u ã shɔ sẽrẽyi yusẽ, a lɔɔ wɔsɔ̃n vigbete u kaka ɓa ɗɔmɓayɛ aru u ã shɔ kakayi yusẽ. Ɗalapa lɔɔ vigbete a shɔzɛ zɛnɛ ɓa viwɔ ɓa, ko u vishonɛ ɓa, gbeteyi pɔ̃ a sisɨn nɛ ɓa viwɔ ɓa, ukɔ ɔ̃rɛ vigbete Ɗalapa pɛli vishonɛ a wuniyɛ aru u lɛsi vigbete shɔzɛ tuunɛ vitɔ̃vɨng yɛ. Vim tasitɛ nɛ, shɔwɔ yɛ baasi ɓa a Ɗalapa ɗekɨn ni ɓa. Ama Ɗalapa kɔ ɓawɔ nyarɛ nɛ, ɔ ɔ̃ gbete a Kirisi Yesɔ nii, a Ɗalapakɔ pɛlirɛ nɛu ɔ̃ u sẽrẽ. Ukɔ u ɔ̃rɛ Ɗalapa ɓɛshɔzɛ Wɔsɔ-wɔsɔ ai shɔ yai naa wati weze. Kɛɗɔn ji nagbete Ɗanyaruubii shayɛ nɛ, <<Shɔgbeteu kɛ tɔnɛn baasitɔ, ɔ̃riutɛ kaka jazɨng a kɔrɔ u baasi a vigbete Uɓeyelapa pɛliyɛ.>>
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.